နေပျဳဒဝ်၊ ဂျူလာၚ်(၂၉)
လက်ထက်ကံၚ်ဇြဳပၞာန်သီကေတ်လဝ်အဝဵုကၟိန်ဍုၚ်တန်ကဵုတန်ဏံ ပရေၚ်ကူသာန်ဗၞိက်ဟွံလုပ်သၞောဝ် အောန်ယအ်စှ်ေအာ ဟၟဲတုဲ ဆက်ကၠောန်သ္ပ နွံဒၟံၚ်ရဂှ် က္ဍိုပ်သ္ကိုပ်ပၞာန်ဒုတိယ ဒုၚ်လဝ်ဝန်ရ။
ဂိတုဂျူလာၚ် စၟတ်တ္ၚဲ (၂၇) ပ္ဍဲကောံဓရီုပ္ညဳပ္ညပ်လၟေၚ်ကမၠောန် ကဝ်မတဳက္ဍိုက်က္ဍိုပ် ဗတိုက်သရိုဟ် ပရေၚ်ကူသာန်ဗၞိက်ဟွံလုပ်သၞောဝ် ကၠောန်ဗဒှ်လဝ် ပ္ဍဲနေပျဳဒဝ်ဂှ် ဒုတိယဂအုပ်သ္ကိုပ်ဗိုလ်ဇၞော် သိုဝ်ဝေန် ဟီုသ္ဂးလဝ်ရ။
နူဂိတုဂျာန္နဝါရဳ သၞာံတုဲကၠုၚ်တေံ စဵုကဵုဂိတုဂျောန် သၞာံဏံ ပ္ဍဲပွိုၚ်မွဲသၞာံဘာ်ဂှ် ဂဗုတ်တောဲ ရပ်ဂွံလဝ် နူပရေၚ်ကူသာန်သွံရာန်ဗၞိက်ဟွံလုပ်သၞောဝ် ၇၀၀၀ ဂဗုတ် ကေုာံ ၚုဟ်မးချိၚ်ခယျကေတ် ၁၂၇ ဗဳလျာန်ဒှ်တုဲ ယဝ်ရတၟော်ရံၚ်ကဵု သၞာံကၠာတေံမ္ဂး ပရေၚ်ရပ်ဂွံ တဴတက်တိုန်ကၠုၚ် ဗွဲမဂၠိုၚ်ရဂှ် ဟီုသ္ဂးလဝ်ရ။
ဆ္ဂး ဗ္ၜတ်ၚုဟ်မး ကေုာံ ဂဗုတ်တောဲသၞာံတုဲကၠုၚ်တေံ ၜိုတ်ဂလိုၚ်လဵု နွံလဝ်ရောဂှ် ဒုက္ဍိုပ်သ္ကိုပ်ပၞာန် ဟီုဂးလဝ် ပ္ဍဲပေါဲကောံဓရီုဂှ် ဟၟဲရ။
ပ္ဍဲပရေၚ်ကူသာန်ဗၞိက်ဟွံလုပ်သၞောဝ်တအ်ဂှ် ဂကောံယာဉ်ကွဳစက်ယန္တရာဘေတ်ဟိုဝ် ၜံက်ခါဲသယံဇာတဟွံလုပ်သၞောဝ်ကီု၊ ဆုဟွံလုပ်သၞောဝ် ဂကူနာနာသာ်ကီု၊ ကပေါတ်ဗၞိက်တိတ်နူဝါဗ္ၚကီု၊ ကပေါတ်ဗၞိက်အပြောံသုၚ်စောဲ ပ္ဍဲကမၠောန်ကီု၊ ကပေါတ်သုၚ်စောဲမၞိဟ် ကေုာံ ကပေါတ်စသုၚ်တအ် ပါလုပ်ဒၟံၚ်ရ။
ပရေၚ်ကူသာန်သွံရာန်ဗၞိက်ဟွံလုပ်သၞောဝ် ဂွံက္တဵုဒှ်ကၠုၚ်ဂှ် ပါဲနူတၚ်ဒှ်သ္ဇိုၚ်တအ်တုဲ ဒေသပယျဵု နွံဒၟံၚ်ပၟိက်ပရေၚ်ဂီုကၠီုပ္ဍဲဍုၚ် နွံဒၟံၚ်ကီု၊ ဟိုတ်နူဒေသပယျဵုဒၞက်ဂၠိၚ်သ္ၚောဲတုဲ ဒၞာဲတတ်ကၠောံၜါကၟိန်ဍုၚ်မာန် နွံဒၟံၚ်ဗွဲမဂၠိုၚ်ဂှ်ရ ဂွံမၚ်မွဲရံၚ်စံၚ် အတိုၚ်ပရေၚ်ဂီုကၠီု ဝါတ်ဂါတ်ဒၟံၚ်ရဂှ် ဒုက္ဍိုပ်သ္ကိုပ်ပၞာန် ဟီုသ္ဂးလဝ်ရ။
သ္အာၚ်နူဂှ်ပၠန် တၚ်ဍိုန်လျဆေၚ်စပ် ကဵုသၞောဝ် နွံဒၟံၚ်ကီု၊ တၚ်မပ္တံကဵု စရာဲဍာ်ဒကေဝ် ဇြဟတ်ညးယိုက်ဝန် ပါလုပ်ရေၚ်တၠုၚ်ဒၟံၚ် ပ္ဍဲလၟေၚ်ကမၠောန်ဗတိုက်သရိုဟ် ပရေၚ်ကူသာန်ဗၞိက်ဟွံလုပ်သၞောဝ် ကေုာံ ဒ္ဂေတ်စရိတ္တလီုလာ် နွံဒၟံၚ်ဂှ်လေဝ် ပ္ဍဲအရာဗတိုက်သရိုဟ် ပရေၚ်ကူသာန်သွံရာန်ဗၞိက်ဟွံလုပ်သၞောဝ်ဂှ် ဒှ်ဒၟံၚ်တၚ်ကော်ချဴရဂှ် ညးဒုၚ်လဝ်ဝန်ရ။
ကြဴနူဒပ်ပၞာန်သီအဝဵုတုဲ သ္ကုတ်လကြဴဏံ သၞေဟ်ကၚ်ဆက်စၠောံဗၞိက်တအ် ဒးကၟာတ်ကၠုၚ်လဝ်ကီု၊ ကပေါတ်ဗၞိက်လ္ၚဵု ဒးဒုၚ်ပိုၚ်ခြာပၠုပ်ဒၟံၚ်ကီု၊ ပိုၚ်ခြာၜတ်ကၞာတ်လဝ် မူဝါဒဗၞိက်ပၠုပ်ကီု၊ ကပေါတ်ဗၞိက်ပၠုပ်နၚ်တအ်ဂှ် ဟိုတ်နူကံၚ်ဇြဳပၞာန် သာပတေၚ်ဂြတ်စၟဳစၟတ်ကၠုၚ်ကီုတုဲ ပရေၚ်ကူသာန်ဗၞိက်ဟွံလုပ်သၞောဝ် ကေုာံ ဗွဝ်ဖျာဗၞိက်ဒမၠုတအ် ဇၞော်တိုန်ကၠုၚ်ဒၟံၚ်ရဂှ် သၟာပရေၚ်ပိုန်ဒြပ်ဂမၠိုၚ် ဟီုသ္ဂးလဝ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – MOI
sanlontai