အမေရိကာန် လလောၚ်တြး သွက်ဂွံထံက်ပၚ်လွဟ်လက်နက် ကုထိုၚ်ဝါန် ၚုဟ်မး (၃၄၅) ပြကောဋိကိုဋ် ကာန်ဒဝ်ဠာဂှ် နွံ

ဝါယှေန်တာန်၊ ဂျူလာၚ် (၃၀)

အလဵုအသဳ သမ္မတဗိုၚ်ဒေန် သ္ကိုပ်သ္ကဂှ်ဝွံ စပ်ကဵုအစဳဇန် ထံက်ပၚ်အာ ထိုၚ်ဝါန် ကပေါတ်လွဟ်လက်နက် ၚုဟ်မးမၞုံ (၃၄၅) ပြကောဋိကိုဋ် ကာန်ဒဝ်ဠာဂှ်တုဲ ပ္ဍဲကဵုဂိတုဂျူလာၚ် (၂၈) တေံ လလောၚ်တြးလဝ်ရ။

ကၠတ်ထဝ်ကောန်ဂရိတ်ဂှ် ပ္ဍဲအစဳဇန်သြန်ဘဏ္ဍာ သွက်သၞာံ ၂၀၂၃ ဂှ် သွက်ထိုၚ်ဝါန် မတးပါဲလဝ် ပရေၚ်ပိုၚ်ပြဳအဝဵုအပိုၚ်အခြာကြုက်သ္ကာတ်တ်မြဟ်ဟ်ဂှ် ကဵုလဝ်အခေါၚ် ပရေၚ်ထံက်ပၚ်လွဟ်လက်နက်သမ္မတဂှ် စဵုကဵု (၁) ဗဳလျာန်ဒဝ်ဠာဂှ် ဂွံတီကေတ်ရ။

ကြုက်ဂှ် နကဵုအမေရိကာန် မသွံတြးကဵုဒၟံၚ်လွဟ်လက်နက် ပၟိက်ဇၞော်အိုတ် သွက်ထိုၚ်ဝါန်ဂှ် သွက်ဂွံဒေါအ်ဒေၚ်ကဵု ပရေၚ်သွံတြးလွဟ်လက်နက်ဂှ် အာတ်မိက်ဒၟံၚ်ဂၠိုၚ်ၚ်ကဵုဝါရ။

ပ္ဍဲကဵုအစဳဇန်ဏံဂှ် ၜိုန်ရစၟဳလဝ် ဒရုၚ်ထံၚ်ပရိုၚ်ပန်ဖ္ဍိုက် MQ-9A မသက္ကုလွဟ် သွက်ဂွံပါလုပ်ဂှ်ကီုလေဝ် နူကဵုဒပ်ကျာအမေရိကာန်ဂှ် ဟိုတ်နူညးတာလျိုၚ်တံ ရေၚ်တၠုၚ်ဒၟံၚ် တၚ်နၚ်လစှ်ေ စပ်ကဵုပရေၚ်ပါဲပ္တိတ် ကပေါတ်စက်ကဆံၚ်သၠုၚ်လ္ၚဵုလ္ၚဵု ပ္ဍဲကဵုဒရုၚ်တံဂှ်တုဲ သ္ဂောံပါလုပ်ဂှ် အောန်စှ်ေအာမာန်ရောၚ် ကဵုလဝ်တၚ်စၟတ်ရ။

ဌာနဝန်ဇၞော်ကာစဵုဒၞါထိုၚ်ဝါန်ဂှ် သွက်ကတိကဝတ်ပရေၚ်ဂီုကၠီု မခိုၚ်ကၠိုက်ဂှ်တုဲ ဒဒှ်ရတၚ်ဂုဏ် ကုအမေရိကာန်ဂှ် ထ္မံက်ထ္ၜးစုတ်လဝ် ပ္ဍဲတၚ်လလောၚ်တြးတုဲ ဟိုတ်နူတၚ်တုပ်စိုတ် ၜါလ္ပာ်ကၠိုဟ်စိုတ်ရေၚ်သ္ကအ်ဂှ်တုဲ ကုတၚ်နၚ်ဗွဲလစှ်ေ အစဳဇန်တံဂှ် ကဵုအာတၚ်စၟတ် ဟွံသေၚ်ပုဟ်ဂှ် ဟီုဂးလဝ်ရ။

