ဟိုတ်နူပေါဲဗ္တိုက်သဓီုတုဲ ညးဒေသဂၠိုၚ်ကဵုလ္ၚီ ဒးပါဲဒဴဒၟံၚ်ဘဲပၞာန်

သဓီု၊ အဝ်ဂါတ် (၁)

ဟိုတ်နူပေါဲဗ္တိုက်ၜါလ္ပာ် မက္တဵုဒှ်ဒၟံၚ် အပ္ဍဲပွိုၚ်ဍုၚ်သဓီု တွဵုရးဍုၚ်မန်ဂှ်တုဲ ညးဒေသဂၠိုၚ်ကဵုလ္ၚီ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရောၚ် ညးတာလျိုၚ် ခရိုၚ်သဓီု KNU တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

စနူဂိတုဂျူလာၚ် ၂၉ တုဲကၠုၚ်တေံတုဲ ဟိုတ်နူဒပ်ကံၚ်ဇြဳပၞာန် ထ္ပက်လဝ်ကရောၚ်ပၞာန် အပ္ဍဲပွိုၚ်ဍုၚ်သဓီုဂှ်တုဲ အကြာဒပ်ပၞာန်ဗၠးၜးကောန်ဂကူကရေၚ် KNLA တံဂှ် လၟေၚ်ဒဒှ်တ္ၚဲ ပေါဲဗ္တိုက်တံ က္တဵုဒှ်ဒၟံၚ် အဆက်က်ရ။

အပ္ဍဲပေါဲဗ္တိုက်တံဏံဂှ် ဟိုတ်နူပရေၚ်ဗ္တိုက်ပန်ပှော်လွဟ်ဇၞော် ဒပ်ကံၚ်ဇြဳပၞာန် အပ္ဍဲကွာန်ဂမၠိုၚ်တုဲ ညးဒေသ နူကဵုကွာန် (၇) ကွာန် မပ္တံကဵုကွာန်မယာန်ကုန်၊ ချံၚ်သံက်၊ မိချံၚ်အိုၚ်တံ ဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ်ရ။

ညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ်ဂမၠိုၚ်ဝွံ ဟိုတ်နူဒှ်ဒၟံၚ်အခိၚ်ကသီုတုဲ မ္ၚးနူဒၞါဲမံၚ်၊ ဇွောံမစၞစ၊ ဂဥုဲဇဗတံဂှ် နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံရောၚ်ဂှ် ညးအုပ်ကာခရိုၚ်သဓီု KNU ပဒိုဝ်သဝ်အေနာၚ် ဟီုရ။

အကြာဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန်ကဵု ဒပ်ပံၚ်ကောံ KNLA တံဂှ် ပ္ဍဲဂိတုဂျူလာၚ် ၃၁ အခိၚ်နူဂယးတုဲကၠုၚ်ဏံဂှ်လေဝ် ပေါဲဗ္တိုက်တံ ထပ်က္တဵုဒှ်ဒၟံၚ်တုဲ ဟိုတ်နူအခက်အခုဲလာၚ်ဖုၚ်တုဲ အကာဲအရာပေါဲဗ္တိုက်ဗွဲလစှ်ေ ဂှ် ဟွံဂွံတီကေတ်ဏီပုဟ်ဂှ် သ္ဂးရ။

တုဲကၠုၚ် ပ္ဍဲဂိတုဂျူလာၚ် ၂၇ ဂှ်လေဝ် ဂကောံဒပ်ပံၚ်ကောံ KNLA တံ နူစအာဗ္တိုက် ဗ္ဒိုပ်ဒပ်ဝဳယဝ် ဖျေံသ္ဇိုၚ်သဓီုတုဲဂှ် ဒပ်ကံၚ်ဇြဳပၞာန်ဝွံ ပန်ပှော်စုတ်လဝ် လွဟ်ဇၞော် ပွဳပွူဗ္ဒါဲကွာန်ထုၚ်ဗိုဝ်လေဝ် ပွိုၚ်ဍုၚ်သဓီုဂှ် ဟွံအောန်နူကဵု ၄၀ လစုတ်ရ။

ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ ညးဒေသ (၁) တၠ ချိုတ်တုဲ (၆) တၠ ကလိဂွံလဝ်ဝပ်တုဲ စမြိုၚ်သ္ၚိဒၟံၚ်ညးဍုၚ်ကွာန် ပါလုပ်သီုကဵုဘာလကျာ်ဂှ် ဟွံအောန်နူကဵု (၁၅) မ ဇီုကပိုက်လီုလာ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြး ခရိုၚ်သဓီု KNU တံရ။

ပရိုၚ်−သြၚ်လောန်တိုၚ်(မ်)

ဗီု−KNU