သဓီု၊ ဂျူလာၚ်(၃၀)
တွဵုရးဍုၚ်မန်၊ ပွိုၚ်ဍုၚ်သဓီု၊ အကြာကွာန်ချောၚ်ဇြောက်ကဵု ကွာန်မယာမ်ကုန်ဂှ် တ္ၚဲဏံ ဂိတုဂျူလာၚ် စၟတ်တ္ၚဲ (၂၉) သ္ပတံနူ အခိၚ်နူဂယးတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် ပေါဲဗတိုက်ၜါလ္ပာ် က္တဵုဒှ်ဒၟံၚ်ရဂှ် ညးမၞုံအခေါၚ်ဟီုဂး KNU ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သီုတံဒပ်ပၞာန်တိုက်ကံၚ်ဇြဳပၞာန် ခမရ (၉) ဖျေံသ္ဇိုၚ်ပွိုၚ်ဍုၚ်သဓီု ဇြဟတ်ဒပ်ပံၚ် ဗ္ဒာဲ ၁၀၀ ဂှ် နူကွာန်မယာမ်ကုမ်၊ ချောၚ်ဇြောက်၊ ဝေန်ပ ပါ်လဝ်ကရောၚ်ပၞာန် (၃) ကရောၚ်ပၞာန်တုဲ ဟိုတ်နူထ္ပက်လုပ်ကၠုၚ်ပၞာန်ဂှ်ရ ပေါဲဗတိုက်ၜါလ္ပာ် က္တဵုဒှ်လဝ်ရ။
ပြဟ်ဟ်ဏံ ၜိုန်ရပေါဲဗတိုက်ဆေၚ်မုက်ၜါလ္ပာ် ဒှ်လဝ်မွဲဝါဓဝ်ကီုလေဝ် ဟိုတ်နူဟွံတီကေတ် အကာဲအရာဗလးမုက်တိ သောဲသောဲဗြောဲဗြောဲဏီကီု ဆ္ဂး ယဝ်ရလ္ပာ်ကံၚ်ဇြဳပၞာန် ထပ်လုပ်စိုပ်ကၠုၚ်မ္ဂး ပေါဲဗတိုက် သာတုဲသ္ကာတ်မြဟ်ကၠုၚ်မာန်ဒၟံၚ်ရဂှ် ညးနွံအခေါၚ်ဟီုဂး KNU ခရိုၚ်သဓီု ပဒိုဝ်သဝ်အေနိုၚ် ဟီုသ္ဂးလဝ်ရ။
ဟိုတ်နူပေါဲဗတိုက်တုဲ ညးဒေသလ္ၚဵုတအ် ထောံသ္ၚိဌာန်တုဲ ဒးဂြိပ်ဒဴဒၟံၚ် နွံတုဲ ဗွဲမဂၠိုၚ် မၚ်ရံၚ်ဒၟံၚ်အကာဲအရာရဂှ် ဂွံတီကေတ် အတိုၚ်လဟီု ညးဒေသတအ်ရ။
ဂိတုဂျူလာၚ် စၟတ်တ္ၚဲ (၂၇)တုဲကၠုၚ်တေံလေဝ် ဗဒိုပ်ကံၚ်ဇြဳပၞာန် ဖျေံသ္ဇိုၚ်ကွာန်ဝဳယျဝ် ပွိုၚ်ဍုၚ်သဓီုဂှ် နူကဵုဒပ်ပံၚ်ကောံ KNLA တအ် အာစိုပ်ဗတိုက်လဝ်တုဲ ဒၟာနူဒပ်ကံၚ်ဇြဳပၞာန် ပန်ဖျေံလွဟ်ဇၞော် ပ္ဍဲကွာန်တုဲ ညးဒေသ နူကွာန်ထုမ်ဘိုလ် (၁) တၠဒးချိုတ်လဝ်တုဲ ဒးလဝ်ဘဲဝပ် (၆) တၠရ။
ဟိုတ်နူဒပ်ကံၚ်ဇြဳပၞာန်ပန်ဖျေံလွဟ်ဇၞော်တုဲ သ္ၚိဒၟံၚ်ညးဍုၚ်ကွာန် မၞုံကွာန်ဝဳယျဝ် (၁၃) မ၊ ဘာလကျာ် (၂)ဘာ၊ ဗ္ဒမ်ကဵုဂဥုဲ (၁) ဗ္ဒမ်၊ ကွဳစက် (၂) ဖ္ဍိုက် ဒးလီုလာ်လဝ်တုဲ ဂၠဴလ္ၚဵုတအ် ဇီုကပိုက်ဒးချိုတ်လဝ် နွံရဂှ် KNU ခရိုၚ်သဓီု လလောၚ်တြးလဝ်ရ။
ပရိုၚ် -သြၚ်လောန်တိုၚ်(မ်)
ဗီုရုပ် -KNU
sanlontai