သ္ကိုပ်က္ဍိုက်ပ်ဂၠံၚ်ကွာန်ရး ပွိုၚ်ဍုၚ်ရေဝ် ဒးဒုၚ်ရပ်ဒက်

ရေဝ်၊ အဝ်ဂါတ် (၃)

ပ္ဍဲလ္တူဂၠံၚ်ရေဝ်−ဇြပ်ဗု ကွာန်တၟအ်ကၞေၚ်၊ ပွိုၚ်ဍုၚ်ရေဝ်၊ တွဵုရးဍုၚ်မန်ဂှ် ဂကောံရပ်လွဟ်မွဲဂကောံ ရပ်ဒက်ဏာ ဥူယျေဝ်နဳလေန် သ္ကိုပ်က္ဍိုက်ပ်ဂၠံၚ်ကွာန်ရး ပွိုၚ်ဍုၚ်ရေဝ်ဂှ် ညးမစုက်လုက်ကဵု ကံၚ်ဇြဳပၞာန်တံ သ္ပဒတန်လဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုအဝ်ဂါတ် (၁) အခိၚ်နူဂယး (၁၀) နာဍဳတုဲကၠုၚ်တေံ သ္ကိုပ်က္ဍိုက်ပ်ဂၠံၚ်ကွာန်ရး ပွိုၚ်ဍုၚ်ရေဝ် ဥူယျေဝ်နဳလေန်ဝွံ နူရေဝ် အခိၚ်ကလေၚ်ဍုၚ်မတ်မလီုဂှ် ဒးဒုၚ်ရပ်လဝ်ရ။

ဥူယျေဝ်နဳလေန် သ္ကိုပ်က္ဍိုက်ပ်ဂၠံၚ်ကွာန်ရးဂှ်ဝွံ ကြဴနူဒးဒုၚ်ရပ်ဒက်တုဲ ဒဵုကဵုအခိၚ်လၟုဟ် ဟွံဂွံအဆက်ကဵု ဂြောဝ်ဂတာညးဏီတုဲ ဂကောံလဵုရပ်ဏာညးရောဟီုဂှ် လလောၚ်ပ္တိတ်လဝ် ဟွံမွဲဏီရ။

ပ္ဍဲကဵုဂၠံၚ်ကွဳစက်ရေဝ်−ဇြပ်ဗုဂှ် ပပ္တံနူဂိတုဂျောန်တုဲကၠုၚ်တေံတုဲ ဒပ်ပၞာန်ဗၠးၜးကောန်ဂကူကရေၚ် KNLA တံကဵု ဂကောံဒပ်ပံၚ်ကောံစဵုဒၞါညးဍုၚ်ကွာန် PDF တံ စၟဳတ်ဒၟံၚ် မွဲဏှမွဲဏှနွံဒၟံၚ်တုဲ ရပ်ဒက်ဒၟံၚ် မၞိဟ်မဆက်စပ်ကဵုကံၚ်ဇြဳပၞာန်တံ နွံဒၟံၚ်ရ။

ကံၚ်ဇြဳပၞာန်ဂှ် နကဵုညးယိုက်ဝန်ဂမၠိုၚ် ယဝ်ရအာတရဴၜက်ဒေသမ္ဂး သွက်ဂွံကဵုပရိုၚ် ဇရေၚ်ဌာန်ဂအုပ်ကောပ်ကာဲပရေၚ်ပၞာန်ကံၚ်ဇြဳပၞာန် စကခ (၁၉) ဖျေံသ္ဇိုၚ်ပွိုၚ်ဍုၚ်ရေဝ်ဂှ်ကီု၊ ဂွံအခေါၚ်မှ သွက်ဂွံအာကၠုၚ်တရဴအိုတ်ဂှ် ပ္ဍဲဂိတုဂျောန် (၁၃) တုဲကၠုၚ်တေံ စၞောန်ပ္ညုၚ်လဝ် ဌာနမဆေၚ်စပ်တံသီုဖအိုတ်ရ။

ပွိုၚ်ဍုၚ်ရေဝ် မလလောၚ်တြးလဝ် ပရေၚ်အုပ်ဓုပ်ပၞာန်ဂှ်ဝွံ အပ္ဍဲကာလဒပ်ပၞာန်သီအဝဵုဏံ တမ်ဒပ်ကံၚ်ဇြဳပၞာန်၊ ဗ္ဒိုပ်ဒပ် ကေုာံ ရုၚ်ဌာမဆေၚ်စပ်တံ ဒးဒုၚ်ဗ္တိုက်ဒၟံၚ်မွဲဏှမွဲဏှတုဲ ဒှ်ပွိုၚ်ဍုၚ်ဂကောံဇြဟတ်ပၠန်ဂတးတံ ထိၚ်ဒက်မာန်ကၠုၚ်လဝ် တိဍာ်လ္ၚဵုတံမွဲရောၚ် မဒှ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media