မတ်မလီု၊ အဝ်ဂါတ် (၂)
ကောန်ထံၚ် ဒးဒုၚ်ဖျေံဒၟံၚ်ထံၚ် ပ္ဍဲကဵုထံၚ်စာတ်၊ ထံၚ်ဂုက် ကေုာံ ဗ္ဒိုပ်ကၠောန်ကလောန် မၞုံအပ္ဍဲတွဵုရးဍုၚ်မန်တံဂှ် ကဵုလဝ်အခေါၚ်ဗၠးနူဒုဟ်ဒဏ် ၅၀၀ တၠရောၚ် ဂွံတီကေတ် အတိုၚ်တၚ်နၚ် ဌာနက္ဍိုက်ပ်ထံၚ်စာတ် ကံၚ်ဇြဳပၞာန်ရ။
ကောန်ထံၚ် ကလေၚ်ဗလးကဵုလဝ်ဂမၠိုၚ်ဝွံ ဒှ်ကောန်ထံၚ် နူကဵုထံၚ်ကျာ်မြဟ်၊ ထံၚ်မတ်မလီု၊ ထံၚ်သဓီုတံကဵု နူကဵုဗ္ဒိုပ်ခါဲတၟအ် (၁၁) ဒၞါဲတံမဒှ်ရ။
ပ္ဍဲကဵုဏံ နူကဵုထံၚ်ကျာ်မြဟ်ဂှ် ကောန်ထံၚ်တြုံ၊ ကောန်ထံၚ်ဗြဴ ၉၆ တၠ၊ နူကဵုထံၚ်သဓီုဂှ် ၁၁၉ တၠ၊ နူကဵုထံၚ်မတ်မလီုဂှ် ၆၅ တၠ ပါလုပ်ဒၟံၚ်ဂၠိုၚ်အိုတ်ရ။
ဆ္ဂး ပ္ဍဲကဵုကောန်ထံၚ် ကံၚ်ဇြဳပၞာန် ကလေၚ်ဗၠးကဵုတံဂှ် ကောန်ထံၚ်ပရေၚ်ဍုၚ်ကွာန် ပါလုပ်အောန်ဒၟံၚ်တုဲ ဗွဲမဂၠိုၚ်ဝွံ ရဲဂြိပ်နူဗၠာဲသၟိၚ်၊ ရဲဂြိပ်ပၞာန်တံ ကေုာံ မၞိဟ်ဒးဒုၚ်ဖျေံလဝ်ဒဏ်ထံၚ် နကဵုအမှုဂဥုဲၜူမာဲ၊ ဂဥုဲကၠတ်ဂၠံက်တံ ပါလုပ်ဒၟံၚ် ဂၠိုၚ်အိုတ်ရောၚ်ဂှ် ညးမစုက်လုက်ကဵု ဌာနက္ဍိုက်ပ်ထံၚ်စာတ် တွဵုရးဍုၚ်မန်မွဲတၠ ဟီုရ။
နူကဵုသြၚ်လောန်တိုၚ်(မ်) ဂၠိုက်ဂၠါဲဂွံဂှ်မ္ဂး ပ္ဍဲကဵုထံၚ်ကျာ်မြဟ် ကလေၚ်ဗလးကဵုလဝ် ကောန်ထံၚ်ဗ္ဒါဲ (၁၀၀) တၠဂှ် ကောန်ထံၚ်ပရေၚ်ဍုၚ်ကွာန် (၄) တၠဓဝ် ကလေၚ်ဗလးကၠုၚ်တုဲ ညးတံဝွံ ဒှ်ကောန်ထံၚ် တ္ၚဲပေၚ်တုဲ ဘိုအ်ဂွံဗၠးတံရောၚ်ဂှ် ဂွံတီကေတ်ရ။
ကံၚ်ဇြဳပၞာန်ဝွံ ပ္ဍဲဂိတုအဝ်ဂါတ် (၁) မဒှ်တ္ၚဲဒုတိယဒဂိုၚ်ပေၚ် နဒဒှ်စၟတ်သမ္တီတ္ၚဲဓမ္မစက်တုဲ ကောန်ထံၚ်ဗြဴ၊ ကောန်ထံၚ်တြုံ မဒးဒုၚ်ဒၟံၚ်ဒုဟ်ဒဏ် ပ္ဍဲကဵုထံၚ်စာတ် အလုံကၟိန်ဍုၚ်မွဲတံဂှ် ကဵုထ္ပက်စၟတ်တဲတုဲ ဗလးကဵုလဝ် ၇၇၄၉ တၠရ။
ပရိုၚ်−သြၚ်လောန်တိုၚ်(မ်)
ဗီု−MRTV web
sanlontai