ဒဒှ်ရက္ဍိုပ်သ္ကိုပ်ဗဳယာတ်နာမ် မိက်ဂွံဆဵုဂဗဒၟံၚ်ညး ဂျိုဝ်ဗိုၚ်ဒါန်ဟီု

ဝါယှေန်တာန်၊ ဂျူလာၚ်(၃၀)

ပ္ဍဲပေါဲကောံဓရီုကဆံၚ်လ္တူ G20 ကၠောန်ဗဒှ်အာ ပ္ဍဲနယူဒေလဳဂှ် သွက်ဂွံသဳကၠဳပရောပရာ ပရေၚ်ဆက်ဆောံ အမေရိကာန်-ဗဳယာတ်နာမ်ဂှ် က္ဍိုပ်သ္ကိုပ်ဗဳယာတ်နာမ် မိက်ဂွံဆဵုဂဗဒၟံၚ်ကဵုညးရဂှ် သမ္မတဂျိုဝ်ဗိုၚ်ဒါန် ဟီုသ္ဂးလဝ်ရ။

“အဲဂွံလဝ်ဖုၚ်ကဝ် နူဗဳယာတ်နာမ်မွဲကဝ်ရ။ အခိၚ်အာကောံဓရီု G20 တှ်ေ မိက်ဂွံဆဵုဂဗတၞဟ်ခြာလေဝ်။ မွဲကရောံကဵု ရုယှာကြုက်ဂှ် ကဵု အမေရိကာန်လေဝ် မိက်ဂွံသၠုၚ်ပ္တိုန် နဒဒှ်မိတ်ရ”ဂှ် ဂျိုဝ်ဗိုၚ်ဒါန် ဟီုသ္ဂးလဝ်ရ။

ကောံဓရီု ပ္ဍဲဂိတုဂျူလာၚ်မွဲတန်ဂှ် သ္ကိုပ်ဝန်ဇၞော်ဗဳယာတ်နာမ်ကဵု ဝန်ဇၞော်ဍုၚ်သ္အာၚ်အမေရိကာန်တအ် ဆဵုဂဗလဝ်တုဲ အလဵုအသဳဝါယှေန်တာန်ဂှ် သွက်ဂွံဆေၚ်မုက်ကဵု ပရေၚ်ကြုက်ဂၠာဲသၞဂှ် ဂၠာဲဒၟံၚ်နဲကဲဂၠံၚ်ဍာန် ဂွံသၠုၚ်ပ္တိုန် ပရေၚ်ဆက်ဆောံမဟာမိတ် မၞုံပ္ဍဲအာယှလေဝ် ဒှ်ရ။

ရုၚ်ကလုတ်ဗဳယာတ်နာမ် ဖျေံသ္ဇိုၚ်အမေရိကာန်ဂှ် စပ်ကဵုတၚ်သမ္တီဗိုၚ်ဒါန်တုဲ ကလေၚ်ဟီုသှ်ကဵုလဝ် မမိက်ကဵုမွဲမွဲ ဟၟဲရ။

နအလဵုအသဳဝါယှေန်တာန် ညံၚ်ဂွံဒှ်မဟာမိတ်ဗျူဟာစှ်ေစှ်ေ ကရောံဟနွိုၚ်ဂှ် ရေၚ်တၠုၚ်ဒၟံၚ်ရ။ ဗဳယာတ်နာမ်ဂှ် ဒးမံၚ်ဒၟံၚ် နကဵုသတိဇၞော်ကဵုဇြဟတ် ပ္ဍဲအန္တရာယ်ဒစဵုဒစးကဵု ကၟိန်ဍုၚ်ဝုတ်ဒိုဟ် ကြုက်ဇြဟတ်ဇၞော် ထံက်ပၚ်ကဵုဒၟံၚ်ပရေၚ်ပလံၚ်ဗၞိက် ပၠုပ်ဗၞိက် ပၟိက်ကိစ္စဇၞော်ကီု သီုကဵုဍုၚ်ရုယှာ မဒှ်ဒၟံၚ်မဟာမိတ်နူအစေန်ဆက်တမၠာတေံရ။

ပ္ဍဲပရေၚ်ဆက်ဆောံဗဳယာတ်နာမ်ကဵု အမေရိကာန် စုက်လုက်ဗီုဏံဂှ် ပရောပရာလဵု ပါလုပ်ရောဟီုဂှ် ၜိုန်ရညးတာလျိုၚ်တအ် ဟီုဂးလဝ် ဟၟဲလေဝ် သွက်ဂွံသၠုၚ်ပ္တိုန် ပရေၚ်ပံၚ်တောဲကဏ္ဍပရေၚ်ပၞာန် ကေုာံပရေၚ်အမေရိကာန်ထံက်ပၚ် လွဟ်လက်နက် ပါလုပ်မာန်ရောၚ်ဂှ် ညးဆိုက်ဗ္ဒက်တအ် ဟီုသ္ဂးလဝ်ရ။

ဝါယှေန်တာန်ကဵု ကုမ္ပဏဳစဵုဒၞာအမေရိကာန်တအ် ဒဒှ်ရမိက်ဂွံသၠုၚ်ပ္တိုန် ပရေၚ်ထံၚ်ပၚ်လွဟ်လက်နက် ဇရေၚ်ဗဳယာတ်နာမ်ဂှ် ဟီုသ္ဂးလဝ် ကၠးကၠးတၟးတၟးတုဲ ပ္တိတ်ဒၟံၚ်ဇြဟတ် ညံၚ်ဂွံသ္ၚောဲခြာတိတ် နူရုယှာ နဒဒှ်ညးပၠုပ်ကဵုဒၟံၚ် က္ၜၚ်မၚ်ပြၚ်က္ၜဳ ကေုာံက္ၜၚ်ကျာပ္ကတ်ပ္ကေၚ်လေဝ် ဒှ်ရ။

Ref, Reuters