မတ်မလီု၊ အဝ်ဂါတ် (၁)
ဒေသသ္ကုတ်ဒိုဟ်အဂၞဲဍုၚ်ဗၟာ တွဵုရးမန်၊ ကရေၚ် ကေုာံ ရးတၞၚ်သဳဂှ် သွက်ဂွံစွံသတိ ကုဗြဲရိုပ်ဂူ ဍာ်ဇၞော် ကေုာံ အန္တရာယ်ဘဲတိလာ်ဒဵုလာ်တံအိုတ်ဂှ် ညးတာလျိုၚ် နူကဵုဂကောံဟံၚ်ပြာ် ကေုာံ တၠပညာဗြဲကျာတံ ဖ္တိုက်ဖ္အောဝ်လဝ်ရ။
ကျာပဠက် မက္တဵုဒှ်ဒၟံၚ် ပ္ဍဲသ္ကုတ်သၟဝ်ကျာပ္ၚံက်ၜဳဂၚ် ဗေန်ဂလာဂှ်ဝွံ အပ္ဍဲပွိုၚ် ၁၂ နာဍဳဏံ ဟိုတ်နူပြံၚ်လှာဲအာ နဒဒှ်လဗိုတ်ကျာဍောတ်မာန်ဂှ်ရ ပ္ဍဲကဵုဒေသဒိုဟ်အဂၞဲဍုၚ်ဗၟာဂှ် ဗြဲရိုပ်ဂူက္တဵုဒှ်မာန်ရောၚ်ဂှ် ဌာနက္ဍိုက်ပ်စမ်ၜတ်အကာဲအရာဗြဲကျာတံ လလောၚ်ပ္တိတ်လဝ် ပ္ဍဲဂိတုဂျူလာၚ် ၃၁ တေံရ။
ကျာပဠက်ဂှ် ယဝ်ရပြံၚ်အာကဆံၚ်လဗိုတ်ကျာဍောတ်မ္ဂး ကျာသ္ကာတ်ဗြဲဇၞော်ဒှ်မာန်တုဲ မွဲနာဍဳမ္ဂး နကဵုအသိၚ် ၄၅ မိုၚ် ပိုက်မာန်တုဲ ပ္ဍဲကဵုရေၚ်ၜဳဍုၚ်ဗၟာတံဂှ် သမၠုၚ်လပှ် စဵုကဵုဗ္ဒါဲ ၁၃ ပေ နွံမာန်ရောၚ်ဂှ် နူကဵုဌာနဗြဲကျာတံ ချိၚ်ခယျလဝ်ရ။
ဟိုတ်နူလဗိုတ်ကျာဍောတ် က္တဵုဒှ်ကၠုၚ်မာန်ဂှ်တုဲ ပ္ဍဲကဵုပွိုၚ်ဍုၚ်လ္ၚဵုတံဂှ် ဗြဲဂူ ဇြဟတ်ခိုဟ်ကၠုၚ်မာန်တုဲ ဍာ်ဇၞော်ဍာ်ကလိုပ်တံလေဝ် က္တဵုဒှ်မာန်ဂှ်ရ နကဵုညးဍုၚ်ကွာန်တံ သွက်ဂွံစွံသတိတုဲ မံၚ်စံၚ်ကဵုအိုတ်ဂှ် ညးတာလျိုၚ်ဌာနဗြဲကျာမွဲတၠ ဖ္တိုက်ဖ္အောဝ်လဝ်ရ။
“ပြဟ်ဟ်ဏံ လဗိုတ်ကျာဂှ်လေဝ် ဒှ်ဒၟံၚ်ပ္ဍဲကဵုသၟဝ်ကျာ ပ္ၚံက်ၜဳဂၚ်ဗေန်ဂလာန်ဂှ်ဏောၚ်။ ကျာမုဟ်သုန်ဂှ်တှ်ေ နူကဵုဇြဟတ်ညိညိဂှ် ဇြဟတ်ခိုဟ်ကၠုၚ်ဒၟံၚ်ရ။ လၟုဟ် လ္ပာ်ဗဂေါ၊ ရခေၚ်၊ လ္ဂုၚ် သ္ကုတ်သၟဝ်ဍုၚ်ဗမာဂှ် စဵုကဵုစၟတ်တ္ၚဲ (၁) ဏံ ဗြဲဂူမာန်ဏောၚ်။ ပြဟ်ဟ်ဏံ ပ္ဍဲကဵုပ္ၚံက်ၜဳဂၚ်ဗေန်ဂလာ သ္ကုတ်သၟဝ်ကျာဂှ်လေဝ် ကျာပဠက်ဂှ် နွံဒၟံၚ်ဏောၚ်။ ပ္ဍဲကဵုဗလးၜဳကပ္ပလဳ ကဵု ပ္ၚံက်ၜဳဂၚ်ဗေန်ဂလာတံဂှ်လေဝ် ကျာမုဟ်သုန်ဂှ် ဇြဟတ်ခိုဟ်ဒၟံၚ်ကွေံကွေံဏောၚ်။ ဒၟါနူလဗိုတ်ကျာဒှ်ကဵု ဇြဟတ်ကျာမုဟ်သုန်ခိုဟ်တံ အာဂဗညးသ္ကအ်တုဲ ဗြဲဂှ်ဂၠိုၚ်ဒၟံၚ်ရ။ ဍာ်ဇၞော်ဍာ်ကလိုပ်ဂှ်တှ်ေ ယဝ်ရဗြဲဂူဆက်ဏောၚ်မ္ဂး စွံသတိတှ်ေ ဟွံမှာပုဟ်” သာ်ဝွံ သ္ဂးရ။
အတိုၚ်တၚ်နၚ်စမ်ၜတ်ဂွံလၟုဟ်မ္ဂး ကျာပဠက်ဂှ်ဝွံ ၜိုန်ရဟွံစိုပ်ကဆံၚ်လဗိုတ်ကျာ ဇြဟတ်သ္ကာတ်ဂှ်မာန်ကီုလေဝ် ဟိုတ်နူအသိၚ်လဗိုတ်ကျာတုဲ ဗြဲဂူအဆက်က်မာန်ဂှ်ရ ဍာ်ဇၞော်ဍာ်ကလိုပ်တံ၊ တိလာ်ဒဵုလာ်တံ က္တဵုဒှ်မာန်ဂှ်ရ စွံသတိဗွဲတၟေၚ်တုဲ သွက်ဂွံမံၚ်စံၚ်အိုတ်ဂှ်လေဝ် ညး ဆက်ဟီုလဝ်ရ။
ညးတာလျိုၚ် နူကဵုဂကောံဟံၚ်ပြာ်မှာဇန်မွဲတၠဂှ်လေဝ် အခိၚ်ကျာပဠက်ဒှ်ဒၟံၚ်ဂှ်ဝွံ ဟိုတ်နူဒးဂဗဒၟံၚ်ကဵု တ္ၚဲဍာ်တိုန်ဂှ်တုဲ နကဵုညးဍုၚ်ကွာန်တံ လ္ပသာသ္ပအ်အိုတ်ဂှ်ကီု ယဝ်ရနွံပၟိက်မ္ဂး သွက်ဂွံအာတ်အရီုဗၚ်ဂှ် ဖ္တိုက်ဖ္အောဝ်လဝ်ရ။
“သၞာံတုဲကၠုၚ်တေံဂှ် ဟိုတ်နူဟွံဂဗကဵုလဗိုတ်ကျာတုဲ ဍာ်ဂှ်ဟွံစိုပ်ကွေံကွေံဟဂှ်။ သၞာံဏံဂှ် ကဵုတ္ၚဲဍာ်တိုန်ဂှ်လေဝ် ဂဗဒၟံၚ်ဏောၚ်၊ ကဵုလဗိုတ်ကျာဂှ်လေဝ် ဂဗဒၟံၚ်ဟီုတှ်ေ ဍာ်ဂှ် ဒှ်အာသဘဴဍေံကောံကလောံအာညိညိရ။ လၟုဟ် ဗြဲဂူဒၟံၚ်အဆက်က်ဂှ် ဟွံဇူဟွံယီု ဂူဒၟံၚ်ဂှ် ဂွံပိပန်တ္ၚဲယျ။ ၜိုတ်ၜါတ္ၚဲပၠန်ဟီုတှ်ေ အကာဲအရာသ္ဂောံပရေံကၠုၚ် နွံဒၟံၚ်တၟာဂလိုၚ်ဏောၚ်။ ဟိုတ်ဂှ်ရ လ္ပာ်ဏံဂှ် ပိုယ်တံပဆုဲပြံၚ်ဒၟံၚ်ကဵု လ္ပာ်တိသၠုၚ်ၚ်တံ နွံရ။ အဲမိက်ဂွံဟီု