ပေကျေန် – ဂျူလာၚ်(၂၈)
ကြဴနူဝမ်ရိ ဂွံဒုၚ်ခါန်ကၞက် နဒဒှ်ဝန်ဇၞော်ဍုၚ်သ္အာၚ်ကြုက်တုဲ နဒဒှ်လၟေၚ်တရဴဍုၚ်သ္အာၚ်ညး ဆဵုဂဗလဝ်ကဵု သမ္မတ အာဒိုဝ်ဂါန် ပ္ဍဲအာန်ကာရာ ဍုၚ်တူရကဳတုဲ သဳကၠဳလဝ် ပရေၚ်ဍုၚ်ယူကရုၚ်ရဂှ် တမ်ရိုဟ်တၚ်ဂၞၚ်ပရိုၚ်မွဲတၠ ဟီုသ္ဂးလဝ်ရ။
မွဲကာလယိုက်ဂၠေၚ်လဝ်တာလျိုၚ် ပွိုၚ်မွဲသၞာံပြၚ် ချေန်ကာန်ကၠေံဗ္ဒန်ဒၟံၚ် ပ္ဍဲဗွိုၚ်မၞိဟ်ညာတ် ပွိုၚ်မွဲဂိတုဂှ် ပလှ်ဖျေံလဝ် နူကဆံၚ်ဌာနန္တရတုဲဂှ် ဍုၚ်ကြုက် ခါန်ကၞက်လဝ်ဝမ်ရိ မဒှ်ကလုတ်ဝှ်ကြံၚ်ညးတအ်မွဲတၠ နဒဒှ် ဝန်ဇၞော်ဍုၚ်သ္အာၚ် ပ္ဍဲဂိတုဂျူလာၚ် စၟတ်တ္ၚဲ (၂၇) ဂှ်ရ။
ဝမ်ကဵုဝန်ဇၞော်ဍုၚ်သ္အာၚ်တူရကဳဂှ် ပ္ဍဲပရေၚ်သဳကၠဳဟာကာန်ဖဳဒါန်တအ်ဂှ်မ္ဂး အကာဲအရာယူကရုၚ်လကြဴအိုတ်ကဵု သၞောတ်ဘဏ္ဍာဂၠးကဝ် ပါလုပ်ဒၟံၚ်ရဂှ် တံရိုဟ်တၚ်ဂၞၚ်ပရိုၚ် ဌာနဝန်ဇၞော်ဍုၚ်သ္အာၚ်တူကဳမွဲတၠ ဟီုသ္ဂးလဝ်ရ။
ကြဴနူရုယှာ နုက်တိတ်နူတၚ်တုပ်စိုတ် သၞာံ ၂၀၂၂ ကုလသမဂ္ဂကဵု တူရကဳတအ် လုပ်ကဵုလဝ်အကြာတုဲဂှ် ပ္ဍဲအခိၚ်တုဲကၠုၚ် ဟွံလအ်ဏံ လ္ပာ်ရုယှာ သၠုၚ်ပ္တိုန်လဝ်အသိၚ်ဗတိုက်သြောံယူကရုၚ် နကဵုက္ၜၚ်ကျာရ။
သွက်ဂွံဗစိုပ်ဒတုဲ ပေါဲပၞာန်ယူကရုၚ်ဂှ် ညံၚ်ဂွံသုၚ်စောဲပရေၚ်ကြုက် ဍိုက်ဓလီုဩဇာလ္တူရုယှာဂှ် ကၟိန်ဍုၚ်ဥရောပတအ် ဗတိုက်ဖ္အောဝ်လဝ်တုဲ သၞာံဏံသ္ကုတ်ကၠာဂှ်မ္ဂး ညံၚ်ကြုက်ဂွံစဵုဒၞာကဵု ကောန်အရာပ် ကေုာံသွက်ဂွံသ္ပရှ်ေသှ်ေဒ္ဂေတ်ဗက် အခေါၚ်အဝဵုကၟိန်ဍုၚ်နာနာ အာတ်မိက်လဝ်တုဲ အစဳဇန်ပရေၚ်ၜိုဟ်လလံ (၁၂)တၚ်ဂှ် လလောၚ်တြးလဝ်ရ။
