မတ်မလီု၊ ဂျူလာၚ် (၂၉)
ပ္ဍဲဗွဝ်ဖျာကၠေၚ်စက်မတ်မလီု တွဵုရးဍုၚ်မန်ဂှ် အပ္ဍဲအကြာတ္ၚဲတံဏံ ကၠေၚ်စက်မွဲလဳတာဂှ် ၚုဟ်သၠုၚ်တိုန်ကၠုၚ် စဵုကဵုဗ္ဒါဲ (၂၄၀၀) ဒ္ကေဝ်ဂှ် တၠကမၠောန်ပရေၚ်သွံရာန်ကၠေၚ်စက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ကၠေၚ်စက် ကံၚ်ဇြဳပၞာန် မထိၚ်ဒက်လဝ်ဂှ်ဝွံ အပ္ဍဲသတ္တာဟဏံ ၉၅ မွဲလဳတာဂှ် နူကဵု ၂၃၀၀ ဒ္ကေဝ် စဵုကဵုဗ္ဒါဲ ၂၄၀၀ ဒ္ကေဝ်၊ ၉၂ မွဲလဳတာဂှ်လေဝ် နူကဵုပွဳပွူ ၂၂၀၀ ဒ္ကေဝ် စဵုကဵု ၂၃၀၀ ဒ္ကေဝ် ၚုဟ်သၠုၚ်တိုန်ကၠုၚ်ရ။
သ္အာၚ်နူဂှ်ပၠန် ကၠေၚ်ပရဳမဳယာန်ဒဳဇြေဝ်ဂှ်လေဝ် နူကဵုၚုဟ်မၞုံ ၂၂၆၀ ဒ္ကေဝ်ဂှ် ၚုဟ်သၠုၚ်တိုန်ကၠုၚ် ၂၄၀၀ ဒ္ကေဝ်ပြၚ်တုဲ ကၠေၚ်ဒဳဇြေဝ်ဓမ္မတာ မွဲလဳတာဂှ် နူကဵုၚုဟ်မၞုံ ၂၂၀၀ ဒ္ကေဝ်ဂှ် ၚုဟ်ကလေၚ်သၠုၚ်တိုန်ကၠုၚ် စဵုကဵု ၂၃၀၀ ဒ္ကေဝ်ရ။
ၚုဟ်ကၠေၚ်စက်ဝွံ ဟိုတ်နူၚုဟ်ကၠေၚ်စက်သၠုၚ်တိုန်ကၠုၚ်ဂှ်ရ ၚုဟ်ဗက်သၠုၚ်တိုန်ကၠုၚ်လဝ်ရောၚ်ဂှ် တၠကမၠောန်ပရေၚ်သွံရာန်ကၠေၚ်စက်မွဲတၠ ဟီုရ။
“ၚုဟ်ကၠေၚ်ဂှ်တှ်ေ ဟိုတ်နူအသိၚ်အလိုန် သြန်တၞး ၂ ဠက်ဒ္ကေဝ်ဂှ်တုဲ ၚုဟ်လှုဲဗၟာဂှ် စှ်ေကၠုၚ်ဟဂှ်ရ။ ၚုဟ်လှုဲဗၟာစှ်ေတုဲ ဆ္ဂး ညအ်ဂှ် အောန်ဒၟံၚ်ဏီဏောၚ်။ ၚုဟ်ကၠေၚ်ဂှ် အလဵုအသဳ ထိၚ်လဝ်ဏောၚ်တှ်ေလေဝ်။ ဆ္ဂး ၚုဟ်ကၠေၚ်ဂၠးတိဂှ် တိုန်တုဲ ၚုဟ်ကၠေၚ်သေန်ကာပေါဝ်လေဝ် တိုန်ဒၟံၚ်ဏောၚ်။ သြန်ဖောဝ် တၞး ၂ ဠက်ဏံဂှ် အလဵုအသဳဂှ် ဍေံထိၚ်လဝ်ဏောၚ်။ ထိၚ်လဝ် ပ္ဍဲကဵုၚုဟ်ကၠေၚ်ဂှ်ရ၊ ကပေါတ်ဗၞိက်သှ်ေတံဂှ် ဍေံထိၚ်ဟွံဂွံပုဟ်။ ၚုဟ်ကၠေၚ်ဂှ်တှ်ေ ဍေံထိၚ်လဝ်မာန်ဒၟံၚ်ဏောၚ်။ ကၠေၚ်ဂှ် ဒးရာန်ဒၟံၚ် နူကဵုဍေံရတုဲ အတိုၚ်ၚုဟ်ဍေံသွံရ ပိုယ်တံ ဒးရာန်ဒၟံၚ်” သာ်ဝွံ သ္ဂးရ။
