မတ်မလီု၊ အဝ်ဂါတ် (၃)
ညံၚ်ၚုဟ်ဖျာအပ္ဍဲဍုၚ်ဂွံစှ်ေဂးတုဲ ကံၚ်ဇြဳပၞာန် ၜိုန်ရဒက်လဝ်ကမ္မတဳၚုဟ်ဖျာသ္ဂောံညိၚ်ကီုလေဝ် နတဲဏံ စိုပ်တရဴဟွံမာန်ပုဟ်ဂှ် တၠကမၠောန်ပရေၚ်ပိုန်ဒြပ်တံကဵု သၟာဗၞိက်တံ ပါ်ပါဲလဝ်ရ။
ကံၚ်ဇြဳပၞာန်ဂှ် ညံၚ်ညးဍုၚ်ကွာန်တံ ပရေၚ်စသုၚ်မံၚ်စံၚ် ဂွံပြေပြံၚ် သွက်ဂွံရေၚ်တၠုၚ်ထိၚ်ဒဝ် ပရေၚ်ၚုဟ်ဖျာဂွံညိၚ် ပါလုပ်သီုကဵုၚုဟ်ဗၞိက်စၞစသ္ဇိုၚ်တံဂှ်ဂးတုဲ ပ္ဍဲဂိတုဂျောန် ၂၇ တေံ ဒက်ပ္တန်လဝ် ကမ္မတဳၚုဟ်ဖျာသ္ဂောံညိၚ် ကဆံၚ်ကၟိန်ဍုၚ်ရ။
နကဵုကမ္မတဳၚုဟ်ဖျာသ္ဂောံညိၚ်ဏံ သွက်ၚုဟ်သ္ၚု၊ ၚုဟ်ကၠေၚ်စ ကေုာံ ၚုဟ်ကပေါတ်ဗၞိက်အရပ်စပ်ဖဴ မဒှ်ကပေါတ်စၞစသ္ဇိုၚ်တံ ဂွံညိၚ်ဝတ်ဂှ် သွက်ဂွံရေၚ်တၠုၚ်ကဵုက္ဍိုပ်ဂှ်ကီု၊ ဒေသညးကုညး ညံၚ်ၚုဟ်ဖျာဂွံညိၚ်ဝတ် သွက်ပရေၚ်ပံၚ်ဖျပ်ပ္ညဳပ္ညဳတံဂှ်တုဲ သွက်ဂွံဒက်ဂကောံတံဒှ်တမ် ဖျေံစၟတ်လဝ် လၟေၚ်ကမၠောန် ၁၀ သာ်ရ။
တၠကမၠောန်ပရေၚ်ိပုန်ဒြပ်မွဲတၠဂှ် နကဵုကံၚ်ဇြဳပၞာန် ကမ္မတဳသာ်လဵုဒက်က် လ္တူၚုဟ်မးသြန်ဗၟာ စှ်ေဒၟံၚ်ဏံဂှ် သောၚ်ကလးဟွံမာန်ဏီဂှ်ရ သွက်ၚုဟ်ဖျာဂွံညိၚ်ဝတ် ကၠောန်ဟွံမာန်ပုဟ်ဂှ် ပါ်ပါဲလဝ်ရ။
“နကဵုဍေံတံ မုကမ္မတဳဒက်က် အဓိကဂှ်တှ်ေ ညံၚ်ၚုဟ်သြန်ၝာတ်ဂွံစှ်ဂှ်ေ ဒးဖျေံဏောၚ်။ ၚုဟ်သြန်ၝာတ်ဂှ် မွဲၝာတ် ဒှ်အာ (၁၀၀) ယျလေဝ်။ ကၠာတေံဂှ် (၈၅) ၝာတ်ရဏောၚ်။ အေ ဂှ်တှ်ေ ဟိုတ်နူတိုန်အာ ၁၅ တၟံကၠံဂှ်ရ ညံၚ် ၁၅ တၟံကၠံဏံ ဂွံစှ်ေ ဂှ် ကၠောန်သာ်လဵုရော။ ၚုဟ်ဒဝ်ဠာဂှ် ဒှ်အာ (၃၃၀၀) ယျလေဝ်။ တိုန်အာၜိုတ် (၁၀) တၟံကၠံတုဲ ဟိုတ်နူနှေန်လှာဲသြန်ဍုၚ်သ္အာၚ်တိုန်အာဂှ်ရ လုကဴၚုဟ်မးသြန်ဗၟာစှ်ေဒၟံၚ်ဏံမ္ဂး ၚုဟ်ဖျာဂှ်တိုန်ဒၟံၚ်ဟဂှ်ရဏောၚ်။ ၚုဟ်သြန်ဗၟာ စှ်ေဒၟံၚ်တုဲ မၞိဟ်တံဂှ် ဒးသုၚ်စောဲဒၟံၚ် ကဵုသြန်ဗၟာသၟးဟွံသေၚ်ပုဟ်လေဝ်။ ဒးရပ်စပ်ဒၟံၚ်သြန်ဍုၚ်သ္အာၚ်ကီုတုဲ မၞိဟ်လှာဲလှုဲဍုၚ်သ္အာၚ်တံဂှ် ဝေၚ်ဒၟံၚ်ရ။ အဓိကဂှ်တှ်ေ ဒးယှအ်ဖျေံကဵု မူဝါဒတံဏောၚ်၊ တုဲမ္ဂး ညံၚ်ၚုဟ်မးသြန်ဗၟာဇကု ၚုဟ်မးဂွံတိုန်ဂှ် ဒးကၠောန်ဏောၚ်။ ယှအ်ဖျေံကဵု ပွပတေၚ်ဂြတ်လဝ်တံဂှ်တုဲ ညံၚ်သြန်ဗၟာဇကု ၚုဟ်ဂွံတိုန် ကၠောန်ကဵုမ္ဂး ပြေပြံၚ်အာဏောၚ်” သာ်ဝွံ သ္ဂးရ။
ကံၚ်ဇြဳပၞာန်ဂှ် သွက်ၚုဟ်ဖျာဂွံညိၚ် ၜိုန်ရဒက်လဝ်ကမ္မတဳကီုလေဝ် ဒဵုကဵုအခိၚ်လၟုဟ် ၚုဟ်ဖျာတံ စှ်ေကၠုၚ်ဟွံမွဲဏီတုဲ ဒၟါနူကဵုအသိၚ်အလိုန် သြန်စက္ခူ တၞး ၂၀၀၀၀ ဂှ်တုဲလေဝ် ၚုဟ်ကပေါတ်ဗၞိက်သ္ဇိုၚ်တံ ထပ်သၠုၚ်တိုန်ကၠုၚ်ဒၟံၚ် သိုက်က်ရ။
ဟိုတ်နူသြန်စက္ခူ တၞး ၂၀၀၀၀ ဒ္ကေဝ်ဂှ်တုဲ ၚုဟ်ထဝ်ကဵု ၚုဟ်ဒဝ်ဠာတံ ဟွံကလေၚ်စှ်ေတုဲ ဆက်နွံဒၟံၚ်ၚုဟ်သၠုၚ်ၚ်ဖိုဟ်ဂှ် တၠကမၠောန်ထဝ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဟိုတ်နူအသိၚ် သြန်တၞး ၂၀၀၀၀ ဂှ်တုဲ ၚုဟ်ဖျာတံဂှ် တိုန်အာလွာဲဂှ်ရ။ ညအ်ဂှ် ဟွံကလေၚ်စှ်ေဟဂှ်ရ။ ဒှ်ဒၟံၚ်စဵုကဵုအခိၚ်လၟုဟ်ရ။ ၚုဟ်ထဝ်ဂှ် (၃၅၇၀၀၀၀) ဟွံကလေၚ်စှ်ေဟဂှ်ရ။ ၚုဟ်သၠုၚ်ၚ်ဂှ် ဍေံတံဟွံဂြဲဖျေံမွဲသာ် ဒှ်ဒၟံၚ်ညံၚ်ကဵုပတေၚ်လဝ်ၚုဟ်ဂှ်ရ။ ၚုဟ်ဒဝ်ဠာဂှ်လေဝ် သာ်ဏံကီုရဏောၚ်။ ၚုဟ်သြန်ဗၟာဂှ်လေဝ် ပြဟ်ဟ်ဏံ ယဝ်ရၜတ်ကဵုၚုဟ်ထဝ်ဂၠးတိမ္ဂး သၠုၚ်ဒၟံၚ် ၜိုတ် (၅) ဠက်ဏီဏောၚ်။ လၟုဟ်တော်ကဵု ၚုဟ်ဒဝ်ဠာ (၃၄၀၀) ရဂှ် ၜိုတ် (၅) ဠက်ဂှ် သၠုၚ်ဒၟံၚ်ဏီဏောၚ်။ ညိၚ်ဒၟံၚ်နကဵုၚုဟ်သၠုၚ်ၚ်ဂှ်တုဲ ညံၚ်ဂွံညိၚ်ဒၟံၚ်အဏံဂှ်လေဝ် ကၠောန်ဒၟံၚ်အတေၚ်အိုတ်ရ” သာ်ဝွံ သ္ဂးရ။
ညံၚ်ၚုဟ်ဖျာဂွံညိၚ်ဝတ် လ္ပာ်ကံၚ်ဇြဳပၞာန် ၜိုန်ရကၠောန်လဝ်ကီုလေဝ် ပ္ဍဲကဵုဗွဝ်ဖျာသ္ၚု အပ္ဍဲဒေသဂှ် သ္ၚုမောဝ်မွဲရိုက် နူကဵု (၈၇၀၀၀) ဒ္ကေဝ်ဂှ် ၚုဟ်သၠုၚ်တိုန်ကၠုၚ် စဵုကဵုဗ္ဒါဲမွဲကိုဋ်ဒ္ကေဝ်တုဲ သ္ၚုကြံၚ် (ဧည့်မထ) ဂှ်လေဝ် မွဲရိုက်ဂှ် ၚုဟ်သၠာ်တိုန်အာ စဵုကဵု (၇၀၀၀၀) ဒ္ကေဝ်ရ။
သ္အာၚ်နူဂှ်ပၠန် ကပေါတ်ဗၞိက်သ္ဇိုၚ်ဂမၠိုၚ် မပ္တံကဵု ကၠေၚ်၊ သ္ၚု၊ ဂဥုဲ၊ ၜဵုတံဒှ်တမ် အရာတံဏံလေဝ် တန်တဴကဵု လ္တူဂကူအဇာကပေါတ်ဗၞိက်တံတုဲ နူကဵု (၃၀၀၀) ဒ္ကေဝ်ဂှ် ၚုဟ်ထပ်သၠုၚ်တိုန်ကၠုၚ် စဵုကဵုပွဳပွူ (၁၀၀၀၀) ဒ္ကေဝ်ရ။
ညးဗြဴတၠသ္ၚိမွဲတၠဂှ် ဟိုတ်နူၚုဟ်ဖျာက္ဍၚ်ကၠုၚ်တုဲ ထပ်တုဲဒးဆေၚ်ဒၟံၚ်မုက်ကဵု အကာဲအရာပရေၚ် စသုၚ်မံၚ်စံၚ်သ္ၚိကၟိန်တံ ကြေပ်ဂြတ်ကၠုၚ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“နူတမ်တေံလေဝ် စသုၚ်ဟွံရုမ်ဂပ်ဒၟံၚ်ဂှ် တၞး ၂ ဠက်တိတ်တုဲ သာပရေံအာရ။ ၚုဟ်ဖျာက္ဍၚ်ကၠုၚ်ဂှ် သာ်လဵုဂွံပရော။ ကၠာတေံ စသ္ၚုခိုဟ်တှ်ေ လၟုဟ် ဒးစသ္ၚုကြံၚ်ရ။ ကၠာတေံ စသွစာၚ်တှ်ေ လၟုဟ်စခရံက်ကဵုကၞပ်။ ၚုဟ်ဖျာဂှ်တှ်ေ သ္ၚုမ္ဂး