ပ္ဍဲတွဵုရးကရေၚ်ဍာဲ ပေါဲဗ္တိုက်တံ သာသ္ကာတ်မြဟ်ကၠုၚ်

လွိုၚ်ကဝ်၊ ဂျူလာၚ် (၂၈)

သွက်ဂွံကလေၚ်အုပ်ဓလီုတိဍာ် အပ္ဍဲတွဵုရးကရေၚ်ဍာဲမာန်ဂှ်တုဲ ဒပ်ကံၚ်ဇြဳပၞာန် ဟိုတ်နူထ္ပက်ဒၟံၚ်ပၞာန် နကဵုဇြဟတ်လၟိဟ် ဗွဲမဂၠိုၚ်ဂၠေၚ်ဂှ်ရ ပ္ဍဲကဵုဒၞါဲဗွဲမဂၠိုၚ်ဂၠၚ် အပ္ဍဲတွဵုရးဂှ် ပေါဲဗ္တိုက်တံ သာသ္ကာတ်မြဟ်ကၠုၚ်ဂှ် ဂကောံဇြဟတ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပပ္တံနူဂိတုဂျူလာၚ် ၂၁ တုဲကၠုၚ်တေံတုဲ အပ္ဍဲကွာန်ကျံၚ်ပါန်ညဵု ကေုာံ ကွာန်ယှာန်ဝါန်အံၚ် မဒှ်ကွာန် နူကဵုသ္ကုတ်ဗၟံက်ဒဒန်သြၚ်လောန်ဂှ် နူကဵုစထ္ပက်ကၠုၚ်ကရောၚ်ပၞာန် (၄) ကရောၚ် ဇြဟတ်ၜိုတ် ၃၀၀ တုဲဂှ် ပေါဲဗ္တိုက်တံ စသ္ကာတ်မြဟ်ကၠုၚ်ရ။

ပ္ဍဲကဵုပေါဲဗ္တိုက်တံဏံဂှ် လ္ပာ်ကံၚ်ဇြဳပၞာန် မ္ၚးနူဇြဟတ်ဂၠိုၚ်ဂှ် ဗ္တိုက်လဝ် သီုကဵုပရေၚ်ပန်ပှော်တရဴကျာ၊ လွဟ်ဇၞော်တံရ။

အခိၚ်လၟုဟ်ဂှ်လေဝ် ကံၚ်ဇြဳပၞာန်ဝွံ နူကဵုသၠုၚ်ကျာတွဵုရးသေံဂှ် မွဲဒမြိပ်ဂၠံၚ်လွိုၚ်ကဝ်−မိုဝ်ဗျေဝ်ဂှ် သုၚ်စောဲဇြဟတ်ဒပ်တွာ် ကံၚ်ဇြဳပၞာန် ဗ္ဒါဲ ၄၀၀၊ ကွဳစက် ၜိုတ် ၇၀ ဖ္ဍိုက်တံတုဲ လုပ်စိုပ်လဝ်တံလေဝ် နွံဒၟံၚ်ရောၚ် ဂွံတီကေတ်ရ။

ကံၚ်ဇြဳပၞာန် ဗပေၚ်ဒၟံၚ်ဇြဟတ်သာ်ဏံဂှ် ဂကောံဇြဟတ်ပၠန်ဂတးတံ ဟိုတ်နူကြတ်ဗ္တိုက်ဒၟံၚ်အကြာဂှ်ရ ပေါဲဗ္တိုက်တံ သာသ္ကာတ်မြဟ်ကၠုၚ်မာန်ရောၚ် ညးအုပ်ကာ ကံၚ်ဇြဳကောပ်ကာဲအုပ်ဓုပ် အခိၚ်ကာလအကြာဍုၚ်ကရေၚ်ဍာဲ (IEC) ဥူဗညာ ဟီုရ။