ကုညးဍုၚ်ကွာန်တံဂှ်တှ်ေ လ္ပသာသ္ပအ်အိုတ်ညိ။ လ္ၚဵုတံဂှ်လေဝ် ဟွံပကာတုဲ မံၚ်ဒၟံၚ်လေဝ် နွံရ။ အန္တရာယ်ဂှ်တှ်ေ အခိၚ်ဟွံရုဲဒှ်မာန်တုဲ ပြဟ်ဟ်ဏံ သွက်ဂွံမံၚ် ဒၞါဲဗၠးဘဲဍာ်တံဂွံဂှ် ပိုယ်တံ စဳဇန်လဝ်ကဵုရ” သာ်ဝွံ သ္ဂးရ။
ဟိုတ်နူဗြဲဂူဒၟံၚ် ဟွံပိုတ်သ္ကုတ်ဂှ်ရ နကဵုမၞိဟ်မံၚ်ဒၟံၚ် ပ္ဍဲကဵုဒၞါဲဍာ်သဝ်ဝ်တံကဵု ကြပ်ကဵုၜဳကြုၚ်တံဂှ် သွက်ဂွံစွံသတိဗွဲတၟေၚ် နွံပၟိက်တုဲ မၞိဟ်မံၚ်ဒၟံၚ် ဗ္ဒါဲဇိုၚ်ဒဵုတံဂှ်လေဝ် စွံသတိအိုတ်ညိဂှ် ညးဟီုရ။
ပ္ဍဲတွဵုရးဍုၚ်မန်ဂှ် ပပ္တံနူဂိတုဂျူလာၚ် ၂၈ တုဲ ဟိုတ်နူဗြဲဂူဒၟံၚ်ဟွံပိုတ်သ္ကုတ်ဂှ်ရ ပ္ဍဲကဵုပွိုၚ်ဍုၚ်ကျာ်ထဝ်၊ ၜဳကလေၚ်၊ ပံၚ်၊ မုဟ်ဍုၚ်၊ ဇြပ်ဗု ကေုာံ ပွိုၚ်ဍုၚ်ရေဝ်တံဂှ် ဍာ်ဇၞော်က္တဵုဒှ်မာန်တုဲ ညးဍုၚ်ကွာန်ဒးဘဲဍာ်တံ ဒးဆုဲပြံၚ်ကာတၟေၚ်တံ နွံဒၟံၚ်ရ။
တုဲကၠုၚ် ပ္ဍဲဂိတုဂျူလာၚ် သတ္တာဟတတိယဂှ်လေဝ် ဟိုတ်နူဍာ်ဇၞော် ပ္ဍဲတွဵုရးဍုၚ်မန်ဂှ်တုဲ မၞိဟ် (၄) တၠ ဗၠိုက်ဍာ်ချိုတ်အာဂှ် ကောန်ၚာ်သၟတ် (၃) တၠပါလုပ်တုဲ ညးဒေသဂၠိုၚ်ကဵုလ္ၚီ ဒးလဝ်ဘဲဍာ်ရ။
တွဵုရးဍုၚ်မန်ဝွံ ဟိုတ်နူဍာ်ဇၞော်ကဵု တိဒဵုလာ် မက္တဵုဒှ်လဝ် ပ္ဍဲသၞာံ ၂၀၁၉ တုဲကၠုၚ်တေံဂှ်တုဲ လၟိဟ်မၞိဟ် ဗ္ဒါဲ (၇၀) ချိုတ်အာလဝ်ရ။
အလဵုအသဳညဳသၟဟ်ဂကူ NUG ဂှ်လေဝ် ဟိုတ်နူဍာ်ဇၞော်၊ တိဒဵုလာ်တံ က္တဵုဒှ်မာန်ဂှ်ရ စနူဂိတုဂျူလာၚ် (၃၁) စဵုကဵုဂိတုအဝ်ဂါတ် (၂) ဂှ် ညးဍုၚ်ကွာန် တွဵုရးရခေၚ်တံကဵု ဒေသသ္ကုတ်သၟဝ်ကျာဍုၚ်ဗၟာတံ သွက်ဂွံစွံသတိဗွဲတၟေၚ်အိုတ်ဂှ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai