ပ္တိတ်သုၚ်စောဲ ဒဝ်အံၚ်သာန်သုကျဳတုဲ ကံၚ်ဇြဳပၞာန် မဂၠါဲအာပၞော်တိတ်လက္ကရဴအိုတ်

နေဗျဳဒဝ်၊ ဂျူလာၚ် (၃၀)

ကံၚ်ဇြဳပၞာန် ညံၚ်ကၟိန်ဍုၚ်ဂွံညိၚ်ဝတ် ထိၚ်လဝ်ဟွံမာန်ဂှ် ပ္တိတ်သုၚ်စောဲ ဒဝ်အံၚ်သာန်သုကျဳ မရပ်ဒက်လဝ်ဂှ်တုဲ ဂၠါဲဒၟံၚ်အကာဲအရာပရေၚ်ဍုၚ်ကွာန်မွဲရောၚ်ဂှ် ညးခါတ်အကာဲပရေၚ်ဍုၚ်ကွာန်တံ သ္ၚဳဂၠိပ်ဒၟံၚ်အိုတ်ရ။

ကံၚ်ဇြဳပၞာန်သီအဝဵုဝွံ ပ္ဍဲဂိတုဂျူလာၚ် သတ္တာဟဒုတိယကဵု ဗွဲကြဴဏံဂှ် ကဵုလဝ်ပူဂဵုလ္ၚဵု အခေါၚ်ဆဵုဂဗ ကုဒဝ်အံၚ်သုကျဳ မဒှ်ပူဂဵုကဵုကသပ်ကၟိန်ဍုၚ် မဒးဒုၚ်ဖျေံလဝ်ထံၚ်ဂှ်တုဲ ပြံၚ်ဆုဲကၠုၚ်လဝ် ပ္ဍဲကဵုသ္ၚိရ။

အာယုက်ကာလကာတၟေၚ် မကေတ်ပပဵုပ္တိုန်လဝ် နကဵုအကာဲအရာဓမ္မတာဟွံသေၚ် ကံၚ်ဇြဳပၞာန်ဂှ်လေဝ် ကြပ်အိုတ်ကၠုၚ်ဒၟံၚ် သိုက်က်ရ။

မွဲလ္ပာ်ပၠန်ဂှ်လေဝ် ဟိုတ်နူပရေၚ်သီအဝဵုတုဲ ပၞာန်ပၠန်ဂတးတဝ်စၞေဟ်ညးဍုၚ်ကွာန် မမံက်ဂတဝ်ကၠုၚ်ဂှ်လေဝ် ညံၚ်ဒပ်ပၞာန် ဂွံကၠေံဗ္ဒန်အာ နူကဵုပရေၚ်ဍုၚ်ကွာန်ဍုၚ်ဗၟာပေၚ်ၚ် ကေုာံ သွက်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳတံဂှ် ညးဍုၚ်ကွာန်တံကဵု အကာဲအရာဗလးတိဏံ အာတ်မိက်ဒၟံၚ်ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် ပ္ဍဲအကာဲအရာလၟုဟ်ဂှ် ဗလးကဵုဒဝ်အံၚ်သာန်သုကျဳတုဲ ၜိုတ်ဆဵုဂဗသဳကၠဳ ကုမၞိဟ်ဆေၚ်စပ်လ္ၚဵုဓဝ်ဂှ် သောၚ်ကလးအကြေပ်အဂြတ်ဍုၚ်ဗၟာ ဟွံမာန်ပုဟ်ဂှ် သ္ၚဳဂၠိပ်လဝ်ရ။