ပ္ဍဲကဵုဗွဝ်ဖျာကၠေၚ်ဍေန်ဂၠးတိဂှ် အပ္ဍဲဂိတုဂျူလာၚ် သတ္တာဟတတိယဏံ ၚုဟ်ကၠေၚ်ဒမျိုၚ် မွဲစေဝ် ပွဳပွူ ၇၅ ဒဝ်ဠာအမေရိကာန်ဒဝ်ဠာဟေၚ် နွံဒၟံၚ်ဂှ်ဝွံ ပ္ဍဲဂိတုဂျူလာၚ် ၂၈ ဂှ် မွဲစေဝ် ၚုဟ်ဒှ်အာ စဵုကဵုပွဳပွူ ၈၀ ဒဝ်ဠာရ။
ညးစိုန်သ္ကီု ပ္ဍဲအရာကၠေၚ်စက်တံဂှ် ၜိုန်ရကံၚ်ဇြဳပၞာန် ထိၚ်ဒက်လဝ် ၚုဟ်ကၠေၚ်စက်တံဂှ်ကီုလေဝ် လ္တူပြသၞာသြန်ဖောဝ် မက္တဵုဒှ်ဒၟံၚ်လၟုဟ်ဂှ် ဒဵုဗၞတ်ၜိုတ်လဵု အေၚ်ဒုၚ်အာမာန်ရောဟီုဂှ် ဒှ်ဒၟံၚ်အကာဲအရာ ဒးမၚ်ကျောဝ်ဒၟံၚ်ရောၚ် သ္ၚဳဂၠိပ်လဝ်ရ။
ၚုဟ်ကၠေၚ်စက် ကံၚ်ဇြဳပၞာန် မစၟတ်လဝ်ဂှ်ဝွံ ပ္ဍဲကဵုလ္ဂုၚ်ကဵု မာန္တလေဝ်တံဂှ် မွဲလဳတာမ္ဂး ပွဳပွူၜိုတ် ၂၂၀၀ ဒ္ကေဝ်ဟေၚ် နွံကီုလေဝ် ပ္ဍဲကဵုတွဵုရးသေံ (ကျိုၚ်းတုံ) ဂှ် မွဲလဳတာ ၚုဟ်မၞုံဒၟံၚ် စဵုကဵု (၃၀၀၀) ဒ္ကေဝ်ရ။
ကံၚ်ဇြဳပၞာန်ဝွံ ကြဴနူဒပ်ပၞာန်သီအဝဵုတုဲ ထိၚ်ဒက်လဝ် အတိုၚ်ဗွဝ်ဖျာကၠေၚ်စက်မွဲဂှ်တုဲ အခိၚ်လၟုဟ်ဂှ်လေဝ် ရပ်စပ်စကာဒၟံၚ် သၞောတ်သွံတြး နကဵုအရၚ်ကဵုဂအုံ ကုဆေၚ်ကၠေၚ်စက်တံဂှ်ရ။
ၚုဟ်ကၠေၚ်စက်ဝွံ ကၠာဂွိုအ်သီအဝဵု လက်ထက်အလဵုအသဳ NLD ဂှ် မွဲလဳတာဂှ် ၚုဟ်မၞုံ ပွဳပွူ ၆၀၀ ဒ္ကေဝ်ဓဝ်တုဲ ကြဴနူဒပ်ပၞာန်သီအဝဵုတုဲ ၚုဟ်ကၠၚ်စက်ဂှ် သၠုၚ်တိုန်ကၠုၚ် ၄ ဆပြၚ်တုဲ ၚုဟ်ဟွံညိၚ်ဝတ်တံလေဝ် က္တဵုဒှ်ဒၟံၚ် အဆက်က်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai