ဒၞါဲဌာန်ဂအုပ် KIO မၞုံတန်တဴ ဗ္ဒါဲဍုၚ်လာၚ်ဇြာဂှ် ကံၚ်ဇြဳပၞာန် ဗ္တိုက်ဂြာတ်ဗမ်နကဵုက္ၜၚ်ကျာ

နာန်ဇြာန်ယာန်၊ ဂျူလာၚ်(၂၉)

ဒၞါဲပရေၚ်ပၞာန်ၜါလ္ပာ်မကြံၚ်မ္ၚိုဟ်မံၚ် ပ္ဍဲတွဵုရးကချေၚ်၊ ဗ္ဒါဲဍုၚ်လာၚ်ဇြာ ဒၞါဲဌာန်ဂအုပ်ဗဟဵုဂကောံဗၠးၜးကောန်ဂကူကချေၚ် KIO မၞုံတန်တဴတံဂှ် ဒပ်ကံၚ်ဇြဳပၞာန်တံ ကၠုၚ်စိုပ်ဗ္တိုက်ဂြာတ်ဏာလဝ်မခတိုဟ် နကဵုက္ၜၚ်ကျာရဂှ် ညးတာလျိုၚ်လလောၚ်ပရိုၚ် KIO သ္ကိုပ်ဗိုလ်ဇၞော်နဝ်ဗူ ဟီုကဵုဌာန်ပရိုၚ်သြၚ်လောန်တိုၚ်မ်ရ။

သ္ပပ္တံနူဂိတုဂျူလာၚ်မံက်တေံတုဲ ဒၞါဲဌာန်ဂအုပ်ဗဟဵု KIOမၞုံတန်တဴ ပ္ဍဲမွဲပွဳူဗ္ဒါဲဍုၚ်လာၚ်ဇြာဂှ် ဒပ်ကံၚ်ဇြဳပၞာန်တံ ထ္ပက်လဝ်ကရောၚ်ပၞာန်ဂှ်ရ အကြာဒပ်ကံၚ်ဇြဳပၞာန်တံကဵု ဒပ်ပၞာန်ဗၠးၜးကောန်ဂကူကချေၚ် KIA တံပရေၚ်ပၞာန်ၜါလ္ပာ်ကြံၚ်မ္ၚိုဟ်မံၚ်တုဲ ပေါဲဗ္တိုက်ဇီုမုက်တံ ဆက်နွံမံၚ်ရ။

ပွိုၚ်ဍုၚ်ဝိုၚ်မဝ်၊ ပ္ဍဲပွဳူဗ္ဒါဲကွာန်နာန်ဇြာန်ယာန် ပရေၚ်ပၞာန်ၜါလ္ပာ်မကြံၚ်မ္ၚိုဟ်မံၚ်ဂှ် ပ္ဍဲဂိတုဂျူလာၚ် စၟတ်တ္ၚဲ ၂၇ အခိၚ်ဗ္တံ ပွဳူ ၁၁နာဍဳဂှ် ကံၚ်ဇြဳပၞာန်တံ ဂြာတ်လဝ်မခတိုဟ်နကဵုက္ၜၚ်ကျာရ။

ဟိုတ်နူပွဗ္တိုက်ဂြာတ်မခတိုဟ်တုဲ ဒတုံစှ်ေဗ္တိုဟ်ထ္ကးအာလဝ် အကြာကွာန်မဒဳယာန်ကေုာံ ကွာန်အံၚ်ကျာ ဗ္ဒါဲကွာန်နာန်ဇြာန်ယာန်တံဂှ်တုဲ အကာဲအရာဇီုကပိုက်လီုလာ်တံဂှ် ဟွံဂွံမိၚ်ကေတ်ဏီရဂှ် သ္ကိုပ်ဗိုလ်ဇၞော် နဝ်ဗူ ဟီုရ။

