ညးဒးဒုၚ်ပြိုက်ဂစိုတ်လဝ်ကဵုကံၚ်ဇြဳပၞာန် ဗွဝ်ကဵုဗွဝ် နွံကၠုၚ်​ဗ္ဒာဲ (၁၆၀၀)ရဂှ် NUG လလောၚ်တြး

မတ်မလီု – အဝ်ဂေတ်(၃)

ကြဴနူဒပ်ပၞာန်သီကေတ်အဝဵုကၟိန်ဍုၚ်ဗၟာတုဲ သ္ကုတ်လကြဴဏံ ပရေၚ်ပြိုက်ဂစိုတ်လဝ်ဗွဝ်ကဵုဗွဝ် အောန်အိုတ် စဵုကဵု (၁၄၄)ဝါ ဒးဒုၚ်က္လိလောန်လဝ်တုဲ ညးဍုၚ်ကွာန် စဵုကဵု (၁၅၉၅)တၠ ဒးချိုတ်လဝ်ရဂှ် ဌာနဝန်ဇၞော်အခေါၚ်အရာမၞိဟ် NUG လလောၚ်တြးလဝ် ပရိုၚ်ရ။

ဟိုတ်နူညးဍုၚ်ကွာန်တအ် ဆက်ပၠန်ဂတးဒၟံၚ်ပရေၚ်ပၞာန်သီအဝဵုဂှ်ရ ကၠောန်သ္ပဒၟံၚ်ပရေၚ် ပြိုက်ဂစိုတ်ဗွဝ်ကဵုဗွဝ် သၞောတ်စှ်ေစှ်ေကီု သီုကၠောန်သ္ပကၠုၚ် သ္ကာတ်တ်မြဟ်ဟ် သၠဲသၠဲလးလးရဂှ် NUG ဟီုသ္ဂးလဝ်ရ။

အခိၚ်လၟုဟ်ဏံ စပ်ကဵုပရေၚ်ဂကောံပၞာန် ဖံက်ပ္ကဝ်ဒၟံၚ်အခေါၚ်အရာမၞိဟ်တုဲ ညံၚ်ဂွံဓမံက်ပ္တိုန်ဓဝ်ဍာံမာန် ပ္တိတ်ဒၟံၚ်ဇြဟတ် အိုတ်အစောန်ရဂှ် ကဵုလဝ်သမ္တီ ပ္ဍဲတၚ်လလောၚ်တြးဂှ်ရ။

သ္အာၚ်နူဂှ်ပၠန် နကဵုညးဍုၚ်ကွာန်တအ်လေဝ် ပရေၚ်ဒးဒုၚ်ဖံက်ပ္ကဝ်အခေါၚ်အရာမၞိဟ် ကေုာံဒးဒုၚ်က္လိ လောန်လဝ် ဒုဟ်ရဇဝတ်ပၞာန်ကံၚ်ဇြဳပၞာန်တအ်ဂှ် ပလံၚ်ဗစိုပ်ကဵု ဇရေၚ်ဌာနဝန်ဇၞော်အခေါၚ်အရာ မၞိဟ်ညိဂှ်လေဝ် အာတ်မိက်လဝ် ဗွဲမေတ္တာရ။

နကဵုဌာနဝန်ဇၞော်အခေါၚ်အရာမၞိဟ် အလဵုအသဳ NUG ဂှ် သွက်ပရေၚ်ကံၚ်ဇြဳပၞာန် ဖံက်ပ္ကဝ်လဝ် အခေါၚ်အရာမၞိဟ် ဗၠးတိတ်ဒၟံၚ် နူဒုဟ်ဒဏ်တအ်ဂှ် ဗတိုက်သရိုဟ်အာပေၚ်ၚ်တုဲ ပ္ဍဲပရေၚ်ဒက်ပ္တန် ကၟိန်ဍုၚ်ပံၚ်ကောံ ဖေတ်ဒရေဝ်ဒဳမဝ်ကရေဇြဳဂှ် ညံၚ်ဂွံဓမံက်ပ္တိုန် ပွဗဗွဲဓဝ် ဆေၚ်စပ်ကဵုအခိၚ်ပြံၚ်သၠာဲဂှ် ကမၠောန်ပ္တိုန်စၟတ်သမ္တီတုဲ ဂၠိုက်ဂၠာဲဓဝ်ဍာံ ပရေၚ်ဖံက်ပ္ကဝ်လဝ်အခေါၚ်အရာမၞိဟ်တအ် ပ္တိတ်ဇြဟတ် ရေၚ်တၠုၚ်ဒၟံၚ် အိုတ်အစောန်ရဂှ် ဟီုသ္ဂးလဝ်ရ။

နူအခိၚ်ဒပ်ပၞာန်သီအဝဵုတုဲ ဂဗုတ်ပြိုက်ဂစိုတ်လဝ်ဗွဝ်ကဵုဗွဝ် ညးဍုၚ်ကွာန် (၅)တၠလ္ပာ်လ္တူဂှ် ပ္ဍဲသၞာံ ၂၀၂၁ (၁၁)ဝါ၊ ပ္ဍဲသၞာံ ၂၀၂၂ (၈၅)ဝါ ကေုာံ ပ္ဍဲသၞာံ ၂၀၂၃ ဂှ် (၄၅)ဝါ က္လိလောန်လဝ်ရဂှ် NUG ကဵုလဝ်သမ္တီရ။

ပရိုၚ် – သြၚ်လောန်တိုၚ်(မ်)

ဗီုရုပ် – CJ