ယဝ်ရဒဝ်အံၚ်သာန်သုကျဳ ဗၠးကၠုၚ်မ္ဂးလေဝ် မူဝါဒဟွံပြံၚ်လှာဲပုဟ်ဂှ် NUG ဟီု

လ္ဂုၚ်၊ အဝ်ဂါတ် (၂)

ဒဝ်အံၚ်သာန်သုကျဳ ဒးဒုၚ်ဖျေံလဝ်ထံၚ် ဟွံဗဗွဲကဵုသၞောဝ်ဂှ် ဗၠးကၠုၚ်မ္ဂးလေဝ် မူဝါဒ ပြံၚ်လှာဲအာဟွံသေၚ်တုဲ ဆက်ဒတူလိုၚ်အာ အတိုၚ်ဆန္ဒညးဍုၚ်ကွာန်ရောၚ်ဂှ် သ္ကိုပ်ဝန်ဇၞော်ကၟိန်ဍုၚ် အလဵုအသဳညဳသၟဟ်ဂကူ (NUG) မာန်ဝေန်ခိုၚ်တာန် ဟီုဂးလဝ်ရ။

လ္တူအကာဲအရာပရေၚ်ဍုၚ်ကွာန် မက္တဵုဒှ်ဒၟံၚ်လၟုဟ်ဂှ် အပ္ဍဲကောံဓရီုတၟေၚ် ကံၚ်ဇြဳကဵုကသပ် ညဳသၟဟ်ဂကူ (NUCC) ကဵု အလဵုအသဳညဳသၟဟ်ဂကူ (NUG) မကၠောန်ဗဒှ်လဝ် ပ္ဍဲဂိတုဂျူလာၚ် (၃၁) အခိၚ်ဇိုၚ်သဝ်တ္ၚဲ (၄) နာဍဳဂှ် သ္ကိုပ်ဝန်ဇၞော်ကၟိန်ဍုၚ် NUG မာန်ဝေန်ခိုၚ်တာန် ကဵုလဝ်သမ္တီ ဟီုဂးလဝ်သာ်ဏံရ။

သ္ကိုပ်ဝန်ဇၞော်ကၟိန်ဍုၚ် မာန်ဝေန်ခိုၚ်တာန်ဂှ် ယဝ်ရဒဝ်အံၚ်သာန်သုကျဳ ဗၠးၜးကၠုၚ်မ္ဂးလေဝ် ဟိုတ်နူသၟာန်ကၠုၚ်ဒၟံၚ် မူဝါဒပြံၚ်လှာဲအာ နွံဟာ သာ်ဏံတံနွံဒၟံၚ်ဂှ်ရ ပြံၚ်လှာဲအာဟွံသေၚ်တုဲ ရှ်ေသှ်ေအာ ဆန္ဒညးဍုၚ်ကွာန်တံရောၚ်ဂှ် ဟီုဂးလဝ်ရ။

သ္အာၚ်နူဂှ်ပၠန် လုကဴသၞောဝ်သ္ဇိုၚ် ၂၀၀၈ နွံဒၟံၚ်မ္ဂး ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳဂှ် ဒက်ပ္တန်မာန်ဟွံသေၚ်ဂှ်ကီု သွက်ဂကောံပၞာန်ဂွံပြဟ်ဒတုံအာဂှ် ညံၚ်ဂွံပူဗိုၚ်ရေၚ်တၠုၚ်ကဵုအိုတ်ဂှ် ဖ္တိုက်ဖ္အောဝ်လဝ်ရ။

ပ္ဍဲကဵုကောံဓရီုဏံဂှ် သမ္မတယာယဳ ဒူဝါလယှဳလဂှ်လေဝ် ညံၚ်သၞောတ်တၠအဝဵုပၞာန် ရိုဟ်ကၞက်ဂွံပိုတ်အာ ကေုာံ ညံၚ်ဂွံဒက်ပ္တန်ကၟိန်ဍုၚ်ပံၚ်ကောံဖေဝ်ဒရာမာန်ဂှ်ဟေၚ် ဒှ်အဓိကဂှ်တုဲ ညံၚ်ဂွိုအ်ပါဗက်အာ ပ္ဍဲဂွန်ဗျူဟာကံၚ်ဇြဳပၞာန်တံဂှ် ဒဒှ်ရပၟိက်ဇၞော်ဂှ် ဖ္တိုက်ဖ္အောဝ်လဝ်ရ။

ကံၚ်ဇြဳပၞာန်သီအဝဵုဝွံ ပ္ဍဲဂိတုဂျူလာၚ် သတ္တာဟဒုတိယကဵု ဗွဲကြဴဏံဂှ် ဒဝ်အံၚ်သာန်သုကျဳ မဒးဒုၚ်ရပ်ဒက်လဝ်ဂှ် ကဵုလဝ်အခေါၚ်ဆဵု ကုပူဂဵုလ္ၚဵုတံတုဲ ပဆုဲပြံၚ်လဝ် ပ္ဍဲကဵုထံၚ်သ္ၚိရ။

ညးခါတ်အကာဲပရေၚ်ဍုၚ်ကွာန်တံဂှ် အပ္ဍဲပရေၚ်သီအဝဵုဗ္ဒါဲၜါသၞာံဘာ်ပြၚ်ဏံ မ္ၚးနူကဵုပေါဲဗ္တိုက်ဗလးတိဂှ် ပ္ဍဲကဵုပရေၚ်ဍုၚ်ကွာန်ကဵု ကေၚ်ကာကလုတ်တမာန်တံဂှ်လေဝ် နကဵုကံၚ်ဇြဳပၞာန် မကျကၠုၚ်ဒၟံၚ်ဇဳဒိုဟ်ဂှ် ဂါံကၠုၚ်ဒၟံၚ်ဇိုၚ် သွက်ဂွံပ္တိတ်သုၚ်စောဲ ဒဝ်အံၚ်သာန်သုကျဳရောၚ်ဂှ် ထံက်ထ္ၜးလဝ်အိုတ်ရ။

ပရိုၚ်−သြၚ်လောန်တိုၚ်(မ်)

ဗီု−Getty Image