အခိၚ်ဆဵုဂဗကဵုဝမ်ဂှ် သမ္မတအာဒိုဝ်ဂါန်ပ္ဍဲကိစ္စဆေၚ်စပ်ကဵုဒေတအ်ဂှ် ပ္ဍဲအခန်ကဏ္ဍပၟိက်ကိစ္စဇၞော်သီုၜါကၟိန်ဍုၚ်ပါလုပ်ဒၟံၚ်တုဲ သၠုၚ်ပ္တိုန်အာအသိၚ် ပရေၚ်ပံၚ်တောဲရေၚ်တၠုၚ်ကၟိန်ဍုၚ်ကြုက်ကဵုတူရကဳရောၚ် စၟဳပတှ်ေကေတ်လဝ်ရဂှ် ရုၚ်သမ္မတလလောၚ်တြးလဝ်ရ။
သ္အာၚ်နူဂှ်ပၠန် အခိၚ်ဝန်ဇၞော်ၜါတၠဆဵုဂဗဂှ် ပ္ဍဲလ္တူပရေၚ်ပိုန်ဒြပ် အကြာကၟိန်ဍုၚ်တူရကဳကဵု ကၟိန်ဍုၚ်ကြုက် ကေုာံ ပရေၚ်ဖောအဗြေဝ်တဴတက် စပ်ကဵုပရေၚ်ဆက်ဆောံ ကူသာန်သွံရာန်ဗၞိက် သဳကၠဳလဝ်ရဂှ် တံရိုဟ်တၚ်ဂၞၚ်ပရိုၚ် ဟီုသ္ဂးလဝ်ရ။
ပ္ဍဲပရေၚ်သဳကၠဳညးတအ်ဂှ် အစဳဇန်ဇုက်ဂၞိၚ်မွဲတၞုၚ် ဂၠံၚ်မွဲတၞုၚ်ကြုက်ကီု သီုကဵုပရေၚ်စကၠောန်သ္ပ ဇြဟတ်နျူကလဳယာ ဒေသစက္ကရတ်၊ ပရေၚ်တဵုလွဳ ကေုာံ သွာၚ်တရဴကျာတအ် ပါလုပ်ဒၟံၚ်ရဂှ် ဂွံတီကေတ်ရ။
အခိၚ်ကလုတ်ကဆံၚ်လ္တူၜါတၠ ဆဵုဂဗလဝ် ပ္ဍဲအာန်ဂါရာဂှ် သဳကၠဳလဝ် အကာဲအရာကောန်ဂကူဝဳဂါ မံၚ်တန်တဴနွံဒၟံၚ် ပ္ဍဲဒေသယှေန်ကျာန် မောဿလေန်ဗွဲမဂၠိုၚ် မံၚ်တန်တဴဒၟံၚ် သ္ကုတ်ပလိုတ်ကြုက်ရဂှ် တံရိုဟ်တၚ်ဂၞၚ်ပရိုၚ် ဟီုသ္ဂးလဝ်ရ။
စပ်ကဵုပရေၚ်စကာလဝ် ဝဳဂါမောဿလေန်ဗွဲမဂၠိုၚ် ပ္ဍဲဗဒိုပ်ယှေန်ကျာန် ဗွဲအဓမ္မကီု သီုကဵုကၠောန်သ္ပဒၟံၚ် ပရေၚ်ဖံက်ပ္ကဝ်အခေါၚ်အရာမၞိဟ်တအ်ဂှ် ဂကောံညးအရာပ်တအ်စောတ်စောဲလဝ်တုဲ လ္ပာ်ကြုက်ဂှ် ဟီုဂးတးပါဲလဝ် တၚ်စောတ်စောဲဂှ်ရ။
Ref : CNA
sanlontai