ဝၚ်ရော – ဂျူလာၚ်(၂၉)
ရေၚ်တၠုၚ် မၚ်မွဲရံၚ်စံၚ်ကဵုလဝ် ပရေၚ်ထတ်ယိုတ် ကေုာံ လွဳလွတ်ကဵုလဝ်ဂဥုဲ ညးဍုၚ်ကွာန်ပါဲဘဲပၞာန် ပ္ဍဲပွိုၚ်ဍုၚ်ဝၚ်ရော ကေုာံ ပွိုၚ်ဍုၚ်လှာဒကှ် ခရိုၚ်ဒူပလာယာ ဒပ်မဟာ (၆) ဗော်သွးကောန်ဂကူကရေၚ် KNU ရဂှ် KNU လလောၚ်တြးလဝ်ပရိုၚ်ရ။
ပ္ဍဲကွာန်မၞုံပွိုၚ်ဍုၚ်ဝၚ်ရော ဒပ်မဟာ (၆)ဂှ် ဟိုတ်နူကံၚ်ဇြဳပၞာန် ပန်ဖျေံဒၟံၚ်လွဟ်ဇၞော်တုဲ ညးဍုၚ်ကွာန် နူကွာန်ပုလိၚ်၊ ခလေဝ်တခေါန်ဒေၚ် ကေုာံ နံၚ်သုၚ်ထောၚ်တအ် ဗ္ဒာဲ (၄၀၀၀) သ္ပတံနူ ဂိတုဂျောန်တုဲကၠုၚ်တေံ ဒးဂြိပ်ဒဴပါဲဓလေတ်ဒၟံၚ်ရ။
ဂိတုဂျူလာၚ် စၟတ်တ္ၚဲ (၂၇)တုဲကၠုၚ်တေံလေဝ် မွဲကရောံကဵု ဂကောံရီုဗၚ်မၚ်မွဲ ညးပါဲဘဲပၞာန်ဂှ် ဒုရုၚ်ဒေသပၞာန် ဒေသပၞာန် စၟတ်(၃)၊ ရးဒေသသၠုၚ်ကျာ J.O.C တအ် နကဵုအရီုဗၚ်အ္စာဂဥုဲ CDM မၚ်မွဲရံၚ်စံၚ် လွဳလွတ်ကဵုလဝ် ဂဥုဲရဂှ် ဂွံတီကေတ်ရ။
အခိၚ်လၟုဟ်ဏံ ဟိုတ်နူဒှ်အခိၚ်ကသီုဂှ်ရ ညးဍုၚ်ကွာန်ပါဲဘဲပၞာန်တအ် ဒးဆေၚ်ဒၟံၚ်မုက်ကဵု အခက်ခုဲ ပရေၚ်စသုၚ်မံၚ်စံၚ်ကီု ဟိုတ်နူတၚ်နွံပၟိက် စပ်ကဵုပရေၚ်ထတ်ယိုတ် နွံဒၟံၚ်ကီုဂှ်ရ လၟေၚ်ကမၠောန်ပါ်ပရအ်ဇွောံမစၞစ၊ လၟေၚ်ကမၠောန်မၚ်မွဲရံၚ်စံၚ် ပရေၚ်ထတ်ယိုတ်တအ်ဂှ် ဂကောံရီုဗၚ်မၚ်မွဲညးပါဲဘဲပၞာန် ဒေသဝၚ်ရောကီု သီုကဵုဂကောံ ပ္ဍဲဒေသတအ် ရေၚ်တၠုၚ်ကဵုဒၟံၚ်ရ။
ညးဍုၚ်ကွာန်ပါဲဓလေတ်ဘဲပၞာန် နူဂကောံကွာန်ခလေဝ်တခေါၚ်ဒေၚ် ပွိုၚ်ဍုၚ်ဝၚ်ရောတအ်ဂှ် ကောန်ဂကောံ Free Burma Ranger တအ်လေဝ် ရီုဗၚ်ရေၚ်တၠုၚ်ကဵုဒၟံၚ်၊ ညးဍုၚ်ကွာန်ဒးလွဳလွတ်ဂဥုဲတအ်လေဝ် လွဳလွတ်ကဵုဒၟံၚ်၊ ဗ္စဖျုၚ်ကဵုဒၟံၚ် စၞဒှ်အာဟာရတအ်ရဂှ် ဂွံတီကေတ်ရ။
သ္အာၚ်နူဂှ်ပၠန် သွက်ကောန်ၚာ်သၟတ်တအ် ကၠောန်သ္ပကဵုဒၟံၚ် အစဳဇန်ဘဝခိုဟ်ပြဲကီု သီုဟီုကဵုဇြဟတ်စိုတ်လေဝ် ကၠောန်သ္ပကဵုလဝ်ရဂှ် ဌာနလလောၚ်ပရိုၚ် KNU ခရိုၚ်ဒူပလာယာ လလောၚ်တြးလဝ် ပ္ဍဲဂိတုဂျူလာၚ် စၟတ်တ္ၚဲ (၂၇)ရ။
ပ္ဍဲခရိုၚ်ဒူပလာယာ ဟိုတ်နူပေါဲဗတိုက်ဆေၚ်မုက်ၜါလ္ပာ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံပၠန်ဂတးတအ်ကီု ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ကောန်အရာပ်တအ် ဒးဂြိပ်ဒဴပါဲဓလေတ်ဒၟံၚ် ဒၞာဲဌာန်ဗၠးဘဲတုဲ ဟိုတ်နူဒှ်ဒၟံၚ်အခိၚ်ကသီုဂှ်ရ နွံဒၟံၚ်ပၟိက်ကဵု ဒၞာဲဒၟံၚ် ကၟဳဗ္ဒၚ်၊ ယာတ်ခ္ဍံၚ်၊ ယာတ်လ္တက် ကေုာံ ကၞဴ သီုကဵုဇွောံမစၞစ ကေုာံ ဂဥုဲဇဗဆေၚ်စပ်ကဵု ပရေၚ်ထတ်ယိုတ်ရဂှ် ဂွံတီကေတ်ရ။
သွက်ညးဒးပါဲဘဲဓလေတ်ဘဲပၞာန် နူကွာန်ပုလိၚ်၊ ခလေဝ်တခေါန်ဒေၚ်၊ နံၚ်သုၚ်ထောၚ် ပွိုၚ်ဍုၚ်ဝၚ်ရောတအ်ဂှ် ဒုရုၚ်သ္ကိုပ်ဒေသပၞာန်၊ ဒေသပၞာန် လ္ပာ် စၟတ်(၃)၊ ရးသၠုၚ်ကျာ J.O.C ဂှ် ပါ်ပရအ်ကဵုလဝ် သ္ၚုရိုက်၊ ကၠေၚ်၊ ဖၞံစိန်သကှ်၊ နူကဝ်မတဳရီုဗၚ်ကဵုဒၟံၚ် ညးပါဲဘဲပၞာန်ကာတၟေၚ် ဒေသဝၚ်ရောရဂှ် လလောၚ်တြးလဝ် ပ္ဍဲဂိတုဂျူလာၚ် စၟတ်တ္ၚဲ (၁၀)ရ။
ပရိုၚ် -သြၚ်လောန်တိုၚ်(မ်)
ဗီုရုပ် – KNU
sanlontai