ပလံၚ်ဗစိုပ်လဝ် ဂအုပ်ဘာ သိပ္ပံပရေၚ်တဵုလွဳ(ထဝါဲ) ကေုာံ ဂကောံညးတံ ပ္ဍဲတိဍာ်ဗၠးၜး

ထဝါဲ၊ ဂျူလာၚ် (၂၉)

ဂအုပ်ဘာ သိပ္ပံပရေၚ်တဵုလွဳ(ထဝါဲ) ကေုာံ ကောန်ဗၠာဲညးကီု သီုကဵုအ္စာ၊ အ္စာၝောံ ၇ တၠ မကော်ထိၚ်လဝ်ဂှ် ပလံၚ်ဗစိုပ်ကဵုလဝ် တိဍာ်ဗၠးၜးရောၚ် ပ္ဍဲဂိတုဂျူလာၚ် (၂၇) တေံ နူကဵုဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ် (LLPDF) လလောၚ်ပ္တိတ်လဝ်ရ။

LLPDF မဒှ်ဂကောံဒပ်စဵုဒၞါဒေသဂှ်ဝွံ ပ္ဍဲဂိတုဂျူလာၚ် (၂၂) ဂှ် အာစိုပ်ဘာသိပ္ပံပရေၚ်တဵုလွဳ(ထဝါဲ) မပံက်လဝ် ပ္ဍဲကွာန်တဝ်ယှေ၊ ပွိုၚ်ဍုၚ်လံၚ်လုၚ်ဂှ်တုဲ သွက်ဂွံကၠောန်သ္ပ CDM ဂှ် သဳကၠဳလဝ်ကဵု ဂအုပ်ဘာဂှ်ရောၚ် သ္ဂးရ။

ကြဴနူဆဵုဂဗသဳကၠဳတုဲဂှ် သွက်ဂွံပလံၚ်ဗစိုပ်ကဵု ညးမိက်ဂွံသ္ပ CDM ဂအုပ်ဘာ ဒဝ်မျေတ်တ်ခေန်၊ ကောန်ဗၠာဲညး မာၚ်အံၚ်ဟုၚ်ခ၊ တၠသ္ၚိညး အထံက်ကထိက ဥူနာၚ်ဝေန် ကေုာံ ဒုဂအုပ်ဘာ ဥူခေန်မာၚ်ထိုဲ၊ အထံက်ကထိက ဒဝ်သန္တာအေ၊ အထံက်သွာၚ်စှ်ေကၠောန်နတဲ ဥူနေသာန်၊ နဝ်ဖျူဖျူတ တံ ဒၞါဲဂီုကၠီုဂှ်တုဲ ကၠုၚ်ကော်လဝ်ရောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ပ္ဍဲကဵုအခိၚ်ဂှ် ကံၚ်ဇြဳပၞာန် ဟိုတ်နူထ္ပက်ကၠုၚ်ကရောၚ်ပၞာန် နကဵုဇြဟတ်လၟိဟ်ဗွဲမဂၠိုၚ်ဂၠေၚ်ဂှ်ရ သွက်ဂွံပလံၚ်ကဵုဒၞါဲဂီုကၠီုဂှ် လဇုဲအာလဝ်တုဲ ပလံၚ်ဗစိုပ်ကဵုလဝ် တိဍာ်ဗၠးၜးမွဲဒၞါဲရောၚ်ဂှ် ပါလုပ် ပ္ဍဲတၚ်လလောၚ်တြးဂှ်ရ။

PDF လံၚ်လုၚ်ဂှ် အပ္ဍဲပွိုၚ်ဍုၚ်လံၚ်လုၚ် ညံၚ်ဂွိုအ်ပံက်ဘာ သၟဝ်တဲကံၚ်ဇြဳပၞာန်တံဂှ် ကဵုလဝ်သတိကီုလေဝ် ဟိုတ်နူဘာသိပ္ပံပရေၚ်တဵုလွဳ (ထဝါဲ) ဂှ် ပံက်တုဲဗ္တောန်ဒၟံၚ်ဂှ်ရ လုပ်စိုပ်ဍိုက်ဗ္တိုက်လဝ်ရောၚ် သ္ဂးရ။

စပ်ကဵုလၟေၚ်ဒဒှ်ဏံတုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံလဝ် ဂကောံဒပ်စဵုဒၞါညးဍုၚ်ကွာန်ပွိုၚ်ဍုၚ်လံၚ်လုၚ် (LLPDF) တံဂှ်ကီုလေဝ် ဒဵုကဵုအခိၚ်လၟုဟ် ဟွံဂွံအဆက်ဏီရ။

စပ်ကဵုလ္တူကိစ္စ ဂအုပ်ဘာ သိပ္ပံပရေၚ်တဵုလွဳ (ထဝါဲ) ကေုာံ ဂကောံညးတံ ဒးဒုၚ်ကော်ထိၚ်ဒဝ်လဝ်ဂှ်တုဲ ဒဒှ်ရကံၚ်ဇြဳပၞာန် ကေုာံ ဂကောံသၟဝ်တဲဂၠိုၚ်ကဵုဒါဇြိန် ဟီုဗျိဖျေံကဝုဂှ် လလောၚ်ပ္တိတ်လဝ် တၚ်လလောၚ်တြးတုဲ ကံၚ်ဇြဳပၞာန်ဂှ်လေဝ် ဂၠိုက်ဂၠါဲဒၟံၚ် လၟေၚ်ဒဒှ်ဏံရောၚ်ဂှ် သ္ဂးရ။

တုဲကၠုၚ် ပ္ဍဲဂိတုဂျူလာၚ် (၂၁) တေံဂှ်လေဝ် နူကဵုဌာနက္ဍိုက်ပ်ပရေၚ်တဵုလွဳ ပွိုၚ်ဍုၚ်လံၚ်လုၚ် ဒုသ္ကိုပ်က္ဍိုက်ပ် ဥူတုၚ်ဥူဝွံ နကဵုတၚ်စောတ်စောဲ ပါလုပ်ဒၟံၚ် ပ္ဍဲကဵုပရေၚ်စၟဳတ်၊ ဗက်အကံက်ခေါန် ကုညးဍုၚ်ကွာန်အာတရဴ လ္တူဂၠံၚ်ဍာန်တံ မွဲစွံကဵုပျူသဝ်ထဳ၊ ကံၚ်ဇြဳပၞာန်တံဂှ်တုဲ LLPDF ပန်ပှော်ပသောၚ်ထောံလဝ် ပ္ဍဲကဵုသ္ၚိဒၟံၚ်ညးရ။

ပရိုၚ်−သြၚ်လောန်တိုၚ်(မ်)

ဗီု−LLPDF