ဘာအၚ်၊ အဝ်ဂေတ်(၁)
သၞေဟ်ကၚ်စၟဳစၟတ်ဒဒန်သြၚ်လောန်(ဘာအၚ်) ပွိုၚ်ဍုၚ်ဘာအၚ် တွဵုရးကရေၚ် ပရိုၚ်တိတ်ဒၟံၚ် စၟဳစၟတ်သ္ကာတ်မြဟ်ဒၟံၚ်ဂှ် ဟိုတ်နူဗုမ်ကွဳစက် ပါ်ခတိုဟ်တုဲ ကောန်အရာပ် (၁) တၠ ဒးချိုတ်လဝ်တုဲ ဟွံအောန်နူ (၁၀) တၠ ဒးလဝ်ဘဲဝပ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တ္ၚဲဏံ ဂိတုဂျူလာၚ် စၟတ်တ္ၚဲ (၃၁) အခိၚ်နူဂယး ၜိုတ် (၆) နာဍဳကဝက်ဂှ် ပ္ဍဲသၞေဟ်ကၚ်စၟဳစၟတ် ဒဒန်သြၚ်လောန်(ဘာအၚ်)၊ ဃောဒပ်ကံၚ်ဇြဳပၞာန်၊ ဗၠာဲသၟိၚ် ကေုာံ ဗၠာဲသၟိၚ်ထိၚ်ယာန်တအ် ဗဒေါံဒၟံၚ်ကွဳစက်အာတရဴဂှ် ဗုမ်ကွဳစက်ပါ်ခတိုဟ်လဝ်ရ။
ဟိုတ်နူကွဳဗုမ်ကွဳစက်ပါ်ခတိုဟ်တုဲ ကောန်အရာပ်မွဲတၠ ဒးချိုတ်တုဲ ဒပ်ကံၚ်ဇြဳပၞာန်ကေုာံ ဗၠာဲသၟိၚ် (၇) တၠကီု သီုကောန်အရာပ် ဟွံအောန်နူ (၁၀) တၠ ဒးလဝ်ဘဲဝပ်ရ။
ညးဇီုက်ပိုက် ဒးလဝ်ဘဲဝပ်တအ်ဂှ် ပလံၚ်ဗစိုပ်ဏာ ရုၚ်ဂဥုဲဒပ်ပၞာန် ဇံၚ် ၁၀၀ မၞုံဍုၚ်ဘာအၚ် နအရီုဗၚ် ဂကောံရီုဗၚ်ဟံၚ်ပြာ် ပရေၚ်မၞိဟ်တအ်ရဂှ် ဂွံတီကေတ်ရ။
ပ္ဍဲပရေၚ်ဒဒှ်မာၚ်ကွဳစက် ပါ်ခတိုဟ်လဝ်ဏံ ကွဳစက် သီုကွဳလိုန်ဓာတ် ဟွံအောန်နူ (၅) ဖ္ဍိုက် ဇီုကပိုက်ဒးလီုလာ်လဝ်တုဲ ပါဲနူဗဒမ်ကောန်ဒပ်ကံၚ်ဇြဳပၞာန်စၟဳစၟတ်ဒၟံၚ်ဂှ် ဂၠံၚ်ကွဳစက်လ္ၚဵုလေဝ် ဇီုကပိုက်ဒးလီုလာ်လဝ်နွံရ။
ဟိုတ်နူသ္ကုတ်ဂၠံၚ်ကွဳစက်လ္ၚဵု ဇီုကပိုက်လီုလာ်လဝ်ဂှ်ရ ပ္ဍဲတ္ၚဲဂှ် သ္ပတံနူ အခိၚ်ဒေါဝ်တ္ၚဲ ၜိုတ် (၄)နာဍဳတုဲ ၜိုန်ရကဵုလဝ်အခေါၚ် ကွဳစက်အာတရဴအဇာဍောတ် တတ်ကၠောံအာကၠုၚ်ကီုလေဝ် ပိုၚ်ခြာလဝ်အခေါၚ် ကွဳစက်ပ္ဍိုက်ဗၞိက်တအ် တတ်ကၠောံအာကၠုၚ်ရဂှ် ဂွံတီကေတ် နူညးအာတရဴတအ်ရ။
သၞေဟ်ကၚ်စၟဳစၟတ် ဒဒန်သြၚ်လောန်(ဘာအၚ်)ဂှ် ပါဲနူတၞးကာဒ်ကောန်ဍုၚ် ညးဍုၚ်ကွာန်အာတရဴတအ်တုဲ သ္ပတံနူဖုၚ်တဲ စၟဳစၟတ်ဒၟံၚ်၊ အာတ်မိက်ဒၟံၚ်သြန် လောန်ၜက်နူသၞောတ်ဗ္ၜတ်တုဲ မ္ၚးနူဂှ်ဟိုတ်နူရပ်ဒၟံၚ် ကောန်အရာပ်ညးဍုၚ်ကွာန် ခြာဟွံလံဟွံလံဂှ်ရ သၞေဟ်ကၚ်စၟဳစၟတ် ပရိုၚ်ပရေံ မံက်တိတ်ဒၟံၚ်မွဲသၞေဟ်လေဝ် ဒှ်ရ။
ပရိုၚ် -သြၚ်လောန်တိုၚ်(မ်)
ဗီုရုပ် -Social Media
sanlontai