NUG ကဵု အလဵုအသဳကာလအကြာကရေၚ်ဍာဲ သဳကၠဳလဝ် သွက်ယူနေတ်ဖေတ်ဒရေဝ်

မတ်မလီု – ဂျူလာၚ် (၂၉)

ကဝ်မယှေန်ပရေၚ်ပံၚ်တောဲရေၚ်တၠုၚ် အကြာအလဵုအသဳကၟိန်ဍုၚ်ကဵု ယူနေတ် တွဵုရး/ဖေတ်ဒရေဝ် ကေုာံ အကြာကံၚ်ဇြဳအုပ်ဓုပ်ကာလအကြာ တွဵုရးကရေၚ်ဍာဲ (IEC)၊ ကေုာံ ကံၚ်ဇြဳကဵုကသပ် တွဵုရးကရေၚ်ဍာဲ (KSCC) တအ် ကၠောန်ဗဒှ်လဝ် ကောံဓရီုပ္ညဳပ္ညပ်အလန်ပထမရ။

ပ္ဍဲကောံဓရီုဂှ် သမ္မတ NUG ယာယဳ ဒူဝါလယှဳလဂှ် ဟိုတ်နူဓဝ်ပတှ်ေစှ်ေစိုတ် ညးမွဲကဵုမွဲ မွဲလ္ပာ်ကဵုမွဲလ္ပာ် နွံဂှ်ရ ကောံဓရီုပ္ညဳပ္ညပ် ဒှ်ကၠုၚ်လဝ်တုဲ ဆက်တုဲ ညံၚ်ဓဝ်ပတှ်ေစှ်ေစိုတ် ဂွံခိုၚ်ဗိုန်ကၠုၚ်ကီု ညံၚ်သွဟ်ခိုဟ် ဂွံမံက်တိတ်ကၠုၚ်မာန် ဘိုၚ်ပ္တိတ်ဇြဟတ်ညးသ္ကအ်ညိဂှ် ဗတိုက်ဖ္အောဝ်လဝ်ရ။

ကံၚ်ဇြဳအုပ်ဓုပ်ကာလအကြာ တွဵုရးကရေၚ်ဍာဲကဵု ကံၚ်ဇြဳကဵုကသပ် တွဵုရးကရေၚ်ဍာဲမံက်ဂတဝ်တိတ်ကၠုၚ်ဂှ် သွက်တွဵုရးသ္အာၚ် ကေုာံ ယူနေဝ်ဖေတ်ဒရေတ်တၞဟ်တအ် ဒှ်ကၠုၚ်အစာံ အလန်ပထမကိုပ်ကၠာအိုတ်ရဂှ် ဟီုသ္ဂးလဝ်ရ။

“အတိုၚ်ပရေၚ်ပၠန်ဂတးကီု ပရေၚ်ဒက်ပ္တန်ကီု တွဵုရးကရေၚ်ဍာဲ ဍိုက်ပေၚ်ဒၟံၚ်ကဵု ဂုဏ်ဝိသေသတၟေၚ်ဂှ် ဂကောံဇြဟတ်ပၠန်ဂတးသီုဖအိုတ် မၚ်ရံၚ်ကျောဝ် သ္ပဒၟံၚ်အာရီုဗွဲတၟေၚ်ရဂှ် မိက်ဂွံဟီုဏာရ။ ညးဍုၚ်ကွာန်အလုံသီုဖအိုတ်လေဝ် ပ္ဍဲဒပ်ပၠတရဴပၠန်ဂတးဂှ် နူစတိတ်ကၠုၚ်ပေါဲ တွဵုရးကရေၚ်ဍာဲ က္လိဂွံလဝ်ပေါဲအံၚ်ဇၞးထပ်ကဵုထပ်ဂှ် စဵုကဵုအခိၚ်လၟုဟ် ဘိုၚ်ကရိုၚ်ကဵုဒၟံၚ်ဇြဟတ် ထံက်ဒၟံၚ်ဂလာန် ဂွံညာတ်ကေတ်ရ” ဂှ်သမ္မတယာယဳ ဒူဝါလယှဳလ ဟီုသ္ဂးလဝ်ရ။

သ္အာၚ်နူဂှ်ပၠန် ကိစ္စဒးရေၚ်တၠုၚ် ပ္ဍဲတွဵုရးကရေၚ်ဍာဲတအ်ဂှ်လေဝ် ဒက်ပ္တန်အာဓဝ်ပတှ်ေ မွဲကရောံကဵု အလဵုအသဳပရေၚ်ညဳသၟဟ်ကောန်ဂကူ ခိုၚ်ၚ်ဗိုန်န်တုဲ သွက်ဂွံဆက်ဂါံကွာ်အာမာန် ပတှ်ေကေတ်လဝ်ရဂှ်လေဝ် သမ္မတယာယဳ ဟီုသ္ဂးလဝ်ရ။