“ဗလးကဵုဒဝ်သုတုဲ ၜိုတ်မၞိဟ်တာလျိုၚ်မဆေၚ်စပ်လ္ၚဵုတံသၟးဂှ် ကဆံၚ်သောၚ်ကလးပြသၞာဍုၚ်ဗမာဏံမာန်ဂှ် ဟွံစိုပ်ဏီပုဟ်။ ဟိုတ်ဂှ်ရ ညအ်ဂှ် ဒးဟီုရိုၚ်ၚ်မ္ဂး ညံၚ်ကောန်ကၠဵုဂွံမိပ် ဆုတ်ထ္ၜးကဵုတုဲ တက်ပလီုထောံဒၟံၚ် တၚ်စၟဳစဂမၠိုၚ်ရ။ သွက်ဂွံဗဂေတ်လှန် ဂကောံဇြဟတ် မိက်ဂွံအာဒၟံၚ်ပရေၚ်ဍုၚ်ကွာန် နူကဵုဂၠံၚ်ဂွံလောဲလောဲတံ၊ ဂကောံဇြဟတ် အာတ်မိက်ဒၟံၚ် ဒေါအ်ကဵုပွပကီုပရာပ်တံညိ၊ ဍုၚ်သ္အာၚ်တံ ကၠောန်ကဵုပေါဲသဳကၠဳတံညိဂှ် နကဵုဍေံတံ သွက်ဂွံဆက်ဗဂေတ်လှန်ဂှ် ဂၠါဲဒၟံၚ်အကာဲအရာမွဲမွဲရောၚ်ဂှ် အဲဒုၚ်ဂိုၚ်ကေတ်ရ” သာ်ဝွံ ညးသ္ဂးရ။

ပ္ဍဲဂိတုဂျူလာၚ် ၂၈ တေံ နူကဵုသၞာဲဒဴဗော် NLD မွဲတၠ ဟီုလဝ်ကဵု ဌာန်ပရိုၚ်ဍုၚ်သ္အာၚ်လ္ၚဵုတံ နူကဵုထံၚ်စာတ် ဒဒှ်ရဆုဲပြံၚ်လဝ် ဒဝ်အံၚ်သာန်သုကျဳ က္ဍိုပ်သ္ကိုပ်ညးဍုၚ်ကွာန် မဒးဒုၚ်ရပ်ဒက်ဖျေံလဝ်ထံၚ် ပ္ဍဲကဵုစမြိုၚ်သ္ၚိဒၟံၚ်သၞာဲဒဴ ကၟိန်ဍုၚ်ိပုၚ်မွဲယျဂှ် ထ္မံက်ထ္ၜးလဝ်ရ။

ဒဝ်အံၚ်သာန်သုကျဳဝွံ ဆဵုဂဗလဝ်ကဵု နာယကဃောန်တဳမျာတ် ကၠတ်ထဝ်ကၟိန်ဍုၚ်ဂှ်တုဲ သွက်ဂွံဆဵုဂဗအာကဵု ညးစၞးတၟေၚ် စပ်ကဵုကေၚ်ကာအာယှ၊ ဌာနဝန်ဇၞော်ကာဍုၚ်သ္အာၚ်ကြုက် တုက်ယှဳကျောန် မစိုပ်ဒၟံၚ်ဍုၚ်ဗၟာဂှ်လေဝ် နွံဒၟံၚ်ဂှ် သၞာဲဒဴဗော် NLD သ္ပဒတန်ဟီုဂးလဝ်ရ။

ညးမၞုံအခေါၚ်ဟီုဂးကံၚ်ဇြဳပၞာန် သ္ကိုပ်ပၞာန်ဇြဝ်မေန်ထောန်ဂှ် တုက်ယှဳကျောန် ညးစၞးတၟေၚ်ကြုက် စပ်ကဵုကေၚ်ကာအာယှဂှ် ဂွံဆဵုဂဗ ကုဒဝ်အံၚ်သာန်သုကျဳဟာ ဟွံဂွံဆဵုဟာဂှ် ထ္မံက်ပ္တိတ်ဟီုဂးကၠုၚ် ချိုတ်တ်ပၠိုတ်တ်ဂှ် ဟွံမွဲဏီရ။

ဒံက်တာလှကျဝ်ဇြဝ် ညးစိုန်သ္ကီု ပရေၚ်ကြုက်−ဗၟာဂှ် ကံၚ်ဇြဳပၞာန် မပ္တိတ်ကၠုၚ်ဇြဟတ် သွက်ဂွံပ္တိတ်သုၚ်စောဲ ဒဝ်အံၚ်သာန်သုကျဳဂှ်ဝွံ လီဠာန်ဒၟံၚ် ညးဍုၚ်ကွာန်တံ အတိုၚ်လၟေၚ်တရဴ တၠအဝဵုပၞာန်ကၠာတေံရဏောၚ်ဂှ် ပါ်ပါဲလဝ်ရ။

