NLD ဟီု ဒဝ်အံၚ်သုကျဳဝွံ ပ္ဍဲအရာသောၚ်ကလးပြသၞာပရေၚ်ဍုၚ်ကွာန် ဍုၚ်ဗၟာဂှ် ဒှ်ပူဂဵုပၟိက်ဇၞော်အိုတ်မွဲရောၚ်ဂး

လ္ဂုၚ်၊ ဂျူလာၚ် (၃၀)

ပ္ဍဲအရာသောၚ်ကလး ပြသၞာပရေၚ်ဍုၚ်ကွာန်ဍုၚ်ဗမာ မက္တဵုဒှ်ကၠုၚ် ဟိုတ်နူတၠအဝဵုပၞာန်မွဲဂကောံ ဝးပ္ကဝ်သၞောဝ်သ္ဇိုၚ်ဒက်ပ္တန်တုဲ သီလဝ်အဝဵုဟွံဗဗွဲဓဝ်ဂှ် ဒဝ်အံၚ်သာန်သုကျဳဝွံ ဒှ်ပူဂဵုပၟိက်ဇၞော်အိုတ် လနုက်ထောံလဝ်ဟွံဂွံရောၚ်ဂှ် ဗော် NLD ဟီုရ။

ပ္ဍဲကဵုကောံဓရီုအခိၚ်ကာလအကြာ ဒုတိယကဝ်မတဳဗဟဵု ဌာန်ဂအုပ်ဒဳမဝ်ကရေဇြဳကောန်ဂကူ မကၠောန်ဗဒှ်လဝ် အလန်ဒုတိယ ပ္ဍဲဂိတုဂျူလာၚ် (၂၉) အခိၚ်နူဂယးဂှ် ဟီုဂးလဝ် သာ်ဏံရ။

ပ္ဍဲကဵုကောံဓရီုဂှ် နကဵုနဲကဲ ၜိုတ်သၟဟ်အစောံ သွက်ဂွံပ္တိတ်ဇြဟတ်ရေၚ်တၠုၚ် ပရေၚ်ဗၠးၜးကောန်ထံၚ်ပရေၚ်ဍုၚ်ကွာန်ဂမၠိုၚ် ပါလုပ်သီုကဵုဒဝ်အံၚ်သာန်သုကျဳ မဒးဒုၚ်ရပ်လဝ် ဟွံဗဗွဲကဵုသၞောဝ်တံ ညံၚ်ဂွံဗၠးၜဗွဲမပြဟ်ဂှ်ကီု၊ ပ္ဍဲအရာဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ အနာဂတ်တေံဂှ် ဒက်ပ္တန်ဓဝ်ပတှ်ေ ကုကောန်ဍုၚ်အရၚ်တံတုဲ သွက်ဂွံပံၚ်တောဲရေၚ်တၠုၚ် မွဲစွံမာန်ဂှ် သၠဲပ္တိုန်ဇြဟတ် ဒက်ပ္တန်ကမ္မတဳကေၚ်ကာကောန်ဍုၚ်အရၚ်တံ ဒှ်တမ် တၚ်သ္ဂုတ်သွာတ် (၇) တၚ်ဂှ် မၞိဟ်ဒစဵုဒစးဟွံမွဲ သ္ပဒတန်မာန်လဝ်ဂှ် ဂွံတီကေတ်ရ။

ကောံဓရီုအခိၚ်ကာလအကြာ ဒုတိယကမ္မတဳဗဟဵု NLD မရနုက်ကဵုအလန်ဒုတိယဂှ် သဘာပတိ (၁) တၠ၊ ကေၚ်ကာဗော်ဗဟဵု (၄၄) တၠ၊ ကေၚ်ကာဗော်အရန် (၁၀) တၠ ၊ ညးရေၚ်တၠုၚ်ဖဵု ရးဒေသဇၞော် ကေုာံ တွဵုရး (၂၀) တၠ ကေုာံ နူကဵုကမ္မတဳကေၚ်ကာဗဟဵု (၁၈) တၠ အပံၚ်ဖအိုတ် (၉၂) တၠ တိုန်စိုပ်လဝ်ဂှ် ဂွံတီကေတ်ရ။

ပ္ဍဲကဵုကောံဓရီုဂှ် ညးလုပ်ဂကောံသဘာပတိ NLD မာန်ဂျဝ်နဳဂှ် ရေၚ်တၠုၚ်လဝ် နဒဒှ်သဘာပတိတုဲ ကောန်ကမ္မတဳဗဟဵု၊ ကမ္မတဳကေၚ်ကာဗဟဵု နူကဵုရးဒေသဇၞော်တၞၚ်သဳ ကေုာံ တွဵုရးနာနာ ပါလုပ်သီုကဵုကမ္မတဳကမၠောန်ဗဟဵုတံဂှ် ပ္တိုန်ထ္ၜးသဳကၠဳလဝ် လိက်ဒုၚ်စဳရေၚ် ရေၚ်တၠုၚ်ကမၠောန်တံ လိက်စံၚ်ကဵုကသပ်တံတုဲ သဳကၠဳလဝ်ရောၚ် ဂွံတီကေတ်ရ။

သ္အာၚ်နူဂှ်ပၠန် သ္ပဒတန်လိက်ဒုၚ်စဳရေၚ်ကမၠောန် ကမ္မတဳဗဟဵုဂှ်တုဲ တၚ်ကဵုကသပ် မပၠောပ်ပ္တိုန်နၚ်တံသီုဖအိုတ်ဂှ် ပ္တိုန်လဝ်စၟတ်သမ္တီ ပ္ဍဲကောံဓရီု ဒုတိယကမ္မတဳဗဟဵု မရနုက်ကဵုအလန်ဒုတိယဂှ် နွံဂှ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီု−Getty Image