ဟိုတ်နူပေါဲဗတိုက်တုဲ ကွာန်မၞုံပွိုၚ်ဍုၚ်ကျောက်ဂျဳ (၄၀) ကွာန်ပြၚ် ဒးပါဲဒၟံၚ်ဘဲပၞာန်

ကျောက်ဂျဳ၊ ဂျူလာၚ်(၃၀)

ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU၊ တိဍာ်ဒပ်မဟာ (၃)၊ ဟိုတ်နူပေါဲဗတိုက် ပ္ဍဲပွိုၚ်ဍုၚ်ကျောက်ဂျဳတုဲ ညးဒေသ ကောန်ဍုၚ်ကွာန် နူကွာန်အပံၚ်လၟိဟ် (၄၀) ကွာန်ပြၚ် ဒးဂြိပ်ဒဴပါဲဓလေတ် ဒၟံၚ်ဗွဲမဂၠိုၚ်ရဂှ် ဗဟဵု KNU လလောၚ်တြးလဝ် ပ္ဍဲဂိတုဂျူလာၚ် စၟတ်တ္ၚဲ (၂၉)ရ။

ပွိုၚ်ဍုၚ်ကျောက်ဂျဳ KNU ဂှ် သ္ပတံနူဂိတုဂျူလာၚ် စၟတ်တ္ၚဲ (၂၅)တုဲကၠုၚ်ဏံ အကြာဒပ်ကံၚ်ဇြဳပၞာန်ကဵု ဒပ်ပၞာန်ဗၠးၜးကောန်ဂကူကရေၚ် KNLA ဒပ်သၟဝ်တဲတံဒပ် လၟိဟ်(၉)တအ် ပေါဲဗတိုက်သ္ကာတ်မြဟ်လဝ် ဗ္ဒာဲကွာန်ခယုမ်ကုမ်ကဵု ကွာန်ယျေတွောန်ကုမ်ရ။

ပ္ဍဲပေါဲဗတိုက်ဂှ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞောန်တုဲ ညးဒေသ နူကွာန် (၄၁) ကွာန်ပါလုပ်သီုကွာန်အေန်ပရိ၊ ကျောၚ်ကုမ်၊ ယျေတွောန်ကုမ်၊ ကာန်ကလေဝ်၊ ဝါချေဝ်၊ ပုၚ်ဇြလုပ်ယွာမ ကေုာံပေါက်ကုမ်တအ် ထောံသ္ၚိဌာန်တုဲ ဒးဂြိပ်ဒဴပါဲဓလေတ်ဒၟံၚ်ရဂှ် ဓမံက်လဝ် ပ္ဍဲတၚ်လလောၚ်တြးရ။

ပၞောဝ်ကဵုကွာန်ဒးဂြိပ်ဒဴပါဲဓလေတ်ဒၟံၚ် (၄၁)ကွာန်ဂှ် ကွာန် (၁၀)ကွာန် လၟိဟ်အိန်ထံၚ် ၁၆၅၅ ဂကောံ၊ လၟိဟ်မၞိဟ် ဗ္ဒာဲ ၈၀၀၀ တၠဟေၚ် ကံက်ကေတ်လဝ်စရၚ်မာန်တုဲ လၟိဟ်အိန်ထံၚ် ကေုာံလၟိဟ်မၞိဟ် နူကွာန်သှ်ေဒၟံၚ်တအ် ဃောကံက်ကေတ်ဒၟံၚ်စရၚ်ရဂှ် KNU ဟီုသ္ဂးလဝ်ရ။

ပ္ဍဲပေါဲဗတိုက်ၜါလ္ပာ်က္တဵုဒှ်လဝ် နူကဵုဂျူလာၚ် စၟတ်တ္ၚဲ (၂၅) စဵုကဵု စၟတ်တ္ၚဲ (၂၆)ဂှ် လ္ပာ်ကံၚ်ဇြဳပၞာန် ဒးချိုတ်လဝ် (၁၅) တၠ ဂွံလဝ်ဘဲဝပ် (၃၀) တၠပြၚ်ကီု သီဂွံလဝ် နူကံၚ်ဇြဳပၞာန် လွဟ် (၇) ဒကိုအ် ကေုာံမကမ်လ္ၚဵုရဂှ် KNU လလောၚ်တြးလဝ်ရ။

ပ္ဍဲပေါဲဗတိုက်ၜါလ္ပာ်ဂှ် ဒပ်ကံၚ်ဇြဳပၞာန် ၜုၚ်တက်ထၞက်စာဲလဝ် ညးဒေသ ညးတြုံ ဒၟံၚ်ကွာန်ယျေတွောန်ကုမ်မွဲတၠတုဲ အခိၚ်ကောန်ဒပ် KNLA တအ် ဂြးတိဍာ် ကလေၚ်ဆဵုလဝ်တုဲ လွဳလွတ်ကဵုဒၟံၚ်ဂဥုဲဖိုဟ်ရဂှ် ဟီုသ္ဂးလဝ်ရ။

ဂိတုဂျူလာၚ် စၟတ်တ္ၚဲ (၁၉)တုဲကၠုၚ်တေံလေဝ် အခိၚ်ဒပ်ကံၚ်ဇြဳပၞာန် လုပ်စိုပ်ကၠုၚ် ပ္ဍဲကွာန်နာန်ဇြဂှ် စံၚ်ဂစိုတ်လဝ် ညးတြုံအာယုက် (၄၅) သၞာံမွဲတၠ ဓဇန်ဓဇန်ကြာန်န်ရဂှ် ဂွံတီကေတ် အတိုၚ်တၚ်လလောၚ်တြး KNU ရ။

ပရိုၚ် -သြၚ်လောန်တိုၚ်(မ်)

ဗီုရုပ် -KNU