“တၚ်ရန်တၟံကံၚ်ဇြဳပၞာန်ဍာံဍာံဂှ် သွက်ဂွံကေမ်ၛှာပ်လဝ် သၞောတ်တၠအဝဵုပၞာန် ဍာ်ဇမၠိၚ်ရဏောၚ်။ အေ ဂှ်တှ်ေ ဓလုထောံမတ်ညးဍုၚ်ကွာန်တံ မွဲလစုတ်။ ညးဍုၚ်ကွာန်တံဂှ် ဆဵုဂဗကဵု ဒဝ်အံၚ်သာန်သုကျဳယျဟီုတှ်ေ ခိုဟ်တိုန်ရဟာ၊ ခိုဟ်တိုန်ရဟာ ညံၚ်ဂွံဒှ်ကၠုၚ်သာ်ဏံဂှ် ကၠောန်ဒၟံၚ်ရ။ ညအ်ဂှ် မုထ္ၜးဒၟံၚ်ရောဟီုတှ်ေ ဍေံတံ သ္ဇက်ဂွံလီဠာန်ညးဍုၚ်ကွာန်တံဂှ် ဟွံမွဲရပုဟ်၊ ဒးကွာ်ဒၟံၚ် အတိုၚ်နဲကဲတြေံတြေံတေံဂှ်မွဲ။ မွဲပၠန်ဂှ် ပ္ဍဲကဵုဍေံတံဂှ် ပရေၚ်ပိုန်ဒြပ်၊ ပရေၚ်ဍုၚ်ကွာန်၊ ပရေၚ်ကလုတ်တမာန်အိုဿီု ဂြုဲဂြေဟ်စှ်ေဒၟံၚ်ကွေံကွေံယျဟီုဂှ် မွဲ။ ထ္ၜးဒၟံၚ် ၜါသာ်ဏံရ။ ဍာံဍာံဂှ် ဒဝ်အံၚ်သာန်သုကျဳဂှ် မိက်ဂွံဗလးမှ ဗလးဏောၚ်၊ ပရိုၚ်ဂမၠိုၚ် ညံၚ်ဂွံဒှ်ဒၟံၚ်ဗီုတေံ ဗီုဏံဂှ် ဍေံတံကၠောန်ဏောၚ်” သာ်ဝွံ ညးသ္ဂးရ။

ဒဝ်အံၚ်သာန်သုကျဳ ညးကဵုကသပ်ကၟိန်ဍုၚ်ဂှ်ဝွံ စနူအခိၚ်သီအဝဵုကလေၚ်မွဲဝါပၠန်တုဲဂှ် ဒးဒုၚ်ရပ်ထိၚ်လဝ်တုဲ ဒးဒုၚ်ဖျေံလဝ်အမိၚ် နူကဵုရုၚ်သၞောဝ်ဓဝ်ကံၚ်ဇြဳပၞာန် ဗွဲတၟေၚ်ဂှ် ဒဏ်ထံၚ် ၃၃ သၞာံ သွက်ဂဗုတ် ၁၉ ဂဗုတ်ရ။

ကလုတ်တမာန်ဍုၚ်သ္အာၚ် ပါလုပ်သီုကဵုအာဇြဳယာန်တံဂှ် ၜိုန်ရဂ္စါန်လဝ် သွက်ဂွံကလိဂွံအခေါၚ် ကုဒဝ်အံၚ်သာန်သုကျဳကီုလေဝ် ကံၚ်ဇြဳပၞာန် ဟွံကဵုလဝ်အခေါၚ်မွဲသာ် ပ္ဍဲကဵုဂိတုဂျူလာၚ် ၉ ဂှ် ဟိုတ်နူဝန်ဇၞော်ကာဍုၚ်သ္အာၚ်ဍုၚ်သေံ ဂွံလဝ်အခေါၚ်ဆဵုဂဗ အလန်ကိုပ်ကၠာအိုတ်ဂှ်ရ ကလုတ်တမာန်ဍုၚ်အာယှလ္ၚဵုတံဂှ် သွက်ဂွံဂွံအခေါၚ်ဆဵုဂဗဂှ် အာတ်မိက်လဝ်ရ။

