တၞၚ်သဳ၊ ဂျူလာၚ် (၂၈)
ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော် အပ္ဍဲကွာန်ဗာန်ဠဝ်၊ ပွိုၚ်ဍုၚ်တၞၚ်သဳ၊ ရးဒေသဇၞော်တၞၚ်သဳဂှ်တုဲ ညးဗြဴဒေသ (၂) တၠ ဇီုကပိုက်ကလိဂွံလဝ်ဝပ်ဂှ် ဂွံတီကေတ် ဇရေၚ်ဂကောံဇြဟတ်ပၠန်ဂတးတံရ။
တုဲကၠုၚ် ပ္ဍဲဂိတုဂျူလာၚ် ၂၆ အခိၚ်လဒေါဝ်တ္ၚဲတေံ နူကဵုဂကောံဒပ်ပံၚ်ကောံစဵုဒၞါဒေသတံ အာစိုပ်ဗ္တိုက်လဝ် ဗ္ဒိုပ်ကၚ်ဗၠာဲသၟိၚ် မၞုံကွာန်ဗောဓိကာန်ဂှ်တုဲဂှ် ဒပ်ကံၚ်ဇြဳပၞာန်တံ ပန်ပှော်စုတ်လဝ် လွဟ်ဇၞော် အပ္ဍဲကွာန်ဂှ် ဟွံပိုတ်သ္ကုတ်ရ။
လွဟ်လက်နက်မကမ် နူကဵုဒပ်ကံၚ်ဇြဳပၞာန် မပန်ပှော်လဝ်ဂှ်ဝွံ ဟိုတ်နူဒတုံဗ္တိုဟ်ထ္ကးအာလဝ် ပ္ဍဲကွာန်ဗာန်ဠဝ်ဂှ်ရ ညးဗြဴဒေသ အာယုက်မၞုံ ၅၀ ၜါတၠ ကလိဂွံလဝ်ဝပ်မကမ် ပ္ဍဲကဵုဇိုၚ်ရ။
ညးဗြဴ ဒးလွဟ်ဇၞော် ကလိဂွံလဝ်ဝပ်တံဂှ် နကဵုအရီုဗၚ် ဂကောံဟံၚ်ပြာ်မှာဇန်တံဂှ် ပလံၚ်ဗစိုပ်ကဵုလဝ် ရုၚ်ဂဥုဲပွိုၚ်တိုက်ကြပ်ဂှ်ရောၚ်ဂှ် ဂွံတီကေတ်ရ။
ပ္ဍဲကဵုပွိုၚ်ဍုၚ်တၞၚ်သဳ ဒၞါဲဂကောံဇြဟတ်ပၠန်ဂတးတံ ဇြဟတ်ခိုဟ်ဒၟံၚ်ဂှ် ဒပ်ကံၚ်ဇြဳပၞာန်ဝွံ လၟေၚ်ဒဒှ်တ္ၚဲ ကလိလောန်ဒၟံၚ် ပွဗ္တိုက်ပန်ပှော်လွဟ်ဇၞော်တံရ။
တုဲကၠုၚ် အပ္ဍဲဂိတုဂျောန်တေံဂှ်လေဝ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တံဂှ်တုဲ ညးဒေသ အပ္ဍဲပွိုၚ်ဍုၚ်တၞၚ်သဳ (၃) တၠ ချိုတ်တုဲ (၁၀) တၠဟွံအောန် ကလိဂွံလဝ်ဝပ်ဂှ် ညးဒေသတံ ဟီုရ။
ပရိုၚ်−သြၚ်လောန်တိုၚ်(မ်)
ဗီု−Social Media
sanlontai