ပ္ဍဲၜဳကလေၚ် အပ္ဍဲပွိုၚ်မွဲသတ္တာဟဂှ် ဒးဒုၚ်ရပ် ဗ္ဒါဲ (၁၀) တၠ ပါလုပ်သီုကဵုတၠကမၠောန်ဆေၚ်ထဝ်

ၜဳကလေၚ်၊ အဝ်ဂါတ် (၂)

တွဵုရးဍုၚ်မန်၊ ပွိုၚ်ဍုၚ်ၜဳကလေၚ် အပ္ဍဲသတ္တာဟတုဲကၠုၚ်ဏံ တၠကမၠောန်ဆေၚ်ထဝ်ကဵု အ္စာၝောံ CDM တံပါလုပ်ဂှ် ဗ္ဒါဲ (၁၀) တၠ ဒးဒုၚ်ရပ်လဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

အပ္ဍဲဂိတုဂျူလာၚ် သတ္တာဟလက္ကရဴအိုတ် တုဲကၠုၚ်ဏံ ဒပ်ကံၚ်ဇြဳပၞာန်ကဵု ဂကောံဒပ်ဗၠာဲသၟိၚ်တံဝွံ ရပ်ဒက်ဏာလဝ် ညးဒေသ နူကဵုကွာန် (၃) ကွာန် ပါလုပ်သီုကဵုကွာန်တံၚ်သောန်ဂှ်ကဵု နူကဵုဍုၚ်ၜဳကလေၚ်၊ အရာပ် (၈) ၊ အရာပ်(ဆရာစံ) တံဂှ် ဗ္ဒါဲ (၁၀) တၠရ။

ပ္ဍဲကဵုမၞိဟ်မရပ်ဒက်ဏာတံဂှ် သီုကဵုတၠဆေၚ်ထဝ်(မိဘမေတ္တာ) ကိုဝ်ဇြဝ်ဝေန်ဥူ၊ အ္စာၝောံဇြဳဒဳအာမ် ဒဝ်အေအေခိုၚ်၊ ညးယိုက်ဝန် ပ္ဍဲဗာန်ပုဂ္ဂလိက မအိဖျူဇြေန် ကေုာံ ညးဒေသ ကိုဝ်ဝေန်နာၚ်တံပါလုပ်ဂှ် ညးဒေသ ဗ္ဒါဲ (၁၀) တၠ ဒးဒုၚ်ရပ်ဒက်လဝ်ရ။

ပ္ဍဲကဵုဏံ ကြဴနူရပ်ဒက်တၠဆေၚ်ထဝ်(မိဘမေတ္တာ) ကိုဝ်ဇြဝ်ဝေန်ဥူတုဲဂှ် ဒပ်ကံၚ်ဇြဳပၞာန် အာတ်သြန်တုဲ ကလေၚ်ဗလးကဵုလဝ်ကီုလေဝ် ညးဒေသသှ်ေဒၟံၚ်ဗွဲမဂၠိုၚ်ဂှ် ဆက်ရပ်ဒက်လဝ်ရ။

ကံၚ်ဇြဳပၞာန်ဂှ် မၞိဟ်ဍေံတံရပ်လဝ်ဂမၠိုၚ်ဝွံ ဟိုတ်နူချူပါ်ပါဲ ပ္ဍဲမုက်လိက်ဇာဇၞိက်ပရေၚ်မၞိဟ် ညံၚ်အရှ်ေအသှ်ေကၟိန်ဍုၚ်ဂွံလီုဂှ်ကီု၊ ထံက်ပၚ်ကဵု ပဳဒဳအာဖ်တံကီု၊ ဆက်စပ်ဒၟံၚ်ကဵု ပရေၚ်ဖံက်ဗ္တိုဟ်ဗုမ်တံဂးတုဲ ရပ်ဒက်ဏာလဝ်ရ။

ညးဒေသဒးဒုၚ်ရပ်တံဂှ် ကံၚ်ဇြဳပၞာန် ပံက်လဝ်ဂဗုတ် မ္ၚးနူကဵုသၞောဝ်ဗ္တိုက်သ္အးပွပကီုပရာပ်တံဂှ် သီုကဵုသၞောဝ်ရာဇာသာတ်ဇၞော် ၝောံပိုဒ် ၅၀၅ (က) တံရောၚ်ဂှ် ဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန်တံရ။

အတိုၚ်တၚ်လလောၚ်တြး ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် (AAPP) တံဂှ်မ္ဂး အပ္ဍဲကာလသီအဝဵုပွိုၚ်ၜါသၞာံပြၚ်ဏံ ညးဍုၚ်ကွာန်ကောန်အရာပ် ဗ္ဒါဲ ၂၀၀၀၀ ဆက်ဒးဒုၚ်ရပ်လဝ်ဂှ် ပ္ဍဲဂိတုအဝ်ဂါတ် (၁) တေံ လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media