နေဗျဳဒဝ်၊ ဂျူလာၚ်(၃၀)
ညံၚ်ဗွဝ်ဖျာသွံသ္ၚုက္တဵုဒှ်မံၚ်လၟုဟ်ကဵု ၚုဟ်သ္ၚုသ္ဂောံညိၚ်ဝတ်တုဲ ပ္တိတ်သွံတြးအာကဵု သ္ၚုအရန် ကုမ္ပဏဳပလံၚ်ပ္တိုန်တံ ပ္ကောံပ္ကေဝ်လဝ်တံရောၚ်ဂှ် ဂကောံသြောံသ္ၚုဍုၚ်ဗၟာ လလောၚ်ပ္တိတ်လဝ် ပ္ဍဲဂိတုဂျူလာၚ် စၟတ်တ္ၚဲ ၂၈ ဂှ်ရ။ သ္ၚုအရန်တံဂှ် ပၠုပ်သွံတြးအာပ္ဍဲဗွဝ်ဖျာ ဗွဲမပြဟ်ရောၚ်တုဲ ဗွဲကိုပ်ကၠာ သ္ၚုဍာ်ဒ္ကေဝ်မၞုံကဆံၚ်၂၅တၟံကၠံ ရိုက် ၅၀ ကဳလို ၅၀၀၀ဝဂှ် ပ္တိတ်သွံတြးအာကၠာရောၚ်တုဲ နွံပၟိက်မ္ဂး ထပ်သၠုၚ်ပ္တိုန်သွံတြးအာရောၚ်ဂှ် သ္ဂးလဝ်ရ။
ပွမသွံတြးကဵုသ္ၚုအရန်တံဂှ် ညံၚ်ၚုဟ်သ္ၚုသ္ဂောံညိၚ်ဝတ်ကီု၊ ညံၚ်ညးဍုၚ်ကွာန်ရာန်စသုၚ်တံ သ္ဂောံဒှ်ကပေါတ်ဍာံၚုဟ်ဍာံဂှ်တုဲ နူကဵုကဏ္ဍပုဂ္ဂလိကတံ စဳဇန်အာရောၚ် မဒှ်ရဂှ် ပါလုပ်ပ္ဍဲတၚ်လလောၚ်တြး ဂအုပ်ဂကောံသြောံသ္ၚုဍုၚ်ဗၟာဂှ်ရ။
ဥက္ကဋ္ဌဂအုပ်ဂကောံသြောံသ္ၚုဍုၚ်ဗၟာ ဥူယျေဝ်မေန်အံၚ်ဂှ်တှ်ေ သ္ၚုအရန်သွံတြးအာကဵုတံဂှ် ဖအောန်ဖျေံၚုဟ် နူကဵုၚုဟ်ဗွဝ်ဖျာတံတုဲ သွံတြးအာကဵုရောၚ်မဒှ်တုဲ သွံတြးအာကဵု ညးသွံပရးတံ၊ ညးပလံၚ်ပ္တိုန်ဍုၚ်သ္အာၚ်တံကဵု ရုၚ်စက်နွံပ္ဍဲအပိုၚ်အခြာကွတ်စက်တံရဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ညံၚ်ၚုဟ်ဗွဝ်ဖျာပ္ဍဲဍုၚ်သ္ဂောံညိၚ်ဝတ်တုဲ ပ္တိတ်သွံရောၚ်မဒှ်ရ။ ဒးဟီုမွဲနဲပၠန်မ္ဂးတှ်ေ သွက်ညးဍုၚ်ကွာန်ရာန်စသုၚ်တံဂှ် ဟိုတ်နူဒှ်ၚုဟ်မးဒးရးတံဂှ်ရ ပ္ဍဲအခိၚ်သွံဂှ် ဖအောန်သွံနူကဵု ၚုဟ်ဗွဝ်ဖျာဏောၚ်ဏး။ ချပ်လဝ်ဂှ်တှ်ေ သွံကဵုဆေၚ်သွံပရးတံဏောၚ်။ ဆေၚ်သွံပရးဟီုဂှ် ဆေၚ်နွံမံၚ်ပ္ဍဲအရာပ်တံဂှ်ရ။ ညးတံဂှ်လေဝ် နွံမံၚ်ကဵုညးဍုၚ်ကွာန်တံစုက်အိုတ်ရ။ တုဲမွဲပၠန်ဂှ်တှ်ေ သွံအာကဵုညးပ္လံၚ်ပ္တိုန်ဍုၚ်သ္အာၚ်တံဏောၚ်။ သွံကဵုညးပ္လံၚ်ပ္တိုန်ဍုၚ်သ္အာၚ်တံဂှ်တှ်ေ ညးပ္လံၚ်ပ္တိုန်ဍုၚ်သ္အာၚ်တံဂှ် ဟွံရာန်ပ္ဍဲဗွဝ်ဖျာတံရပုဟ်။ ဟွံရာန်ပ္ဍဲဗွဝ်ဖျာတံရတှ်ေ ပ္ဍဲဗွဝ်ဖျာဂှ် ဇြဟတ်ရာန်အောန်အာတှ်ေ ၚုဟ်စှ်ေရ။ တုဲမွဲပၠန်ဂှ်တှ်ေ ပ္ဍဲရုၚ်စက်နွံပ္ဍဲအပိုၚ်အခြာကွတ်စက်တံ နူကလၚ်ဂှ် ရုၚ်စက်ဇိၚ်ဂၠိက်ယာတ်တံ၊ ရုၚ်စက်ကောန်ကမၠောန်နွံဂၠိုၚ်ၚ်တံ၊ ဂကောံသ္ၚိကၟိန်ကောန်ကမၠောန်တံဂှ် သွံကဵုဏောၚ်။ အေဗီုတံဏံ ချပ်လဝ်အပြောံရ” ဂှ် သ္ဂးရ။
သ္အာၚ်နူဂှ်ပၠန် အစဳဇန်သွံတြးအာကဵုသ္ၚုအရန် ပ္ဍဲဗွဝ်ဖျာတံဂှ်တှ်ေ ပ္ဍဲသတ္တဟကၠုၚ်စိုပ်ဏံ စသွံတြးကဵုအာဏောၚ်တုဲ အကာဲအရာၚုဟ်နှေန်သောဲသောဲဗြောဲဗြောဲကဵု ဗီုပြၚ်သွံတြးအာတံဂှ် ကိုပ်ကၠာနူဟွံဂွံစိုပ်တ္ၚဲသွံတြးဂှ် လလောၚ်တြးအာကဵုရောၚ်ဂှ် ညးဆက်ဟီုရ။
သ္ၚုအရန်သွံတြးအာကဵုတံဂှ် ဟိုတ်နူသွံတြးကဵုအလန်ကၠာအိုတ်ဂှ်ရ နူကဵုဗွဝ်ဖျာလ္ဂုၚ်ဂှ်မွဲကဆံၚ် စသွံတြးအာအလုံဍုၚ်မွဲရောၚ်မဒှ်တုဲ တန်တဴကဵုတၚ်နွံပၟိက်တုဲ ညံၚ်သ္ဂောံဆက်သွံတြးအာမာန် စဳဇန်ရေၚ်တၠုၚ်မံၚ်ရဂှ် ဂအုပ်ဂကောံသြောံသ္ၚုဍုၚ်ဗၟာလလောၚ်ပ္တိတ်လဝ်ရ။
ၚုဟ်သ္ၚုပ္ဍဲဒေသတံဂှ် ကြဴနူလလောၚ်တြး သြန်စက္ခူတၟိ တၞး ၂၀၀၀၀ ကံၚ်ဇြဳပၞာန်တံဂှ်တုဲ သ္ၚုမောဝ် (ပေါ်ဆန်မွှေး)မွဲရိုက်ဂှ် နူကဵုပွဳူ ၈၇၀၀၀ ဒ္ကေဝ်ဂှ် စဵုကဵုဗ္ဒါဲမွဲကိုဋ်ဒ္ကေဝ် ၚုဟ်သၠုၚ်တိုန်ကၠုၚ်လဝ်တုဲ သ္ၚုလုပ်ဂကောံသ္ၚုကြံၚ် သ္ၚု(ဧည့်မထ)ဂှ်လေဝ် မွဲရိုက် စဵုကဵု ၇၀၀၀၀ ဒ္ကေဝ်ပြၚ် ၚုဟ်သၠာ်တိုန်ကၠုၚ်ရ။ ညးစိုန်သကီုကမၠောန်သ္ၚုတံဂှ်တှ်ေ တၚ်လလောၚ်တြးပ္တိတ်သွံ သ္ၚုအရန်တံဂှ် ၚုဟ်သ္ၚုက္တဵုဒှ်မံၚ်လၟုဟ်ဏံ စှ်ေကၠုၚ်ညိညမာန်ကီုလေဝ် ပရေၚ်ပြံၚ်သၠာဲဗွဲမစိုပ်တရဴတံ ဒှ်ကၠုၚ်မာန်ဟွံသေၚ်ပုဟ်ဂှ် သ္ၚဳဂၠိပ်လဝ်ရ။
ပရိုၚ်-သြၚ်လောန်တိုၚ်မ်
ဗီု-CJ
sanlontai