ကိစ္စဒးရေၚ်တၠုၚ် ပ္ဍဲတွဵုရးကရေၚ်ဍာဲ အရာအိုဿီုဂှ် ဒက်ပ္တန်အာဓဝ်ပတှ်ေစှ်ေစိုတ် မွဲကရောံကဵု အလဵုအသဳပရေၚ်ညဳသၟဟ်ကောန်ဂကူပိုဲ ခိုၚ်ၚ်ကၠိုက်က်တုဲ ဆက်ဂါံကွာ်အာမာန်ဏောၚ်ဂှ်လေဝ် ပတှ်ေကေတ်လဝ်ရ။

ကြဴနူဂှ်ပရေၚ်ပညာ၊ ပရေၚ်ထတ်ယိုတ်၊ ပရေၚ်ကဵုအရီုဗၚ် ဗ္စာရဏာပရေၚ်မၞိဟ်၊ ပရေၚ်ဆေၚ်စပ်ကဵု ညးဗြဴ သၟတ် ကေုာံကောန်ၚာ်သၟတ်၊ ပရေၚ်အခေါၚ်အရာမၞိဟ်၊ ပရေၚ်ဘဏ္ဍာ၊ ပရေၚ်အုပ်ဓုပ် ကေုာံ ကိစ္စပရေၚ်ပံၚ်တောဲရေၚ်တၠုၚ် ပရေၚ်ပၞာန်တအ်ဂှ် ညးတာလျိုၚ်မဆေၚ်စပ် ဗက်ကဵုကဏ္ဍညးကဵုညး သဳကၠဳလဝ်ရဂှ် ဂွံတီကေတ်ရ။

တၚ်ရန်တၟံကဝ်မယှေန်ပရေၚ်ပံၚ်တောဲရေၚ်တၠုၚ် အကြာကၟိန်ဍုၚ်ကဵု ယူနေတ်တွဵုရး/ဖေတ်ဒရေဝ်ကီု သီုကဵုလၟေၚ်ကမၠောန်တအ်ဂှ် ဝန်ဇၞောန်ကၟိန်ဍုၚ် ဒံက်တာလျှာန်မှုမ်သာခေါၚ် သဳကၠဳလဝ်ရ။

မူဝါဒ၊ သၞောဝ်သ္ဇိုၚ်ဒက်ပ္တန် ကေုာံ လၟေၚ်ကမၠောန်အဓာန်ဂတ ကံၚ်ဇြဳကဵုကသပ်တွဵုရးကရေၚ်ဍာဲဂှ် ဥက္ကဋ္ဌကံၚ်ဇြဳ ဥူအောၚ်သာန်မျေတ်ကီု သၞောဝ်သ္ဇိုၚ်ဒက်ပ္တန် မူဝါဒ ကေုာံ လၟေၚ်ကမၠောန်အဓာန်ဂတ ကံၚ်ဇြဳပရေၚ်အုပ်ဓုပ်ကာလအကြာ တွဵုရးကရေၚ်ဍာဲဂှ် ဒုတိယ ဥက္ကဋ္ဌခွောန်ထူဘဳတအ် သဳကၠဳလဝ်ရၚ်သ္ကအ် ဂတးဂတန်ရဂှ် ဂွံတီကေတ်ရ။

ကောံဓရီုဂှ် သမ္မတယာယဳ အလဵုအသဳပရေၚ်ညဳသၟဟ်ကောန်ဂကူ ဒူဝါလယှဳလ၊ သ္ကိုပ်ဝန်ဇၞော်ကၟိန်ဍုၚ် မာန်ဝေန်ခိုၚ်တာန် ကေုာံ ဝန်ဇၞော်လုပ်ဂကောံအလဵုအသဳ၊ ဥက္ကဋ္ဌကံၚ်ဇြဳကဵုက္သပ် တွဵုရးကရေၚ်ဍာဲ ဥူအောၚ်သာန်မျေတ်ကီု သီုညးလုပ်ဂကောံကံၚ်ဇြဳဂမၠိုၚ်၊ ဒုဥက္ကဋ္ဌကံၚ်ဇြဳအုပ်ဓုပ် ကာလအကြာ တွဵုရးကရေၚ်ဍာဲ ခွောန်ဗဳထူကီု သီုညးလုပ်လုပ်ဂကောံကံၚ်ဇြဳဂမၠိုၚ် သ္အာၚ်နူဂှ် ဥူမေန်ကိုဝ်နိုၚ် ညးလုပ်ဂကောံကဝ်မတဳဆက်ဆောံမဟာမိတ် NUG ကီု သီုညးလုပ်ဂကောံဂမၠိုၚ် တိုန်စိုပ်လဝ်ရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – NUG