မတ်မလီု၊ ဂျူလာၚ်(၃၀)
အလုံမွဲတွဵုရးဍုၚ်မန် ဟိုတ်နူဗြဲတြိုပ်ဂူစှ်ေအဆက်ဟွံပိုတ်သ္ကုတ်တုဲ သ္ပတံနူဂိတုဂျူလာၚ် စၟတ်တ္ၚဲ (၂၉) အခိၚ်နူဂယးပြဟ်တုဲ ဍာ်ဇၞော်ကီု သီုတိဒဵုလာ် ထပ်က္တဵုဒှ်ဒၟံၚ်ရဂှ် ညးဒေသ သီုဂကောံရီုဗၚ်ဟံၚ်ပြာ်ပရေၚ်မၞိဟ်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဟိုတ်နူဗြဲတြိုပ်ဂူစှ်ေဒၟံၚ်တုဲ ပ္ဍဲပွိုၚ်ဍုၚ်ရေဝ်၊ ဇြပ်ဗု၊ မုဟ်ဍုၚ် ကေုာံ ပွိုၚ်ဍုၚ်ပံၚ် တွဵုရးဍုၚ်မန်တအ်ဂှ် ဍာ်ဇၞော်ကၟိုဟ် က္တဵုဒှ်ဒၟံၚ်တုဲ ညးဍုၚ်ကွာန် မၞုံသ္ကုတ်သဝ်လ္ၚဵု ဒးပြံၚ်ဆုဲလဝ် နဒဒှ်ကာတၟေၚ်ရဂှ် ဂွံတီကေတ်ရ။
ဟိုတ်နူဍာ်ဇၞော်ကၟိုဟ်တုဲ ညးဍုၚ်ကွာန် ကွာန်ဟံၚ်ဂါမ်လ္ၚဵုတအ် ဒးပြံၚ်ဆုဲလဝ် နဒဒှ်ကာတၟေၚ်တုဲ သွက်ဂွံကၠောန်ရေၚ်တၠုၚ် ကမၠောန်ရီုဗၚ်ဟံၚ်ပြာ် နွံဒၟံၚ်ပၟိက်ကဵုဂၠုၚ်ရဂှ် ညးဒေသတအ် ဟီုသ္ဂးလဝ်ရ။
ဟိုတ်နူဍာ်ဇၞော်တုဲ ဂၠံၚ်ကွဳစက် လဂုၚ်-မတ်မလီု မၞုံပွိုၚ်ဍုၚ်ပံၚ် ဍာ်ၜက်လဝ်ကီု၊ ဂၠံၚ်ကွဳစက်ဇြပ်ဗု-မုဟ်ဍုၚ် ပွိုၚ်ဍုၚ်မုဟ်ဍုၚ် ဍာ်ၜက်လဝ်ကီု သ္အာၚ်နူဂှ် ဍာ်လုပ်စိုပ်ကၠုၚ် ပ္ဍဲအရာပ်လေဝ် က္တဵုဒှ်ဒၟံၚ်ရ။
ဟိုတ်နူဗြဲတြိုပ်ဂူစှ်ေ ဇၞော်ကဵုဇြဟတ်တုဲ ပ္ဍဲဒဵုကျာ်ဣသိယဵု မၞုံပွိုၚ်ဍုၚ်ကျာ်ထဝ် တိဒဵုခရိုဟ်လာ်စှ်ေလဝ်တုဲ ဖျာဗၞိက်စုၚ်မွဲဖျာ ဒးလီုလာ်လဝ် မၞိဟ်ဇီုကပိုက်ဒး ဟၟဲရဂှ် ဂွံတီကေတ် နူညးဒေသတအ်ရ။
ပ္ဍဲဂိတုဂျူလာၚ် စၟတ်တ္ၚဲ (၂၈) တုဲကၠုၚ် အခိၚ်ဇိုၚ်သဝ်တ္ၚဲဂှ်လေဝ် ဟိုတ်နူကျာလပှ်စိၚ် လုပ်ကပိုက်လဝ် ပ္ဍဲအရာပ်လှာဒကှ် ပွိုၚ်ဍုၚ်ဇြပ်ဗုတုဲ ဘာဗ္တောန်လိက် သီုကဵုသ္ၚိဒၟံၚ် ဗ္ဒာဲ (၂၀) မ ကၟဳကယျာ ဒးလီုလာ် က္တဵုဒှ်လဝ်ရ။
တွဵုရးဍုၚ်မန်ဂှ် ဂိတုဂျူလာၚ်တုဲကၠုၚ် ပ္ဍဲသတ္တာဟတတိတယဂှ် ဟိုတ်နူဍာ်ဇၞော်ကၟိုဟ် ကေုာံတိဒဵုလာ်စှ်ေ က္တဵုဒှ်လဝ်တုဲ မၞိဟ် (၄)တၠ ပါလုပ်သီုကောန်ၚာ်သၟတ်(၃)တၠ ဗၠိုက်ဍာ် ဒးချိုတ်လဝ်တုဲ ဂွံလဝ်ဘဲဝပ် (၂)တၠကီု မၞိဟ်ဂၠိုၚ်ကဵုလ္ၚီ ဒးပဆုဲပြံၚ်လဝ်ဒၞာဲ နဒဒှ်ကာတၟေၚ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – Social Media/ဗညာအံၚ်မျေတ်ဒူ
sanlontai