နေဗျဳဒဝ်၊ ဩဂါတ်
နူကဵုကောံဓရီု ပရေၚ်စဵုဒၞါကောန်ဂကူ ကေုာံ ကံၚ်ဇြဳဂီုကၠီုဂှ် ကံၚ်ဇြဳပၞာန် ကေတ်လဝ်အဝဵုကၟိန်ဍုၚ် နကဵုဇြဟတ်လွဟ်လက်နက်ဂှ် ထပ်ပပဵုပ္တိုန်လဝ် အာယုက်ကာလကာတၟေၚ် စဵုကဵု ၄ ဝါတုဲ ဆက်ကေတ်လဝ်အဝဵုရဂှ် တ္ၚဲဏံ ပ္ဍဲအခိၚ်သဝ်တ္ၚဲဂှ် နူကဵု MRTV တြးဝါဒဂှ် လလောၚ်တြးလဝ်ရ။
ကောံဓရီု ပရေၚ်စဵုဒၞါကောန်ဂကူကေုာံ ကံၚ်ဇြဳဂီုကၠီု ကော်ကၠောန်ဗဒှ်လဝ် တ္ၚဲဏံ ဂိတုဂျူလာၚ်၊ စၟတ်တ္ၚဲ (၃၁)ဂှ် ဒုသမ္မတ ၂ ဥူဟေန်နရဳထဳယူ တိုန်စိုပ်လဝ်တုဲ ကြဴနူကောံဓရီုတုဲဂှ် သမ္မတယာယဳ ဥူမျေတ်ဇြိုဲ ကံၚ်ဇြဳပၞာန်ခါန်ကၞက်လဝ်ဂှ် ထပ်ပပဵုကဵုလဝ် အာယုက်ကာလကာတၟေၚ် ၆ ဂိတုပၠန်ရ။
ဟိုတ်ဂှ်ရ သ္ပပ္တံနူဂိတု သြဂါတ် စၟတ်တ္ၚဲ(၁) စဵုကဵု သၞာံ ၂၀၂၄ ဂိတုဂျာန္နဝါရဳ စၟတ်တ္ၚဲ (၃၁)ဂှ် ကံၚ်ဇြဳပၞာန်တံ ဆက်ဂွံအခေါၚ်အုပ်အဝဵုကၟိန်ဍုၚ်နာနာသာ်တုဲ ကံၚ်ဇြဳပၞာန်တံ သီအာအဝဵုကၟိန်ဍုၚ် လလအ်ပွိုၚ် ၃ သၞာံရောၚ်မဒှ်ရ။
မွဲလ္ပာ်ပၠန်ဂှ်လေဝ် ကိုပ်ကၠာဟွံဂွံကော်ကေတ် ကောံဓရီုကာလုံဂှ် ကုပူဂိုလ်လ္ၚဵုတံဂှ် ကဵုလဝ်အခေါၚ်ဆဵုဂဗ ကုဒဝ်အံၚ်သာန်သုကျဳ မရပ်ဒက်လဝ်ဂှ်တုဲ နူကဵုထံၚ်စာတ်ဂှ် ပဆုဲပြံၚ်လဝ်ပ္ဍဲသ္ၚိဒၟံၚ်တံရဂှ်လေဝ် ပရိုၚ်တိတ်လဝ်ရ။
ပ္ဍဲသၞာံ ၂၀၂၁ ဂိတုဖေဖဝ်ဝါရဳ စၟတ်တ္ၚဲ ၁ ဂှ် ဒပ်ပၞာန်တံ ရပ်ဒက်က္ဍိုပ်သ္ကိုပ်ကၟိန်ဍုၚ်တံတုဲ လ္ဂောံကဵု သၞောဝ်သ္ဇိုၚ်ဒက်ပ္တန် ၂၀၀၈ ၝောံပိုဒ် ၄၁၇ ဂှ် ကော်ကေတ်ကောံဓရီု ပရေၚ်စဵုဒၞါကောန်ဂကူ ကေုာံ ကံၚ်ဇြဳဂီုကၠီုတံတုဲ ကြဴနူလလောၚ်တြးကၟိန်ဍုၚ် နဒဒှ်အကာဲအရာကာတၟေၚ်တုဲဂှ် သၠဲပြံၚ်ကေတ်လဝ်အဝဵု မွဲသၞာံရ။
နူဂှ်မွဲကဆံၚ် လ္ဂောံကဵုသၞောဝ်သ္ဇိုၚ်ဒက်ပ္တန် ၂၀၀၈ ၝောံပိုဒ် ၄၂၅ဂှ် အာယုက်ပပဵုပ္တိုန်ဂွံ မွဲဝါ ၆ ဂိတုဂှ် ကံၚ်ဇြဳပၞာန်တံ ကြဴနူပပဵုပ္တိုန် စဵုကဵု ၃ ဝါတုဲဂှ် ထပ်ပပဵုပ္တိုန်အာယုက်ကာလကာတၟေၚ်ဗီုလၟုဟ်ပၠန်ရ။
