ပ္ဍဲကဵုကံၚ်ဇြဳပၞာန် ကလေၚ်ဗလးကဵုတံဂှ် ကောန်ထံၚ်ပရေၚ်ဍုၚ်ကွာန် ပါလုပ်အောန်ဒၟံၚ်ရောၚ် AAPP ပါ်ပါဲပ္တိုန်ဒုဟ်

လ္ဂုၚ်၊ အဝ်ဂါတ် (၃)

ပ္ဍဲကဵုကောန်ထံၚ် ကံၚ်ဇြဳပၞာန် ကလေၚ်ဗလးကဵု နူကဵုထံၚ်စာတ် အလုံမွဲကၟိန်ဍုၚ်တံ ဗ္ဒါဲ (၈၀၀၀) ဂှ် ကောန်ထံၚ်ပရေၚ်ဍုၚ်ကွာန် ပါလုပ်ဒၟံၚ် စဵုကဵုဟွံမွဲ အောန်ဒၟံၚ်တုဲ ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် AAPP တံ ပါ်ပါဲလဝ်ရ။

ကံၚ်ဇြဳပၞာန်ဝွံ ပ္ဍဲကဵုဂိတုအဝ်ဂါတ် (၁) မဒှ်တ္ၚဲဒုတိယဒဂိုန်ပေၚ် နဒဒှ်စၟတ်သမ္တီတ္ၚဲဓမ္မစက်တုဲ ကောန်ထံၚ် မဒးဒုၚ်ဒၟံၚ်ဒုဟ်ဒဏ် နူကဵုထံၚ်စာတ်၊ ထံၚ်ဂုက် ကေုာံ ဗ္ဒိုပ်ကမၠောန် အလုံမွဲကၟိန်ဍုၚ်ဂှ် ၇၇၄၉ တၠဂှ် ကဵုထ္ပက်စၟတ်တဲတုဲ ကဵုလဝ်အခေါၚ်ဗလးနူဒုဟ်ဒဏ်ရ။

ပ္ဍဲကဵုကောန်ထံၚ် ကံၚ်ဇြဳပၞာန် ကလေၚ်ဗလးကဵုတံဂှ် ကောန်ထံၚ်ပရေၚ်ဍုၚ်ကွာန် (၂၀၀) ပြၚ်ဓဝ် ပါလုပ်ဒၟံၚ်ဂှ် ဂွံတီကေတ် အတိုၚ်တၚ်နၚ် AAPP ကလိဂွံလဝ် ပ္ဍဲဂိတုအဝ်ဂါတ် ၂ စဵုကဵုအခိၚ်ဇိုၚ်သဝ်တ္ၚဲဂှ်ရ။

ကောန်ထံၚ်ပရေၚ်ဍုၚ်ကွာန် မကလေၚ်ဗလးကၠုၚ်တံဂှ်လေဝ် ဒှ်ဒၟံၚ်ကောန်ထံၚ် တ္ၚဲသ္ဂောံဗၠး ကြပ်ပေၚ်ဒၟံၚ်သၟးရတုဲ ဗွဲမဂၠိုၚ်ဝွံ သွက်ဂွံဗၠးဂှ် ဒှ်ဒၟံၚ်ရဲသှ်ေဒၟံၚ် ၂ ဂိတု၊ ၃ ဂိတုတံသၟးရ။

ညးတာလျိုၚ် နူကဵုဂကောံရီုဗၚ်မၚ်မွဲကောန်ထံၚ်ပရေၚ်ဍုၚ်ကွာန် AAPP မွဲတၠဂှ် ကံၚ်ဇြဳပၞာန် ဗလးကဵုကောန်ထံၚ်တံဂှ်ဝွံ သွက်ဂွံဗဂေတ်လှန် လညာတ်ဗွိုၚ်ဍုၚ်သ္အာၚ်တံတုဲ ကၠောန်လဝ်ဏောၚ်ဂှ် ပါ်ပါဲလဝ်ရ။

