သၞေဟ်ကၚ်စၟဳစၟတ် မုက်ပြေၚ်(မုပ္ပလၚ်) ဒးဒုၚ်ဗတိုက်လဝ်၊ ပရေၚ်ဇီုကပိုက်ချိုတ်လဝ် သီုၜါလ္ပာ်နွံ

ကျာ်ထဝ်၊ ဂျူလာၚ်(၃၀)

တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ကွာန်မုက်ပြေၚ်(မုပ္ပလၚ်)၊ သၞေဟ်ကၚ်စၟဳစၟတ်ကံၚ်ဇြဳပၞာန် မၞုံတၞုၚ်ဒဒန်သေတ်တောၚ်ဂှ် ဒးဒုၚ်ဗတိုက်လဝ်တုဲ ပေရၚ်ဇီုကပိုက်ဒးချိုတ်လဝ် နွံသီုၜါလ္ပာ်ရဂှ် ဂွံတီကေတ် နူညးဒေသကီု သီုဂကောံဇြဟတ်ပၠန်ဂတးတအ်ရ။

သၞေဟ်ကၚ်စၟဳစၟတ် မ္ၚးနူဒပ်ကံၚ်ဇြဳပၞာန်တုဲ သီုကောန်ဒပ်ဗၠာဲသၟိၚ်ၚ်တအ် ဖျေံလဝ်ဗဒိုပ်ဂှ် ပ္ဍဲဂိတုဂျူလာၚ် စၟတ်တ္ၚဲ (၂၈) အခိၚ်ဒေါဝ်တ္ၚဲ ၜိုတ် (၁)နာဍဳကဝက်ဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA၊ PDF တအ် အာစိုပ်ဗတိုက်လဝ်ကဵု လွဟ်ဇၞော်ဍောတ်ရ။

ဟိုတ်နူပရေၚ်ဗတိုက်ပန်ဏံ ပေါဲဗတိုက်ၜါလ္ပာ် က္တဵုဒှ်လဝ် ဗ္ဒာဲ(၁၅)မိနေတ်တုဲ ပါဲနူဒပ်ကံၚ်ဇြဳပၞာန် လ္ပာ်ဒပ်ပံၚ်ကောံ ဂကောံဇြဟတ်ပၠန်ဂတးတအ်လေဝ် ဇီုကပိုက်ဒးလဝ်ဘဲဝပ် နွံရ။

ပ္ဍဲပေါဲဗတိုက်ဂှ် လ္ပာ်ကံၚ်ဇြဳပၞာန် ဒးချိုတ်လဝ် (၇)တၠတုဲ ဒးလဝ်ဘဲဝပ် (၈)တၠကီု သ္ဂံၚ်လ္ပာ်ဒပ်ပံၚ်ကောံ KNLA (၂)တၠ ဒးလဝ်ဘဲဝပ်ရဂှ် ဂကောံဇြဟတ်ပၠန်ဂတးကျာ်ထဝ် KRF လလောၚ်တြးလဝ် ပရိုၚ်ရ။

ကြဴနူသၞေဟ်ကၚ်စၟဳစၟတ်မုက်ပြေၚ် ဒးဒုၚ်ဗတိုက်လဝ်တုဲဂှ် နူတံဒပ်ကံၚ်ဇြဳပၞာန် ဖျေံသ္ဇိုၚ်တုၚ်ဇြယာတ် ကလိလောန် ပန်ဖျေံလဝ်လွဟ်ဇၞော် ပ္ဍဲကွာန်မၞုံတိဍာ်ထိၚ်ဒဝ် KNU ပွိုၚ်ဍုၚ်ကျာ်ထဝ် ကြာန်န်ရ။

သၞေဟ်ကၚ်စၟဳစၟတ်မုက်ပြေၚ်ကျာ်ထဝ်ဂှ် ပ္ဍဲမွဲကာလဒပ်ပၞာန်သီအဝဵုဏံ ဒးဒုၚ်ဗတိုက်ဒၟံၚ် ခြာဟွံလအ်ဟွံလအ်တုဲ ပ္ဍဲပေါဲဗတိုက်တအ်ဂှ် လ္ပာ်ကံၚ်ဇြဳပၞာန် ဒးဒုၚ်ဂိဒၟံၚ်ရ။

ပရိုၚ် -သြၚ်လောန်တိုၚ်(မ်)

ဗီုရုပ် -CJ