ကၠာတေံဂှ် ၜိုတ် (၃၀၀၀) ဂှ် ရာန်စဂွံဒၟံၚ်ဏီ။ လၟုဟ်မ္ဂး သ္ၚုခိုဟ်မ္ဂး (၅၀၀၀) ပြၚ်ဒၟံၚ်ဏောၚ်။ ကၠေၚ်မ္ဂးလေဝ် ဒးရာန်ဒၟံၚ် ၜိုတ် (၁၀၀၀၀) ရ။ ကသိုန်ဗ္တာၚ်၊ မြေက်၊ တဂဝ်တံဂှ်လေဝ် သာ်ဏံကီုရ အရာရာအိုဿီု ၚုဟ်ဂှ်တိုန်ဒၟံၚ်တုဲ အခက်အခုဲဂှ်နွံအာရ။ ပြဟ်ဟ်ဏံ ၜိုတ်ဂွံစဂွံသုၚ်ဂှ် တၟာလှ်ေရ” သာ်ဝွံ သ္ဂးရ။
ကံၚ်ဇြဳပၞာန်ဂှ် သွက်ၚုဟ်ဖျာဂွံညိၚ်ဝတ်ဂးတုဲ ပ္ဍဲဒၞါဲပလံၚ်ဗစိုပ် ကပေါတ်ဗၞိက်တံဂှ် ခရိတ်ယိုက်ဏာနၚ်တံ အိုတ်ဂၠိုၚ်ကီု၊ ကဆံၚ်အကြာကြာတံ ဂၠိုၚ်ဂၠေၚ်သၟးဟွံက ပ္ဍဲဂၠံၚ်တရဴပလံၚ်ဗစိုပ်တံဂှ် ဟွံမွဲပၟိက်မွဲသာ် ညံၚ်ဂွိုအ်ဒှ်ထိၚ်ဒက်တံဂှ် သွက်ဂွံကဵုက္ဍိုပ်ရေၚ်တၠုၚ်ဂှ် စၞောန်ပ္ညုၚ်လဝ်ရ။
သ္အာၚ်နူဂှ်ပၠန် ဗၞိက်ဂေတ်ဂြိပ် ညံၚ်ဂွံဒှ်လၟေၚ်ၚ်တုဲ ရုမ်မ်ဂပ်ပ် ညံၚ်ဂွံလုပ်မာန်ဂှ်ကီု၊ ဟိုတ်နူဘဲအန္တရာယ်သဘာဝတုဲ ဗၞိက်စၞစသုၚ်သ္ဇိုၚ်တံကဵု ၚုဟ်ဂဥုဲဇဗတံ သၠုၚ်တိုန်ကၠုၚ်ကီု၊ ဝေၚ်ၚုဟ်ဖျာတံကဵု ကပေါတ်ပိုတ်အိုတ် အပ္ဍဲဗွဝ်ဖျာတံ ညံၚ်ဂွိုအ်ဒှ် သွက်ဂွံဒစးဒုၚ်စဳဇန်ဂှ်လေဝ် ဖျေံလဝ်လၟေၚ်ကမၠောန်တံရ။
တၠပညာပရေၚ်ပိုန်ဒြပ်တံဂှ် ဟိုတ်နူပရေၚ်တက်ပ္တိတ် သြန်စက္ခူ တၞး ၂၀၀၀၀ ကံၚ်ဇြဳပၞာန်တံဂှ်တုဲ သြန်ဖောဝ်ကဵု ဒမြိပ်ကမၠောန်ကၟိတ်ဟွံမွဲ သၠုၚ်တိုန်ကၠုၚ်မာန်တုဲ ဘဲဒဏ်ၚုဟ်ဗၞိက်ဖျာဇၞော် သၠုၚ်ကဵုဆတံဂှ် ညးဍုၚ်ကွာန်တံ ထပ်ဒးဒုၚ်စသိုၚ်မာန်ရောၚ် သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media
sanlontai