“ဗလးကဵု ကောန်ထံၚ်ပရေၚ်ဍုၚ်ကွာန်ဂှ် နူတမ်တေံ ရပ်လဝ်မၞိဟ် ရပ်ဟွံထေက်တံဂှ်တုဲ ကလေၚ်ဗလးကဵုလဝ်ရ။ မွဲပၠန်ဂှ် ဗလးကဵုကောန်ထံၚ်ပရေၚ်ဍုၚ်ကွာန်တံဟီုဂှ် သွက်ဂွံဝေၚ်ပရေၚ်ဍုၚ်ကွာန် ကုဍုၚ်သ္အာၚ်တံဂှ်တုဲ ရပ်လဝ် နဒဒှ်ဒၞန်ရဏောၚ်။ ဂကောံပၞာန်ဂှ် ညံၚ်ကဵုရဲတံၚ်ရပ်မၞိဟ်တုဲအာတ်သြန်တံဂှ်ကီု ရပ်လဝ်ကောန်ထံၚ်ပရေၚ်ဍုၚ်ကွာန်တံလၟိုန်ဏောၚ်။ နွံပၟိက်ကၠုၚ် သ္ဒးဝေၚ် ပ္ဍဲမုက်လိက်ဍုၚ်သ္အာၚ်တံမွဲမွဲမ္ဂး ဗလးကဵုကောန်ထံၚ်ပရေၚ်ဍုၚ်ကွာန်တံညိည၊ ဖအောန်ဖျေံကဵုဒုဟ်ဒဏ်တံဂှ် တၠအဝဵုပၞာန်တံ ကၠောန်ဒၟံၚ်လၟိုန်ဏောၚ်။ လၟုဟ်လေဝ် သာ်ဏံရ သွက်ဂွံဝေၚ်ပြယာဲ အကြာဍုၚ်သ္အာၚ်တံဂှ်တုဲ ဗလးကဵုလဝ် ကောန်ထံၚ်ပရေၚ်ဍုၚ်ကွာန်တံရ” သာ်ဝွံ ညးသ္ဂးရ။

ကံၚ်ဇြဳပၞာန် ကလေၚ်ဗလးကဵုလဝ် ကောန်ထံၚ် ဗ္ဒါဲ (၈၀၀၀) ပြၚ်ဂှ်ဝွံ ကုဒဝ်အံၚ်သာန်ကျဳဂှ် ဖအောန်ဖျေံကဵုလဝ် သွက် (၅) ဂဗုတ် ဒဏ်ထံၚ် ၆ သၞာံ၊ သမ္မတဥူဝေန်မျေတ်ဂှ် ဖအောန်ဖျေံကဵုလဝ် သွက် (၂) ဂဗုတ် ဒဏ်ထံၚ် (၄) သၞာံရ။

သ္အာၚ်နူဂှ်ပၠန် ကောန်ဍုၚ်သ္အာၚ် ၁၂၅ တၠ မဒးဒၟံၚ်ထံၚ်တံဂှ်လေဝ် ကဵုလဝ်အခေါၚ်ဗၠးနူဒုဟ်ဒဏ်တံတုဲ ကောန်ထံၚ်ပရေၚ်ဍုၚ်ကွာန် မဒးဒုၚ်ကဵုလဝ်ဒဏ်ဂစိုတ်တံဂှ်လေဝ် ပြံၚ်လှာဲကဵုလဝ်ဒုဟ် ဒဏ်ထံၚ်မွဲအာယုက်ရ။

ကံၚ်ဇြဳပၞာန် မကလေၚ်ဗလးကဵုလဝ် ကောန်ထံၚ်ပရေၚ်ဍုၚ်ကွာန်တံဂှ်ဝွံ ကုမၞိဟ်ဟီုဂးပါ်ပါဲဒၟံၚ်ဍေံတံ၊ မၞိဟ်ထံက်ဂလာန် PDF, CRPH, အလဵုအသဳညဳသၟဟ်ဂကူ NUG တံဂှ် အရိုဟ်ဒဒှ်တ္ၚဲ တပ်စုတ်ၝောံပိုဒ်နာနာတုဲ ရပ်ဒက်ဖျေံဒၟံၚ်ထံၚ်ရ။

အတိုၚ်စရၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP တံဂှ်မ္ဂး ကောန်ထံၚ်ပရေၚ်ဍုၚ်ကွာန် ဆက်တုဲမဒးရပ်ဒၟံၚ် အလုံမွဲကၟိန်ဍုၚ်တံဂှ် နွံဒၟံၚ် ဗ္ဒါဲ (၂၀၀၀၀) ရောၚ် ပ္ဍဲဂိတုအဝ်ဂါတ် (၁) တေံ လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−MOI