အခက်အခုဲပရေၚ်ဍုၚ်ကွာန်ဂှ်တှ်ေ နကဵုကံၚ်ဇြဳပၞာန်တံ ကြဴနူပပဵုပ္တိုန်အာယုက်ဗီုလၟုဟ်ဏံတုဲဂှ် ကုကောန်ဂကောံကံၚ်ဇြဳပၞာန်တံကဵု ပူဂိုလ်သၞာဲဒဴအလဵုအသဳတံဂှ် ဆက်ကၠောန်သ္ပအာအပြံၚ်အလှာဲရောၚ်ဂှ် သ္ၚဳဂၠိပ်လဝ်ရ။
သ္အာၚ်နူဂှ်ပၠန် ပ္ဍဲကောံဓရီုကၠောန်သ္ပလဝ် ပ္ဍဲဂိတုဂျူလာၚ် စၟတ်တ္ၚဲ ၃၀ ဂှ် က္ဍိုပ်သ္ကိုပ်ပၞာန်ဂှ် သွက်ပရေၚ်ဂီုကၠီု၊ ပရေၚ်ညိၚ်ဝတ်ကေုာံ ပရေၚ်အုပ်လဒံသၞောဝ်ဥပဒေတံဂှ် သ္ဇက်ဂွံကဵုဖျုန်ရေၚ်တၠုၚ်ဂှ် နွံမံၚ်ဏီရဂှ် ဟီုလဝ်ဂှ်ရ နကဵုဒပ်ပၞာန်တံ ၜိုတ်သၟဟ်အစောံ သၠုၚ်ပ္တိုန်အာပရေၚ်ပၞာန်ရောၚ်ဂှ်လေဝ် ညးခါတ်အကာဲ ပရေၚ်ပၞာန်တံ ထံက်ထ္ၜးလဝ်အိုတ်ရ။
လ္ဂောံကဵုသၞောဝ်သ္ဇိုၚ်ဒက်ပ္တန် ၂၀၀၈ ၝောံပိုဒ် ၄၂၅ ဂှ်မ္ဂး သ္ကိုပ်စၞောန်ပ္ညုၚ် ပရေၚ်စဵုဒၞါဒပ်ပၞာန်ဂှ် တာလျိုၚ်ဇိုန်ပအပ်လဝ်ကဵုညးဂှ် ညံၚ်သ္ဂောံတုဲ ရေၚ်တၠုၚ်ကဵုဟွံမာန်ဏီဂှ်ရ ညံၚ်သ္ဂောံပပဵုပ္တိုန်ကဵု အခိၚ်အပိုၚ်အခြာစၟတ်လဝ်တံဂှ် ပ္တိုန်ထ္ၜးကၠုၚ် ဟိုတ်ဖဵုမ္ဂး ဗွဲဓမ္မတာ မွဲအလန်စဵုကဵု ၆ ဂိတုဂှ် ပပဵုပ္တိုန်ကဵုမာန် ၂ ဝါရဂှ် ထ္မံက်ထ္ၜးလဝ်ရ။
ပ္ဍဲကောံဓရီုကာလုံ တုဲကၠုၚ်ဏံဂှ်တှ်ေ ဟိုတ်နူပ္တိုန်ထ္ၜးလဝ် ကၟိန်ဍုၚ်အကာဲအရာဓမ္မတာဟွံသေၚ်ဂှ်ရ နူကဵုကောံဓရီုကာလုံဂှ် ကြဴနူပပဵုပ္တိုန်ကဵုအာယုက်ကာလကာတၟေၚ်တုဲဂှ် ကံၚ်ဇြဳပၞာန်တံ ကုပွိုၚ်ဍုၚ်အပံၚ် ၄၀ ပွိုၚ်ဍုၚ် မၞုံပ္ဍဲ ရးကေုာံတွဵုရး ၈တံဂှ် လလောၚ်တြးလဝ် ပရေၚ်အုပ်ဓုပ်ပၞာန်ရ။
ပြဟ်ဟ်ဏံဂှ်တှ်ေ ပေါဲဗ္တိုက်ရပ်လွဟ် ဒစဵုဒစးသၞောတ်တၠအဝဵုပၞာန်တံ ဇြဟတ်သ္ဂောံဍိုန်စှ်ေအာ ဟွံမွဲမွဲသာ် သာတုဲဇြဟတ်ခိုဟ်ကၠုၚ်တုဲ နကဵုကံၚ်ဇြဳပၞာန်တံဂှ် မ္ၚးနူဂကောံဇြဟတ်ပၠန်ဂတးတံဂှ် ကုဂကောံရပ်လွဟ်ကောန်ဍုၚ်အရၚ် လ္ၚဵုတံဂှ်လေဝ် ဒးဆေၚ်မံၚ်မုက် ပေါဲဗ္တိုက်ဗလးတိရ။
ပရိုၚ်-သြၚ်လောန်တိုၚ်မ်
ဗီု-MOI
sanlontai