မတ်မလီု၊ ဂျူလာၚ် (၂၈)
ပ္ဍဲကဵုအကာဲအရာ ကၟိန်ဍုၚ်ဟွံညိၚ်ဝတ်ဒၟံၚ်ဂှ် တက်ပ္တိတ်သြန်တၞးစက္ခူ တၞးၜါဠက်ဒ္ကေဝ်ဏောၚ် ကံၚ်ဇြဳပၞာန် လလောၚ်တြးတုဲဂှ် ဗွဝ်ဖျာတိသ္ၚိကၠအ်မတ်မလီု တွဵုရးဍုၚ်မန် ဒးဒေါအ်ဇူလဝ် ပရေၚ်သွံတြးတံရောၚ်ဂှ် ဂွံတီကေတ် နူကဵုညးရေၚ်တၠုၚ်ဒတုဲဖဵုတံရ။
တိုက်သြန်ဗဟဵု သၟဝ်တဲကံၚ်ဇြဳပၞာန်ဂှ် သြန်တၞးၜါဠက် ရုပ်စိၚ်ပါဂှ် စနူဂိတုဂျူလာၚ် ၃၁ ဏံတုဲ တက်ပ္တိတ်အာဏောၚ် ပ္ဍဲဂိတုဂျူလာၚ် (၂၃) အခိၚ်နူဂယးတေံ နူကဵုလာၚ်ရုပ်ရမျာၚ်မျဝတဳ ဒပ်ပၞာန်ပိုၚ် လလောၚ်တြးလဝ်ရ။
ဟိုတ်နူပရိုၚ်တက်ပ္တိတ် သြန်စက္ခူတၟိဂှ်တုဲ ပ္ဍဲကဵုတ္ၚဲဂှ်ရ ညးဓလိုက်တမ်ရိုဟ် ပ္ဍဲတိသ္ၚိကၠအ်တံ ၜိုန်ရဗက်ရာန်လဝ် ဗွဲမဂၠိုၚ်ကီုလေဝ် မၞိဟ်သွံတံဂှ် ဒးမၚ်ကျောဝ်ဒၟံၚ်အကာဲအရာရောၚ် ညးရေၚ်တၠုၚ်ဒတုဲဖဵုတိသ္ၚိကၠအ်မွဲတၠ ဟီုရ။
“ပရေၚ်သွံတြးဒေါအ်ဒေၚ်အာဟီုဂှ် ပ္ဍဲကဵုဍုၚ်ဏံဂှ် အတိုၚ်တီလဝ်ဂှ်ရ လှုဲလှာ်ဒှ်မွဲမွဲဏောၚ်ဟီုတှ်ေ မၞိဟ်တံဂှ် လကိုတ်တ္ၚဵုတိုန်အိုတ်တုဲ ဒှ်သြန်ဖောဝ်ဂှ် ဟီုဒၟံၚ်အိုတ်ရ။ ၚုဟ်မးတံဏံ သွက်ဂွံတိုန်ဂှ် အစဳဇန်နွံဒၟံၚ်ဏောၚ်၊ ဆ္ဂး ဒှ်ကၠုၚ်သာ်လဵုရောဟီုဂှ် လှုဲဂှ် ဟွံတိတ်ကၠုၚ်ဏီတုဲ တန်တဴကဵုလ္တူဏံတုဲ ညိၚ်ဒၟံၚ်မွဲလစုတ်ဟီုဂွံရ။ ကၠအ်တံဂှ်တှ်ေ တၠုၚ်လအာၚုဟ်ဂွံတိုန်ဂှ် နွံဒၟံၚ်တုဲ ကၠအ်ဇၞော်ဇၞော်လ္ၚဵုတံတှ်ေ ဟွံသွံရပုဟ်၊ ကလေၚ်မၚ်ထောံရ။ မၞိဟ်လှုဲနွံ ပ္ဍဲတဲတံဂှ်လေဝ် သွက်ဂွံရာန်ဂှ် ဂအာၚ်သွံဂှ် ဟွံမွဲပုဟ်။ ဒှ်ဒၟံၚ်အကာဲအရာ ဒးမၚ်ရံၚ်ရောၚ်” ဂှ် ညးသ္ဂးလဝ်ရ။
ကံၚ်ဇြဳပၞာန်သီအဝဵုဂှ် နဒဒှ်သ္ပစၟတ်သမ္တီ ရုပ်ကျာ်ပဋိမာရုပ် မာရဝိဇယ အာစိုပ်ဒတုဲ ကေုာံ စိၚ်ဗ္တာၚ် ရဌနန္ဒက ပေၚ်မွဲသၞာံ မဂွံဆဵုကေတ်လဝ် ပ္ဍဲဂိတုဂျူလာၚ် ၂၃ သၞာံတုဲကၠုၚ်တေံဂှ်တုဲ တက်ပ္တိတ်အာ သြန်တၞးၜါဠက် နကဵုသၞောတ်ဗ္ၜတ်ရောၚ်ဂှ် ထ္ၜးလဝ်ဟိုတ်ရ။
