ပ္ဍဲဒိုက်ဥူ ပျူသဝ်ထဳ ညးကဵုပရိုၚ်ကံၚ်ဇြဳပၞာန် ဒးဒုၚ်ပန်ပသောၚ်လဝ်

ဒိုက်ဥူ – ဂျူလာၚ်(၂၉)

ရးဒေသဗဂေါ၊ ပွိုၚ်ဍုၚ်ဒိုက်ဥူ ပျူသဝ်ထဳကဵုပရိုၚ် အထံက်တိုၚ်ကံၚ်ဇြဳပၞာန် မၞုံယၟုဥူသာန်ဝေန် ဒၟံၚ်အရာပ်စၟတ် (၃) ပွိုၚ်ဍုၚ်ဒိုက်ဥူဂှ် ဒပ်စဵုဒၞာညးဍုၚ်ကွာန်ဗဂေါ ကေုာံ Daik-U Defence Force တအ် ပံၚ်တောဲတုဲ ပသောၚ်သ္အးလဝ် နဒဒှ်ပရေၚ်ချဳဒရာၚ်ပၞာန် နာန်ထိုက်အောၚ်ရဂှ် PDF ဗဂေါ လလောၚ်တြးလဝ် ပရိုၚ်ရ။

ပရေၚ်ဒဒှ်ဂှ် ပ္ဍဲဂိတုဂျူလာၚ် စၟတ်တ္ၚဲ (၂၆) အခိၚ်ဇိုၚ်သဝ်တ္ၚဲ လ္တူဂၠံၚ်ဂတမုက်ရုၚ်က္ဍိုပ်ဖျာဇြဳပေန်တာယျာ အရာပ်စၟတ်(၁) ပွိုၚ်ဍုၚ်ဒိုက်ဥူဂှ် ညးကဵုပရိုၚ်ကံၚ်ဇြဳပၞာန် ဒးလဝ်ဘဲလွဟ်မကမ် (၃)လစုတ် လောတ်စှ်ေအာ ပ္ဍဲဒၞာဲဂှ်တုဲ ဒးလဝ်ဘဲဝပ် (ဒးဒှ်ဓဝိၚ်)ချိုတ်မာန်ရဂှ် ဟီုသ္ဂးလဝ်ရ။

အခိၚ်ပန်ပှော်ဂှ် ကောန်အရာပ်မၞုံယၟု ခေန်မောၚ်ထိုဲ ဂြိပ်လုပ်ကၠုၚ်တုဲ ဟိုတ်နူလုပ်တာဒၞာလဝ် သ္ဂံၚ်ပၠန်ဂတးဍုၚ်ဇၞော်တအ်တုဲ ဒးပန်ဘဖျေံလွဟ် ပ္ဍဲတိရဂှ် ဓမံက်လဝ် ပ္ဍဲတၚ်လလောၚ်တြးရ။

ဟိုတ်နူပန်ဘဖျေံလဝ် ပ္ဍဲတိတုဲ ကိုဝ်ခေန်မောၚ်ထိုဲ ဒးလဝ်ဘဲဝပ်ပ္ဍဲဇိုၚ် (ဟွံဒးဒှ်ဓဝိၚ်)ဂှ်ရ စိုတ်ဟွံမိပ်လးလးလရဂှ် ဒပ်မဆေၚ်စပ်တအ် လလောၚ်တြးလဝ် ပရိုၚ်ရ။

ဥူသာန်ဝေန် အထံက်တိုၚ်ကဵုပရိုၚ်ကံၚ်ဇြဳပၞာန်ဂှ် ပံၚ်တောဲကဵု ကောန်ဒပ်ကံၚ်ဇြဳပၞာန်၊ ဒပ်ဗၠာဲသၟိၚ်တအ်တုဲ ဗက်လ္ၚတ်ဂၠိုက်ဂၠာဲဒၟံၚ် ညးဍုၚ်ကွာန် ကေုာံ ဂကောံ UG တအ်တုဲ ပလံၚ်ကဵုဒၟံၚ်ပရိုၚ်ကီု အခိၚ်ရပ်စပ်လေဝ် ပံၚ်တောဲကဵု ကံၚ်ဇြဳပၞာန်တုဲ ဒှ်ညးၜုၚ်တက်ပျဲပျာဲဒၟံၚ် ညးဍုၚ်ကွာန် ကေုာံ သ္ဂံၚ်ဒပ်ဒမၠုက်ဍုၚ်ဇၞော်တအ် ဓဇန်န်ရဂှ် ဂွံတီကေတ်ရ။

သ္အာၚ်နူဂှ်ပၠန် ပံက်လဝ်မုက်လိက်တြးဝါဒကံၚ်ဇြဳပၞာန်တုဲ ၜေဟ်လက်ခမဳသၚ် ရုန်မဵုရိုၚ်ဇိုၚ်ကီု၊ ဟီုဂးဘပဠ ဖ္အောဝ်ထဴကဵုရပ်ဒၟံၚ် CDM ကေုာံ ညးဍုၚ်ကွာန်ပၠန်ဂတးဒၟံၚ်တအ်ကီု သီုကဵုဒၟံဒဒိုက် ကုညးဍုၚ်ကွာန်နာနာသာ်ဂှ်ရ ဒးပသောၚ်သ္အးလဝ်ရဂှ် ဒပ်စဵုဒၞာတအ် ဟီုသ္ဂးလဝ်ရ။

နကဵုဒပ်စဵုဒၞာညးဍုၚ်ကွာန် ဟိုတ်နူဆက်ဗတိုက်သရိုဟ်အာဂှ်ရ ညံၚ်ဟွံဂွံမံၚ်ကရပ် ကောန်ဒပ်ကံၚ်ဇြဳပၞာန် ပျူသဝ်ထဳ အထံက်တိုၚ်ကဵုပရိုၚ်ကံၚ်ဇြဳပၞာန်တအ်ကီု အခိၚ်ဒှ်ပရေၚ်ပန်ပှော်မ္ဂး ဟွံလုပ်ပလာပ်ပထုဲတုဲ သွက်ဂွံပါဲဓလေတ်ကဵု ပ္ဍဲဒၞာဲဗၠးဘဲဂှ်လေဝ် လၟေၚ်ဒုၚ်လဝ်ဂုဏ် ဗွဲမေတ္တာရ။

ပရိုၚ် – သြၚ်လောန်တိုၚ်(မ်)

ဗီုရုပ် – PDF-ဗဂေါ