တၠကမၠောန်ပရေၚ်ပိုန်ဒြပ် နူဍုၚ်ဗိက် (၆) တၠ ကံၚ်ဇြဳပၞာန် ကော်စၟဳတ်

ဗိက်၊ အတ်ဂါတ် (၁)

ကြဴနူသၞာဲဒဴကဆံၚ်လ္တူ လ္ပာ်ဒပ်ပၞာန် (၃) တၠ ပ္ဍဲရးတၞၚ်သဳ ဒးဒုၚ်ရပ်ဒက်စၟဳတ်တုဲဂှ် တၠကမၠောန်ပရေၚ်ပိုန်ဒြပ် မၞုံဍုၚ်ဗိက် (၆) တၠ ဒးဒုၚ်ကော်စၟဳတ်ဒၟံၚ်ရောၚ် ညးမစုက်လုက်ကဵု ဒပ်ကံၚ်ဇြဳပၞာန်တံ သ္ပဒတန်လဝ်ကဵု သြၚ်လောန်တိုၚ်(မ်) ရ။

တုဲကၠုၚ်ပ္ဍဲဂိတုဂျူလာၚ် (၂၆) တေံ သ္ကိုပ်ဗိုလ်ဇၞော် တေတ်လွေန်ထူ ဒုသ္ကိုပ်ရး ဌာန်ဂအုပ်ပၞာန်ရးဒေသ ရေၚ်ၜဳ ရးတၞၚ်သဳ၊ သ္ကိုပ်ဗိုလ်ဇၞော်ဝေန်ကျဝ်တူ နူကဵုဌာန်ဂအုပ်ကောပ်ကာဲပရေၚ်ပၞာန် ကေုာံ ဗိုလ်ဇၞော် တုၚ်ဠေန် ဝန်ဇၞော်ဂီုကၠီုပယျဵု ရးတၞၚ်သဳတံ ဒးဒုၚ်ရပ်စၟဳတ်ဒၟံၚ် ပ္ဍဲနေဗျဳဒဝ်ရ။

ကြဴနူဂှ်တုဲ ကံၚ်ဇြဳပၞာန်ဝွံ ကော်စၟဳတ်ဒၟံၚ် ဥူတက်သဵု နူကဵုဌာန်ဂကောံကမၠောန်ကဗိက်၊ ဥူလှတာန် ဇၞော်သ္ကိုပ် နူကဵုကမ္ပဏဳညးဂမၠိုၚ်ဍုၚ်ဗိက်၊ ဥူမာၚ်ထိုဲ နူကဵုပရေၚ်သွံရာန်သ္ၚု OK ၊ တၠကမၠောန်ဖကောဝ် ဥူမေန်သူရ၊ ဥူဝေန်ထုၚ်၊ ဥူဖိုဝ်ယှုၚ် တံ (၆) တၠ ပ္ဍဲဍုၚ်ထဝါဲရ။

ပရေၚ်ကော်စၟဳတ် တၠကမၠောန်ပရေၚ်ပိုန်ဒြပ် (၆) တၠဂှ်ဝွံ ဆက်စပ်ဒၟံၚ်ကဵု ပရေၚ်စလာဘ်ဗဇဴ ဗိုလ်ဇၞော်တုၚ်လေန် ဝန်ဇၞော်ဂီုကၠီုပယျဵု ရးတၞၚ်သဳဏောၚ်ဂှ် ပရိုၚ်တမ်ရိုဟ်ဂမၠိုၚ် ဟီုဂးဒၟံၚ်ရ။

ဝန်ဇၞော်ဂီုကၠီုပယျဵု ဗိုလ်ဇၞော်တုၚ်လေန်ဂှ်ဝွံ ဖကောဝ်ရပ်ဂွံတံဂှ် စလာဘ်တုဲ ပလေံထောံဂဗုတ်ဂှ်ကီု၊ ပ္ဍဲအရာရာန်ကပေါတ်စက်သ္ၚုတံဂှ် လီဠာန်သြန်ဘဏ္ဍာကၟိန်ဍုၚ်တုဲ ဂလိုၚ်တုဲ ပ္တိုန်လဝ်စရၚ်ကီု၊ စလဝ်လာဘ် ကွဳစက်ဗ္ဒါဲပိဖ္ဍိုက် ပါလုပ်သီုကဵုကွဳစက်ၚုဟ်မၞုံ ၁၈၀၀ ကိုဋ်ဒ္ကေဝ်တံရောၚ်ဂှ် ဂွံတီကေတ် ဇရေၚ်ပရိုၚ်တမ်ရိုဟ်ဒပ်ပၞာန်တံရ။

သွက်လၟေၚ်ဒဒှ်တံဏံဂှ် ယဝ်ရဒုသ္ကိုပ်ရး၊ သ္ကိုပ်ကောပ်ကာဲပရေၚ်ပၞာန် ကေုာံ ဝန်ဇၞော်ဂီုကၠီုပယျဵုတံ ဒုဟ်ဒဏ်ပြာကတ်မ္ဂး ဒးဒုၚ်ပ္တိတ်အာ နူကဵုကဆံၚ်ဌာနန္တရဏောၚ်တုဲ သီုကဵုဒးဒုၚ်ဖျေံစၟတ် ဒဏ်ထံၚ်တံလေဝ် မာန်ရ။

တၠကမၠောန်ပရေၚ်ပိုန်ဒြပ် မၞုံဍုၚ်ဗိက် မဒးဒုၚ်ရပ်ဒက်စၟဳတ်ဒၟံၚ် (၆) တၠဂှ်ဝွံ ကြဴနူဒပ်ပၞာန်သီအဝဵုတုဲဂှ် ပရေၚ်ဆက်ဆောံဍုက်ကေဝ်ကဵု ကံၚ်ဇြဳပၞာန်တံ နွံတုဲ ပ္ဍဲကဵုအသေအဟာန် ကံၚ်ဇြဳပၞာန်တံ ကၠောန်ဗဒှ်တံဂှ် လေပ်ဂွံဆဵုတဴဒၟံၚ်လၟိုန်ရောၚ်ဂှ် ညးဒေသတံ သ္ဂးအိုတ်ရ။

ကံၚ်ဇြဳပၞာန်ဝွံ တုဲကၠုၚ်ဂိတုဂျူလာၚ် သတ္တာဟဒုတိယဂှ်လေဝ် ရပ်ဒက်စၟဳတ်လဝ် သၞာဲဒဴ (၇) တၠ ပါလုပ်သီုကဵုသ္ကိုပ်ဗိုလ်ကိုဝ်ဝ်မာၚ် သ္ကိုပ်ရးဌာန်ဂအုပ်ပၞာန်ရးသ္ကုတ်သၟဝ်ကျာ ဖျေံသ္ဇိုၚ်ဍုၚ်မျေတ်ကျဳဏာ၊ တွဵုရးကချေၚ်တံဂှ် ဂွံတီကေတ် ဇရေၚ်ညးမစုက်လုက်ကဵု ဒပ်ပၞာန်တံရ။

ပရိုၚ်−သြၚ်လောန်တိုၚ်(မ်)

ဗီု−Social Media