သ္အာၚ်နူဂှ်ပၠန် ထိုၚ်ဝါန်ဝွံ သွက်ဂွံရာန် က္ၜၚ်ကျာမသက္ကုမၞိဟ်ဒဳပန်ဖ္ဍိုက် မမၚ်ကောပ်ကာဲၜဳမှာသၟိတ် MQ-9B မကၠောန်ပ္တိတ်နူ General Atomics ဂှ် ကၠာတေံ တုပ်လဝ်စိုတ်တုဲ သွက်ဂွံပလံၚ်ကဵု ပ္ဍဲသၞာံ ၂၀၂၅ ဂှ် စဳဇန်လဝ်ရောၚ် ဂွံတီကေတ်ရ။

ဍုၚ်ထိုၚ်ဝါန် မအုပ်ဓုပ်ဒၟံၚ် နကဵုသၞောတ်ဒဳမဝ်ကရေဇြဳဂှ် ကြုက် ညာတ်ကေတ် နဒဒှ်တွဵုဒၞက်ဍေံအပိုၚ်တုဲ အပ္ဍဲပွိုၚ်ပိသၞာံလောန်ကၠုၚ်တေံ ပ္ဍဲကဵုလ္တူတ္ကအ်ဂှ် ပရေၚ်ကဵုဇြဟတ်ဂရိုဟ် စပ်ကဵုပရေၚ်ပၞာန်တံ သၠဲလးတိုန်ကၠုၚ်လဝ်ရ။

တ္ကအ်ဏံ ညံၚ်ဂွံစိုပ် သၟဝ်ထိၚ်ဒဝ်ကြုက်ဂှ် ပွမရပ်စပ်စကာဇြဟတ်တံဂှ်လေဝ် အခါလဵုမှဗလးအာတဲဟွံသေၚ်ပုဟ်ဂှ် သ္ဂးလဝ်တုဲ ထိုၚ်ဝါန်ဂှ် အဝဵုအပိုၚ်အခြာကြုက်ဂှ် ကယျာန်ပါဲလဝ် သ္ကာတ်တ်မြဟ်ဟ်တုဲ ဂကူထိုၚ်ဝါန်တံဟေၚ် သ္ဂုတ်သွာတ် အနာဂတ်ညးတံမာန်ဂှ် ဟီုဂးလဝ်ရ။

ပ္ဍဲဂိတုမေ (၁၆) တေံ ဝန်ဇၞော်ကာစဵုဒၞါအမေရိကာန် လွိုၚ်အဝ်သတေန်ဂှ် “ခြာဟွံလအ်ဏံ အမေရိကာန်ဝွံ နူကဵုအခေါၚ်အဝဵုသမ္မတမွဲကဆံၚ် နူကဵုကၠတ်ထဝ်ကောန်ဂရိတ် မကဵုအာအခေါၚ်ဂှ် ကဵုအာအရီုဗၚ်ပရေၚ်ဂီုကၠီု ကုထိုၚ်ဝါန်ဏောၚ်ဂှ် မိပ်တဴစိုတ်ရ” သာ်ဝွံ ဟီုဂးလဝ် ပ္ဍဲကဵုကောံဓရီုကၠတ်ထဝ်ကဆံၚ်လ္တူ မကၠောန်ဗဒှ်လဝ်ဂှ်ရ။

နကဵုအမေရိကာန် ကေုာံ မဟာမိတ်တံဂှ် သွက်ဂွံစဵုဒၞါတ္ကအ်ဏံဂှ် အပ္ဍဲသၞာံကၠုၚ်စိုပ်တံဏံ သွက်ဂွံသၠုၚ်ပ္တိုန်အသိၚ် ပရေၚ်ပလံၚ်ပ္တိုန်လွဟ်လက်နက်တံဂှ် နွံပၟိက်ရောၚ် သ္ကိုပ်ဗိုလ်ဇၞော်ကဆံၚ်လ္တူ အမေရိကာန် ဟီုဂးလဝ် ပ္ဍဲဂိတုဏံ အခိၚ်ပြဟ်ဟ်တေံဂှ်ရ။

သွက်ဂွံကဵုအရီုဗၚ်ပရေၚ်ဂီုကၠီု ကုဍုၚ်ယူကရုၚ် ဗွဲမပြဟ်ဂှ်တုဲ နူကဵုပိုန်ဒြပ်US၊ (PDA) အခေါၚ်သမ္မတ လှဲပြံၚ်နွံဂှ် သုၚ်စောဲလဝ် နဒဒှ်သ္ဇိုၚ်ကာတၟေၚ်တုဲ PDA ထိုၚ်ဝါန်ဂှ် ဒှ်အခေါၚ်အဝဵု ပၟိက်ဇၞော်ဟွံသေၚ် မသ္ပဒတန်လဝ် ပ္ဍဲကၠတ်ထဝ်ကောန်ဂရိတ် သၞာံတုဲတေံဂှ် ဂွံတီကေတ်ရ။

Ref; Reuters