“ပွကၠုၚ်ဂြာတ်မခတိုဟ်နကဵုက္ၜၚ်ကျာတံဂှ်နွံမံၚ်ရ။ နကဵုမခတိုဟ်ဂှ်လေဝ်ဂြာတ်၊ တုဲပၠန် နကဵု Rocketတံဂှ်လေဝ်ပန်ရ။ အေနူဂှ်ရ ကလေၚ်ဂတးအာက္ဍိုပ်ရ။ အကာဲအရာဇီုကပိုက်လီုလာ်တံဂှ်တှ်ေ လၟုဟ်ဟွံဂွံမိၚ်ဏီရ။ ကဵုပိုဲဂှ် သ္ၚောဲမံၚ်ညိတှ်ေ သ္ဒးကလေၚ်ဂၠိုက်ဂၠါဲသၟာန်သၟုက်မံၚ်ဏီရ။ သ္ပဒတန်တုဲဟီုဂွံဂှ်တှ်ေ ကၠုၚ်ကဵုက္ၜၚ်ကျာတုဲမှ ဂြာတ်မခတိုဟ်ဂှ်ရ သ္ပဒတန်တုဲဟီုဂွံရဂှ်” ညးသ္ဂးရ။

တုဲကၠုၚ်ဂိတုဂျူလာၚ် စၟတ်တ္ၚဲ ၂၅ဂှ်လေဝ် ပ္ဍဲဒၞါဲပိဒၞါဲ မၞုံပ္ဍဲဂၠံၚ်ကွဳစက် မျေတ်ကျဳနာ-ဗာန်မဝ်ဂှ် ဒပ်ကံၚ်ဇြဳပၞာန်ချဳဒရာၚ်ကၠုၚ်ပရေၚ်ပၞာန်တံကဵု ဂကောံဒပ်ပံၚ်ကောံဒပ်ပၞာန်ဗၠးၜးကောန်ဂကူကချေၚ် KIA တံ က္တဵုဒှ်လဝ်ပေါဲဗ္တိုက်ဗလးတိ ဟွံအောန်နူကဵု ၃ ဝါဏီရ။

ပြဟ်ဟ်ဏံဂှ်လေဝ် ဒပ်ကံၚ်ဇြဳပၞာန်တံ ပ္ဍဲပွိုၚ်ဍုၚ်ဝိုၚ်မဝ် ပ္ဍဲဗ္ဒါဲပွဳူကွာန်နာန်ဇြာန်ယာန်ဂှ် ပွချဳဒရာၚ်ပရေၚ်ပၞာန်တံ ဆက်နွံမံၚ်ဂှ်ရ ပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်မံၚ်ရဂှ် သ္ကိုပ်ဗိုလ်ဇၞော်နဝ်ဗူ ဟီုရ။

“ပြဟ်ဟ်ဏံဂှ်တှ်ေ ပရေၚ်ပၞာန်ၜါလ္ပာ်တံ ဆက်ကြံၚ်မ္ၚိုဟ်မံၚ်ဖိုဟ်မဒှ်ရ။ ပေါဲဗ္တိုက်ဗလးတိတံလေဝ် နွံရ။ လ္ပာ်နာန်ဇြာန်ယာန်ပိုဲတံဂှ်လေဝ် လ္ပာ်ကံၚ်ဇြဳပၞာန်တံ ထ္ပက်မံၚ်ဖိုဟ်မဒှ်ရ။ ပေါဲဗ္တိုက် ဍေံတံကၠောန်ညိညိဂှ်ကဵု ပိုဲတံကလေၚ်ဒုၚ်တံ နွံမံၚ်ရ။ အကာဲအရာကြံၚ်မ္ၚိုဟ်မံၚ် မဒှ်ရ”ဂှ် ညးသ္ဂးရ။

သ္အာၚ်နူဂှ်ပၠန် တုဲကၠုၚ်ဂိတုဂျူလာၚ် စၟတ်တ္ၚဲ ၂၁ အခိၚ်ဗ္တံဂှ်လေဝ် ဟိုတ်နူကံၚ်ဇြဳပၞာန် ဗ္တိုက်ဂြာတ်လဝ်မခတိုဟ် အပ္ဍဲကွာန်နာန်ဇြာန်ယာန်ဂှ်ရ ဒတုံစှ်ေ ဗ္တိုဟ်ထ္ကးအာလဝ် ပ္ဍဲဗ္ဒါဲ ရုၚ်သ္ကိုပ်အုပ်ဓုပ်ကွာန်ကဵု ဘာကျာ်ကာတ်တလေတ်တံဂှ်ရ စမြိုၚ်သရိုဟ်လီုအာတုဲ ဂၠဴပန် ချိုတ်အာလဝ်ရ။

