ပ္ဍဲမျာၚ် ကံၚ်ဇြဳပၞာန်သ္ပဒၞန်ညးဍုၚ်ကွာန် ရပ်ဒက်ပြိုက်ဂစိုတ်ဒၟံၚ် နွံ

မျာၚ် – အဝ်ဂေတ်(၁)

ရးဒေသမဂွေ၊ ပွိုၚ်ဍုၚ်မျာၚ် ဒပ်ပံၚ်တောဲကံၚ်ဇြဳပၞာန်ကဵု ပျူသဝ်ထဳတအ် ထ္ပက်ဒၟံၚ်ကရောၚ်ပၞာန်တုဲ ကၠောန်သ္ပဒၟံၚ် ပရေၚ်ရပ်ဒက်နဒဒှ်ဒၞန် ပြိုက်ဂစိုတ်ဒၟံၚ် ညးဍုၚ်ကွာန်တအ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

သ္ပတံနူ ဂိတုဂျူလာၚ် စၟတ်တ္ၚ (၂၆)တုဲ ကရောၚ်ပၞာန် ဇြဟတ်နွံ ၜိုတ် (၆၀) စိုပ်ကၠုၚ်ကွာန်အိုၚ်မတုဲ ထပ်ဗပေၚ်လဝ်ဇြဟတ်နွံဒၟံၚ်ရဂှ် ဟီုသ္ဂးလဝ်ရ။

“ပြဟ်ဟ်ဏံ ကရောၚ်ပၞာန်ဂှ် လုပ်အာကွာန်ပျူ တွောန်မ ယျ။ စံၚ်ပလီုလဝ် ကွဳစက်မွဲဖ္ဍိုက်တုဲ တၠဝေဒနာစိုတ်မွဲတၠဂှ်လေဝ် ပန်ဂစိုတ်လဝ် ပ္ဍဲသ္ၚိကဴရ။ ပျူတအ်လေဝ် လုပ်ကၠုၚ်ကွာန်တုဲ ကြာန်ဒမာန်ဒၟံၚ်ရ”ဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

သ္အာၚ်နူဂှ်ပၠန် ညးဒးဒုၚ်ရပ်ဒက်ပြိုက်ဂစိုတ်လဝ်ကဵု ကံၚ်ဇြဳပၞာန်ဂှ် ဒှ်ကိုဝ်နေအောၚ် အာယုက်(၃၇) နူကွာန်ပါန်တိုၚ်တဝ်တုဲ ကွဳစက်မွဲဖ္ဍိုက် သီုကွဳလိုန်ဓာတ် ဂကောံပၠန်ဂတးတအ်ဂှ်လေဝ် စံၚ်ပလီုဏာလဝ်ရဂှ် ဓမံက်လဝ် ပ္ဍဲမုက်လိက်ဇာနှိက်ပရေၚ်မၞိဟ် မဓမံက်ထ္ၜးဒၟံၚ် ပရိုၚ်ပၠန်ဂတးဒေသဂှ်ရ။

သ္အာၚ်နူဂှ်ပၠန် ဂိတုဂျူလာၚ် စၟတ်တ္ၚဲ (၂၆)ဂှ် ရပ်ကေတ်လဝ် ညးဍုၚ်ကွာန် ဒၟံၚ်ကွာန်အိုၚ်မ (၇)တၠ သ္ပလဝ် နဒဒှ်ဒေၚ်ဒုၚ်ဒၞာမၞိဟ်တုဲ ပ္ဍဲစၟတ်တ္ၚဲ (၂၈)ဂှ် ကလေၚ်ဗလးကဵုလဝ် (၅)တၠရဂှ် ဂွံတီကေတ်ရ။

လၟုဟ်ဏံ သွက်ဂွံထပ်ဗပေၚ်ဇြဟတ် ကရောၚ်ပၞာန်ဂှ် ကောန်ဒပ်ကံၚ်ဇြဳပၞာန် ၜိုတ် (၅၀) စိုပ်ကၠုၚ်ဒၟံၚ် ဗ္ဒာဲကွာန်ကုမ်တုဲ ကရောၚ်ပၞာန်တိတ်နူကွာန်အိုၚ်မဂှ် လုပ်အာကွာန်တွောန်မပျူရဂှ် ဂွံတီကေတ်ရ။

ပ္ဍဲဂိတုဂျူလာၚ် စၟတ်တ္ၚဲ(၂၉)တုဲတေံလေဝ် ပျူသဝ်ထဳ နူကွာန်ပျူ ကာန်နဳတအ် လုပ်စိုပ် ဂၟာဲဂၠာဲလဝ် ပ္ဍဲကွာန်လေတ်ထုပ်တဝ်တုဲ စံၚ်ပလီုဏာလဝ် သ္ၚိဒၟံၚ် (၃)မတုဲ ပၠံၚ်ၜးကေတ်ဏာလဝ် ဂၠဴ(၆) သီုကွဳလိုန်ဓာတ် (၇)ဖ္ဍိုက်ရဂှ် ညးဒေသတအ် ဟီုသ္ဂးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – ပရေၚ်ပၠန်ဂတးက္ညၚ် ဍုၚ်မျာၚ်