ပ္ဍဲသဓီု ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ကောန်အရာပ် (၁) တၠ ဒးချိုတ် ဂွံလဝ်ဘဲဝပ် (၄) တၠ

သဓီု၊ ဂျူလာၚ်(၂၉)

တွဵုရးဍုၚ်မန်၊ ပွိုၚ်ဍုၚ်သဓီု၊ ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော် ပ္ဍဲကွာန်ထုမ်ဘိုလ်လေဝ် သီုရန်တၟံနွံနွံတုဲ ကောန်အရာပ် (၁) တၠ ဒးချိုတ်တုဲ ဂွံလဝ်ဘဲဝပ် (၄) တၠရဂှ် ဂွံတီကေတ် အတိုၚ်တၚ်လလောၚ်တြး KNU ခရိုၚ်သဓီုရ။

ဂိတုဂျူလာၚ် စၟတ်တ္ၚဲ (၂၇) အခိၚ်နူဂယးဂှ် ဟိုတ်နူဒပ်ပံၚ်ကောံ ဒပ်ပၞာန်ဗၠးကောန်ဂကူကရေၚ် KNLA လုပ်ဗတိုက်လဝ် ဗဒိုပ်ပၞာန် တံဒပ်ပၞာန်တိုက်ကံၚ်ဇြဳပၞာန် ခမရ (၉) ဖျေံသ္ဇိုၚ်ကွာန်ဝဳယျဝ် ပွိုၚ်ဍုၚ်သဓီုဂှ်တုဲ ပေါဲဗတိုက်ၜါလ္ပာ် က္တဵုဒှ်လဝ်ရ။

ပေါဲဗတိုက်ဒှ်တုဲ နူကဵုဗဒိုပ်ကံၚ်ဇြဳပၞာန် ပန်ဖျေံနၚ်လွဟ်ဇၞော် ပ္ဍဲကွာန်ထုမ်ဘိုလ်လေဝ်ကီု သီုပ္ဍဲကွာန်ဗ္ဒာဲဗ္ဒာဲဂှ် ဟွံအောန်နူ (၄၀)မ ပန်ဗတိုက်လဝ်ရ။

ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ သဝ်အေအ်ကအ်ယှဳ အာယုက် (၁၈)သၞာံ ဒၟံၚ်ကွာန်ထုမ်ဘိုလ်လေဝ် ဒးချိုတ်အာပ္ဍဲဒၞာဲဂှ်တုဲ ညးဒေသ (၄)တၠလေဝ် ဇီုကပိုက်ဒးလဝ် လွဟ်ဇၞော်တုဲ ဂွံလဝ်ဘဲဝပ်ညးသ္ကအ်ရ။

ပ္ဍဲပေါဲဗတိုက် ဗဒိုပ်ကံၚ်ဇြဳပၞာန်ဂှ် နူလ္ပာ်ဒပ်ပံၚ်ကောံ KNLA ဒးပြဟ်လလုဲလဝ် (၂) တၠတုဲ ဂွံလဝ်ဘဲ (၂) တၠကီု လ္ပာ်ကံၚ်ဇြဳပၞာန် ဇီုကပိုက်ဒးချိုတ်လဝ် ဟွံအောန်နူ (၄)တၠ နွံမာန်ရဂှ် ညးတာလျိုၚ် KNU ခရိုၚ်သဓီုမွဲတၠ ဟီုသ္ဂးလဝ်ရ။

ဆ္ဂး ပ္ဍဲပေါဲဗတိုက်ဂှ် ပရေၚ်ဒပ်ကံၚ်ဇြဳပၞာန် ပန်ဖျေံလွဟ်ဇၞော်ပ္ဍဲကွာန် ဒၞာဲကောန်အရာပ်ညးဍုၚ်ကွာန်တအ် မံၚ်တန်တဴ ဟွံဆေၚ်ဆက်ကဵု ပရေၚ်ပၞာန်ဏံ ဒှ်ထပ်ကလိလောန်ဒၟံၚ် ဒုဟ်ရာဇဝတ်ပၞာန်ရဂှ် ဟီုသ္ဂးလဝ်ရ။

ဂိတုဂျူလာၚ် စၟတ်တ္ၚဲ(၂၅) တုဲကၠုၚ်တေံလေဝ် ပ္ဍဲကွာန်ယှိုဲယောၚ်ပျ ပွိုၚ်ဍုၚ်သဓီု ဒပ်ကံၚ်ဇြဳပၞာန် ထ္ပက်ကၠုၚ်လုပ်ကရောၚ်ပၞာန် ရပ်ကေတ်ဏာ ကောန်အရာပ် (၂) တၠ နဒဒှ်ဒေၚ်ဒုၚ်ဒၞာမၞိဟ်တုဲ ပ္ဍဲကဵုဂှ် ညးနွံယၟု ဥူဝါ ဒၟံၚ်ကွာန်မယာမ်ကုန် မွဲတၠဓဝ်ဟေၚ် ကလေၚ်ဗၠးတိတ်ကၠုၚ်လဝ်ဏီရဂှ် KNU ခရိုၚ်သဓီု လလောၚ်တြးလဝ်ရ။

ဟိုတ်နူဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲပွိုၚ်သဓီု KNU တုဲ ဂကောံသ္ၚိကၟိန် နူကွာန်မိချောၚ်အိုၚ်၊ ခလောက်အေန် ကေုာံ မယာမ်ကုမ် ဗ္ဒာဲ ၂၀၀ သ္ၚိကၟိန်၊ လၟိဟ်မၞိဟ် ၁၀၀၀ ပြၚ်တအ် ထောံသ္ၚိဌာန်တုဲ ဒးဂြိပ်ဒဴ ပါဲဓလေတ်ဒၟံၚ်ရဂှ် ဂွံတီကေတ် နူညးဒေသတအ်ရ။

ပရိုၚ် – သြၚ်လောန်တိုၚ်(မ်)

ဗီရုပ် – KNU