ပ္ဍဲတ္ၚဲအကြာတံဏံ နူကဵုအၚ်ဝဂှ် ဗ္တဝ်အာက္ဍိုပ်လ္ပာ်တွဵုရးကချေၚ်တုဲ မွဲဒမြိပ်ဂၠံၚ်တရဴက္ၜဳဨရာဝတဳဂှ် က္ၜၚ်ပၞာန် မဖ္ဍိုက်နၚ်လွဟ်လက်နက်ပၞာန်ကေုာံ ဇွောံမတံ ၆ ဖ္ဍိုက်ကဵု က္ၜၚ် သွက်ဂွံကေတ်ကဵုဂီုကၠီု ၃ ဖ္ဍိုက်တံ ဒစးတိုန်ကၠုၚ်ရဂှ် ဌာနပရိုၚ်ပ္ဍဲဒေသတံ ထ္မံက်ထ္ၜးလဝ်အိုတ်ရ။

ဟိုတ်နူပွချဳဒရာၚ်ပရေၚ်ပၞာန်ဒပ်ကံၚ်ဇြဳပၞာန်တံ နွံမံၚ်ဂှ်ရ အခိၚ်ဟွံရုဲ ပေါဲဗ္တိုက်တံ က္တဵုဒှ်ကၠုၚ်မာန်တုဲ ညးဍုၚ်ကွာန်တံ သွက်ဂွံစွံသတိတုဲ အာကၠုၚ်ဂှ် ရုၚ်သ္ကိုပ်အုပ်ဓုပ်ခရိုၚ်လာၚ်ဇြာ ကဵုသတိလလောၚ်တြးလဝ် ပ္ဍဲဂိတုဂျူလာၚ် စၟတ်တ္ၚဲ ၄ ဂှ်ရ။

ပ္ဍဲတၚ်လလောၚ်တြးဏံဂှ် ပရေၚ်အာကၠုၚ် ပ္ဍဲမွဲဒမြိပ်ဂၠံၚ်ကွဳစက် ဗာန်မဝ်-မျေတ်ကျဳနာဂှ် ၜိုတ်သ္ပမာန် ညံၚ်သ္ဂောံဝေၚ်ပါဲကဵုတံ မပါလုပ် ဟွံဒေါံဟွံဂွံ ကိစ္စဒးအာကၠုၚ် နကဵုကွဳစက်ကာ၊ ကွဳလိုန်ဓါတ်၊ တရဴတွာ်တံ မံက်ကၠုၚ်မ္ဂး စွံသတိကလၚ်ပရိုၚ်ပရေၚ်ပၞာန်တံတုဲ အာကၠုၚ်အိုတ်ညိဂှ် ကဵုလဝ်သမ္တီရ။

သ္အာၚ်နူဂှ်ပၠန် ညံၚ်ဟွံဂွံအာကၠုၚ် ဒၞါဲကြပ်ကဵုကံၚ်ဇြဳပၞာန်တံ၊ သွက်ဂွံဝၚ်ပါဲကဵု ဒၞါဲဒှ်ပေါဲဗ္တိုက်တံကဵု ဒၞါဲဒှ်ပေါဲဗ္တိုက်လေပ်တံ၊ ညံၚ်ဟွံဂွံပါလုပ်ရီုဗၚ် ဒပ်ကံၚ်ဇြဳပၞာန်တံ နကဵုဇြဟတ်မိၞဟ်ကီု ဇြဟတ်ကပေါတ်တံကီုဂှ်ကဵု ညံၚ်ဟွံဂွံဒးဒုၚ်သ္ပဒၞန်ဂှ်လေဝ် လလောၚ်ပ္တိတ်လဝ်ရ။

ပရိုၚ်-သြၚ်လောန်တိုၚ်မ်

ဗီု-CJ