ညးမၞုံအခေါၚ်ဟီုဂး ရုၚ်သမ္မတ အလဵုအသဳညဳသၟဟ်ဂကူ NUG ဥူကျဝ်ဇြဝ်ဂှ်လေဝ် ပြဝကံၚ်ဇြဳပၞာန်ဝွံ ပ္တိတ်ဒၟံၚ်ဇြဟတ် သွက်ဂွံရပ်စပ်စကာ ဒဝ်အံၚ်သာန်သုကျဳ နဒဒှ်ဂၞန်တုဲ ဟိုတ်နူလၟေၚ်ဒဒှ်ဏံတုဲ  အကြာဂကောံဇြဟတ်ပၠန်ဂတးတံ ဇြဟတ်သ္ဇက်ဂွံဍိုန်လျအာ ဟွံမွဲပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“သွက်ဂွံရပ်စပ် ဒဝ်အံၚ်သာန်သုကျဳ နဒဒှ် Hostage Diplomacy ဂှ် ပ္တိတ်ကၠုၚ်ဇြဟတ်ရ။ နကဵုဍေံတံ သွက်ဂွံကၠောန်ပေါဲသဳကၠဳ နကဵုလစွံစိုတ်ဒးဒးဂှ် ကၠောန်ဟွံသေၚ်ပုဟ်။ အကြာဂကောံဇြဟတ်ပၠန်ဂတးပိုယ်တံ လညာတ်ပါ်ထ္ကးအာညးသ္ကအ်ဟာ၊ အကြာဂကောံဇြဟတ်ပၠန်ဂတးတံကဵု ဍုၚ်သ္အာၚ်တံ ဆီပါ်ထ္ကးအာဟာ၊ ဇြဟတ်ပၠန်ဂတး ယှအ်စှ်ေအာဟာ၊ ဇြဟတ်ဍိုန်လျအာဟာထေၚ်ဂးသာ်ဏံတုဲ ဒှ်သဘဴဂ္စါန်ပ္တိတ်ဒၟံၚ်ဇြဟတ် ကၠောန်ဒၟံၚ်ဂှ် နွံရ။ ဆ္ဂး အကြာဂကောံဇြဟတ်ပၠန်ဂတးတံဂှ် ဟိုတ်ဇြဟတ်ဂွံအောန်အာဂှ် ဟွံမွဲလးလးရ” သာ်ဝွံ ညးသ္ဂးရ။

 ကိုဝ်(လွမ်းသူ) ညးသ္ကိုပ်သ္က ကမ္မတဳက္ဍိုက်ပ်ဗကပ်ဗဗၚ်ညးဍုၚ်ကွာန် ယေန်မာပေန်၊ သာလေန်ကျဳ ကွာန်ပံၚ်ကောံဂှ်လေဝ် နကဵုကံၚ်ဇြဳပၞာန် ရပ်စပ်ဒဝ်အံၚ်သာန်သုကျဳတုဲ ယဝ်ရပြံၚ်ကၠုၚ် ဂၠံၚ်တရဴဆဵုဂဗသဳကၠဳမ္ဂးလေဝ် လုကဴဟွံစိုပ်ကၟိန်ဍုၚ်ပံၚ်ကောံဖေဝ်ဒရာ ညးဍုၚ်ကွာန်တံ မစၟဳလဝ်ဂှ်မ္ဂး ဆက်လုပ်အာပေါဲဗ္တိုက်ဏောၚ်ဂှ် ဟီုရ။