ဆ္ဂး ပ္ဍဲကဵုအကြေပ်အဂြတ်ပရေၚ်ဍုၚ်ကွာန် မဆောတ်ယောၚ်စှ်ေကၠုၚ်ဒၟံၚ်ဂှ် ဟိုတ်နူတၚ်လလောၚ်တြး တက်ပ္တိတ်အာ သြန်စက္ခူတၟိဂှ်တုဲ ပ္ဍဲကဵုဗွဝ်ဖျာဒဝ်ဠာအပ္ဍဲဍုၚ်၊ ဗွဝ်ဖျာထဝ် ကေုာံ သြန်ၝာတ်တံဂှ်လေဝ် ၚုဟ်ဒှ်အာဟွံညိၚ်ဟွံဝတ်အိုတ်တုဲ ဒှ်ဒၟံၚ်အကာဲအရာ ဒးဒေါအ်ဇူလဝ် ပရေၚ်သွံတြးတံဂှ်ရ။
အကာဲအရာဗွဝ်ဖျာတိသ္ၚိကၠအ်တံဂှ်လေဝ် ဗီုလဵုဆက်ဒှ်ရောဟီုဂှ် ချိၚ်ခယျဟွံဒးဂှ်ရ မၞိဟ်ကၟာတ်လဝ်ပရေၚ်သွံတြးတံလေဝ် နွံတုဲ မၞိဟ်သွံရာန်ဒၟံၚ် နကဵုၚုဟ်ဒးစိုတ်တံလေဝ် နွံဒၟံၚ်ဂှ် ညးရေၚ်တၠုၚ်ဒတုဲဖဵု တိသ္ၚိကၠအ်မွဲတၠ ဟီုရ။
“လၟုဟ်ဂှ် ရဲသွံတံဂှ် လ္ၚဵုတံဂှ် ကလေၚ်ကၟာတ်လဝ် ပရေၚ်သွံတြးတံ နွံဒၟံၚ်ရ။ အကာဲအရာဗွဝ်ဖျာ ဒှ်သာ်လဵုရောဟီုဂှ် ဟွံတီကေတ်တုဲ လ္ၚဵုတံဂှ် ကလေၚ်ကၟာတ်လဝ် ပရေၚ်သွံတြးတံဂှ်တုဲ လ္ၚဵုတံဂှ်ပၠန်လေဝ် ဟွံကၟာတ်ပုဟ်။ သွံအတိုၚ်ဏံရ၊ အတိုၚ်ၚုဟ်ကော်လဝ်ဂှ် ဟွံယှအ်တုဲ သွံပေၚ်ၚ်ရ” သာ်ဝွံ ညးသ္ဂးရ။
ညးမၞုံအခေါၚ်ဟီုဂး သ္ကိုပ်ဗိုလ်ဇၞော် ဇြဝ်မေန်ထောန်ဂှ် သြန်တၞးၜါဠက်ဒ္ကေဝ်ဂှ် ပ္တိတ်အာနကဵုလၟိဟ်ဂၠိုၚ်ၚ်ဟွံသေၚ်တုဲ ဟိုတ်နူကလေၚ်လှာဲဂတးအာ ကုသြန်စက္ခူတြေံတြေံတံဂှ်ရ သြန်ဖောဝ် ဒှ်ဟွံမာန်ပုဟ်ဂှ် ပ္ဍဲအကြာတ္ၚဲတံဏံ ဟီုဂးလဝ် နူကဵုလာၚ်ထဳဝဳ ကၟိန်ဍုၚ်ပိုၚ်တံရ။
ဆ္ဂး ဟိုတ်နူအသိၚ်အလိုန်သြန်တၞးၜါဠက်ဒ္ကေဝ် မတက်တြးအာ နဒဒှ်စၟတ်သမ္တီဂှ်တုဲ ၚုဟ်ဖျာသ္ဇိုၚ်တံ သၠုၚ်တိုန်ကၠုၚ်ဒၟံၚ်ဂှ်ရ လ္တူကဆံၚ်မၞိဟ်သ္ဇိုၚ် မကြေပ်ဂြတ်ဒၟံၚ် အရာရာအိုဿီုတံဂှ် ဒးဇီုကပိုက်ဒၟံၚ် နကဵုအသိၚ်သ္ကာတ်တ်ရ။
တိုက်သြန်ဗဟဵု NUG အခိၚ်ကာလအကြာဂှ် သြန်တၞးၜါဠက်ဒ္ကေဝ် နူကဵုတိုက်သြန်ဗဟဵုသၟဝ်သြဇာကံၚ်ဇြဳပၞာန် မတက်ပ္တိတ်အာဂှ် သ္ပအာစၟတ်သမ္တီ ဟွံသေၚ်တုဲ ပ္ဍဲဂိတုဂျူလာၚ် ၂၇ တေံ လလောၚ်တြးစၟတ်လဝ် နဒဒှ်သြန်စက္ခူဟွံလုပ်သၞောဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai