ဒေါ်အောင်ဆန်းစုကြည်ကို အကျဉ်းထောင်ကနေ ရွှေ့ပြောင်းလိုက်ပြီလို့အတည်ပြု

(၅) ဒဒှ်ရပဆုဲပြံၚ်စၠောံလဝ် ဒဝ်အံၚ်သာန်သုကျဳ နူထံၚ်စာတ်ဂှ် သ္ပလဝ်ဒ္တန်

လဂုၚ်၊ ဂျူလာၚ်(၂၉)

ဒဝ်အံၚ်သာန်သုကျဳ က္ဍိုပ်သ္ကိုပ်ညးဍုၚ်ကွာန် ဒးဒုၚ်ရပ်ဖျေံလဝ်ထံၚ်ဂှ် နူကဵုထံၚ်စာတ် ပဆုဲပြံၚ်စၠောံလဝ် စမြိုၚ်အလဵုအသဳမွဲဒၞာဲရဂှ် သၞာဲဒဴဗော် NLD မွဲတၠ ဟီုလဝ် ပ္ဍဲဂိတုဂျူလာၚ်ရဂှ် ဓမံက်လဝ် ပ္ဍဲဌာန်ပရိုၚ် CNN ရ။

ကြဴနူဒးဒုၚ်ရပ်လဝ် လကြဴနူသီကေတ်အဝဵု ပ္ဍဲဂိတုဖေဖဝ်ဝါရဳ သၞာံ ၂၀၂၁ တုဲဂှ် မဳဒဳယာကၟိန်ဍုၚ်ပိုၚ် ဓမံက်ထ္ၜးလဝ် ရုပ်ဒဝ်အံၚ်သာန်သုကျဳ စိုပ်ဒၟံၚ်ရုၚ်သၞောဝ်ဓဝ်နေပျဳဒဝ် မွဲဝါဓဝ်ဟေၚ် ဂွံဆဵုညာတ်ကေတ်လဝ်ရ။

ဟိုတ်နူဒပ်ပၞာန်သီအဝဵုတုဲ အလုံမွဲကၟိန်ဍုၚ်ဗၟာ ပရေၚ်ဗတိုက်ပန်ပှော် နလွဟ်လက်နက် က္တဵုဒှ်ကၠုၚ်ဗွဲမဂၠိုၚ်တုဲ အပံၚ်လၟိဟ်မၞိဟ် မွဲပြကောဋိကိုတ်ပြၚ် ဒးဂြိပ်ဒဴပါဲဓလေတ်ဒၟံၚ်ရဂှ် ဂွံတီကေတ် အတိုၚ်တၚ်လလောၚ်တြး ကုလသမဂ္ဂရ။

ပဆုဲပြံၚ်စၠောံလဝ် ဒဝ်အံၚ်သာန်သုကျဳ ပ္ဍဲစမြိုၚ်ဗဒိုပ်ဇၞူသၞာဲဒဴမွဲဒၞာဲ ပ္ဍဲတ္ၚဲစန်အခိၚ်ဗ္တံရဂှ် သၞာဲဒဴဗော် NLD ဟွံမိက်ဓမံက်ယၟုမွဲတၠ ဟီုသ္ပလဝ်ဒ္တန်ကဵု ဌာန်ပရိုၚ်အေအာပ်ဖ်ပဳ ပ္ဍဲဂိတုဂျူလာၚ် စၟတ်တ္ၚဲ (၂၈)ရ။

ဒဝ်အံၚ်သာန်သုကျဳဂှ် ဆဵုဂဗလဝ်ကဵု ဥက္ကဋ္ဌကၠတ်ထဝ် တဳခွောန်မျေတ်တုဲ သွက်ဂွံဆဵုဂဗအာ ညးစၞးတၟေၚ်ကြုက် ဆေၚ်စပ်ကဵုပရေၚ်အာယှ ကၠုၚ်စိုပ်ကၟိန်ဍုၚ်ဗၟာ နွံဒၟံၚ်ရဂှ်လေဝ် သၞာဲဒဴဗော် NLD ဂှ် ဟီုသ္ပလဝ်ဒ္တန်ရ။

ပြံၚ်ပဆုဲဏာလဝ် ဒဝ်အံၚ်သာန်သုကျဳ ဇရေၚ်စမြိုၚ်ဒၞာဲစွံပ္တန်လဝ်ပူဂိုလ်ပၟိက်ဇၞော်သက်က် မၞုံပ္ဍဲနေပျဳဒဝ်ရဂှ် တမ်ရိုဟ်တၚ်ဂၞၚ်ပရိုၚ် ဗော်ပရေၚ်ဍုၚ်ကွာန်တၞဟ် မွဲတၠဂှ်လေဝ် ဟီုသ္ဂးလဝ်ရ။

ပ္ဍဲဂိတုဂျူလာၚ် ဆဵုဂဗလဝ်ကဵု ဒဝ်အံၚ်သာန်သုကျဳရဂှ် ဝန်ဇၞော်ဍုၚ်သ္အာၚ်သေံ ဟီုသ္ဂးလဝ်တုဲ အရာဏံဂှ် ကြဴနူဒးဒုၚ်ထိၚ်ဒဝ်လဝ်တုဲ ဒှ်ပရေၚ်ဆဵုဂဗလဝ် ကုသၞာဲဒဴကဆံၚ်သၠုၚ်ဍုၚ်သ္အာၚ် အလန်ပထမကိုပ်ကၠာအိုတ်လေဝ် ဒှ်ရ။

ပရေၚ်ဆဵုဂဗ အကြာညးတအ်ညးၜါတၠ လအ်လဝ် ပွိုၚ်မွဲနာဍဳရဂှ် ၜိုန်ရညးမၞုံအခေါၚ်ဟီုဂးကံၚ်ဇြဳပၞာန်မွဲတၠ ဟီုလဝ်ကီုလေဝ် မုသဳကၠဳလဝ်ရောဂှ် ဟွံဂွံဟီုထ္ၜးလဝ် သောဲသောဲဗြောဲဗြောဲရ။

Ref,CNN