“ပ္ဍဲကဵုလွိုၚ်ကဝ် ကေုာံ ဂၠံၚ်လ္ပာ်မိုဝ်ဗျေဝ်ဂှ် ဒှ်ဒၟံၚ်ပေါဲဗ္တိုက်ဂှ် ဂွံဆဵုကေတ်ရ။ ညးဍုၚ်ကွာန်တံ ချိုတ်ဂျိုၚ်နွံဂှ် ပိုယ်တံဟီုဂွံရ။ ဒၞါဲဏံဂှ် စနူသတ္တာတုဲတေံတုဲ ဒဵုကဵုအခိၚ်လၟုဟ် ပရေၚ်ကြံၚ်မ္ၚိုဟ်တံ နွံဒၟံၚ်ဖိုဟ်ရ။ မွဲဒၞါဲပၠန်ဂှ် လ္ပာ်ပယျဵုတံဂှ်လေဝ် ပေါဲဗ္တိုက်တံ က္တဵုဒှ်ဒၟံၚ်ရ။ လ္ပာ်ကွာန်တၟိဏံကဵု ဗဝ်လခေဝ်၊ တုဲတှ်ေ ပ္ဍဲကဵုလ္ပာ်မေဝ်သေအ် ကဵု ဖာသံၚ်တံဂှ်လေဝ် ပရေၚ်ဒိဓဗတ်တံ နွံဒၟံၚ်လၟိုန်ရ။ လ္ပာ်ဒပ်ပၞာန် သၠဲပ္တိုန်လဝ်ဇြဟတ်ပၞာန် ဗွဲမဂၠိုၚ်ဂှ်လေဝ် ဂွံဆဵုကေတ်ရ။

အတိုၚ်ဂလာန် ဂကောံဇြဟတ်ပၠန်ဂတးတံမ္ဂး အပ္ဍဲသၞာံဏံ ပ္ဍဲကဵုတွဵုရးကရေၚ်ဍာဲဂှ် ၝောံဒပ်ကံၚ်ဇြဳပၞာန်တၟိတၟိတံ ထပ်စိုပ်ကၠုၚ်တုဲ အခိၚ်လၟုဟ်ဂှ် ပ္ဍဲကဵုပေါဲဗ္တိုက်တံဂှ် ဂွံကလေၚ်ဆဵုကေတ်ဒၟံၚ် ၝောံဒပ် (၉၉) ကဵု ၝောံဒပ် (၅၅)တံဂှ် ဂွံတီကေတ်ရ။

အပ္ဍဲတွဵုရးကရေၚ်ဍာဲဂှ် အကြာဒပ်ကံၚ်ဇြဳပၞာန်ကဵု PDF ဖာသံၚ်၊ PDF ဗဝ်လခေဝ်၊ ဒပ်ပၠတရဴဗၠးၜးညးဍုၚ်ကွာန်ကရေၚ်ဍာဲ ဂကူပံၚ်ကောံ (ကလတလ) ၊ တမ်ုပ် (၂၀) KNDF ကေုာံ ဒပ်ပံၚ်ကောံ KRU တံဂှ် ပေါဲဗ္တိုက်တံ က္တဵုဒှ်ဒၟံၚ်အရိုဟ်ဒဒှ်တ္ၚဲရ။

ဒပ်ကံၚ်ဇြဳပၞာန်ဝွံ ပ္ဍဲကဵုဒေသဒှ်ပေါဲဗ္တိုက်တံဂှ် ဟိုတ်နူစွံပွန်ဗ္တိုက်ကၠုၚ် သီုကဵုကောန်အရာပ်တံဂှ်ရ ဒးဂြိပ်ဒဴပါဲဒလေတ်ဒၟံၚ် သီုညးဒေသတံတုဲ စံၚ်ပလီုပလာ် သ္ၚိဒၟံၚ်ကောန်အရာပ်တံဂှ် ကၠောန်ၜိုတ်ဒၟံၚ်ရ။

အတိုၚ်တၚ်လလောၚ်တြး ဂကောံဇြဟတ်ညးဍုၚ်ကွာန်ကရေၚ်ဍာဲတောတက် PKPF ဂှ်မ္ဂး အပ္ဍဲကာလဒပ်ပၞာန်သီအဝဵု ပွိုၚ် (၂) သၞာံဏံ ပ္ဍဲတွဵုရးကရေၚ်ဍာဲဂှ် ပေါဲဗ္တိုက်အပံၚ် က္တဵုဒှ်လဝ် စဵုကဵု (၇၂၉) ဝါဂှ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)ဗီု−Social Media