“ယဝ်ရ ရပ်စပ်ဒဝ်အံၚ်သာန်သုကျဳတုဲ ပ္တိုန်ကၠုၚ်လ္တူဂၠံၚ်တရဴ ဆဵုဂဗသဳကၠဳမ္ဂးလေဝ် ပိုယ်တံဂှ် ပေါဲသဳကၠဳပရေၚ်ဍုၚ်ကွာန် မသဳကၠဳအာသၟဝ်သၞောဝ်သ္ဇိုၚ် ၂၀၀၈ လဵုဒှ်ဒှ်၊ အရာသာ်လဵုဒှ်ဒှ် နကဵုဂကောံဇြဟတ်ပၠန်ဂတးပိုယ်တံ ဒစဵုဒစးတုဲ လုကဴကာလဟွံစိုပ်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ မဒုၚ်ကဵုလျိုၚ် အခေါၚ်စၞောန်ပျးအပိုၚ်၊ အခေါၚ်အုပ်ဓုပ်အပိုၚ် ကောန်ဍုၚ်အရၚ်ကောဒေံပိုယ်တံ ဟွံစိုပ်မ္ဂး ပိုယ်တံ ဆက်တုဲ ဒးလုပ်အာပေါဲဗ္တိုက်ဏောၚ်။ မူဟိုတ်ရောတှ်ေ ပၠန်ဂတးဏံဂှ် သွက်ဒဝ်အံၚ်သာန်သုကျဳ ဂွံဗၠးၜး၊ သွက်က္ဍိုပ်သသ္ကိုပ်တၞဟ်ဟ်တံ ဂွံဗၠးၜးသၟးဟွံသေၚ်ပုဟ်။ ညံၚ်သီုညးဖအိုတ် ဂွံဗၠးၜးဂှ်ရ လ္ပာ်ဍေံတံ ပ္တိတ်သုၚ်စောဲကၠုၚ်က္ဍိုပ်သ္ကိုပ်တံ သာ်လဵုဒှ်ဒှ်၊ လုကဴပိုယ်ဟွံဂွံ အရာပိုယ်တံ သၟိက်မိက်ဂွံဂွံဂှ်မ္ဂး ဆက်တုဲ သ္ဂောံလုပ်အာပေါဲဗ္တိုက်ရ နွံ” သာ်ဝွံ ညးသ္ဂးရ။

အပ္ဍဲအခိၚ်သီအဝဵု ပွိုၚ်ၜါသၞာံဘာ်ပြၚ်ဏံ မ္ၚးနူကဵုပေါဲဗ္တိုက်ဆေၚ်မုက်ဗလးတိဏံဂှ် ပ္ဍဲကဵုပရေၚ်ဍုၚ်ကွာန်ကဵု ပရေၚ်ကလုတ်တမာန်တံဂှ် နကဵုကံၚ်ဇြဳပၞာန် မကျဗြံကၠုၚ်ဒၟံၚ်အဆက်က်ဂှ် သွက်ဂွံပ္တိတ်သုၚ်စောဲကၠုၚ် ဒဝ်အံၚ်သာန်သုကျဳဂှ် ယာဒၟံၚ်ဇိုၚ်ရောၚ် ညးခါတ်အကာဲပရေၚ်ဍုၚ်ကွာန်တံ ထံက်ထ္ၜးလဝ်အိုတ်ရ။

ဆ္ဂး အပ္ဍဲအခိၚ်ဒးဒၟံၚ်ထံၚ်စာတ် ကဵုညးစၞးတၟေၚ် ကလုတ်တမာန်ဍုၚ်သ္အာၚ်တံ ဆဵုဂဗဒဝ်အံၚ်သာန်သုကျဳတုဲ ကလေၚ်စုတ်ပ္ဍဲထံၚ်သ္ၚိဂှ်ဝွံ ဒှ်နဲကဲတြေံ တၠအဝဵုပၞာန်အဆက်က်တံ သုၚ်စောဲကၠုၚ်ရောၚ် မဒှ်ရ။

နကဵုဒဝ်အံၚ်သာန်သုကျဳ ကလေၚ်ကွာ်အတိုၚ်ဂၠံၚ်တရဴပ္ညဳပ္ညပ် ကုကံၚ်ဇြဳပၞာန်ဗီုကၠာတေံဟာ ဟွံသေၚ်မ္ဂး ညံၚ်ဒပ်ပၞာန်ဂွံတိတ်စ္ဍးအာ နူကဵုပရေၚ်ဍုၚ်ကွာန်ဍုၚ်ဗၟာဂှ် အာတ်မိက်ဟာဟီုဂှ် သ္ဇက်ဂွံရုဲစှ်နွံမာန်တုဲ နဒဒှ်က္ဍိုပ်သ္ကိုပ် ဂတးလဝ်မုက်လ္ပာ်ညးဍုၚ်ကွာန်လၟိုန်မွဲတၠဂှ်မ္ဂး ပါဗက်ကၠုၚ် လ္ပာ်ညးဍုၚ်ကွာန်ဏောၚ်ဂှ် ညးဍုၚ်ကွာန်တံ စၟဳစဒၟံၚ်အိုတ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media