(ဘုတ်ပြၚ်း) ၊ အဝ်ဂါတ် (၃)
ရးဒေသဇၞော်တၞၚ်သဳ၊ ပွိုၚ်ဍုၚ်(ဘုတ်ပြၚ်း) ၊ ဒၟံၚ်ကွာန်ထံၚ်မန် ဂြောဝ်ဂတာ ၃ တၠ ဒးဒုၚ်ပန်ဂစိုတ်ကဵု သေနာတ်ဂှ်ရ ညးမဒှ်မိကဵုအပါဂှ် ချိုတ်တုဲ ညးမဒှ်ကောန်ဗၠာဲဂှ် ကလိဂွံလဝ်ဝပ် သ္ကာတ်မြဟ်ရောၚ် ညးဒုၚ်တာလျိုၚ် ပကဖ ရးဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုအဝ်ဂါတ် (၁) ၜိုတ်အခိၚ်ဗ္တံ (၉) နာဍဳဂှ် သၟာသေနာတ် (၂) တၠ လုပ်စိုပ်ကၠုၚ် ပ္ဍဲကဵုသ္ၚိဒၟံၚ် ဥူခေန်မာၚ်လွေန် အာယုက် ၆၈ သၞာံ ပ္ဍဲကဵုကၠအ် ဒၞါဲဂြောဝ်ဂတာညးမမံၚ်ဒၟံၚ်ဂှ်တုဲဂှ် ပန်ဂစိုတ်ဏာလဝ် ကဵုသေနာတ်ရ။
ဟိုတ်နူဒးဒုၚ်ပန်လဝ် ကဵုသေနာတ်ဂှ်ရ ဥူခေန်မာၚ်လွေန်ဝွံ ကလိဂွံလဝ်ဝပ် ပ္ဍဲကဵုဗုၚ် ကေုာံ သြိုဟ်တံဂှ်တုဲ၊ သမ္ဘာညး ဒဝ်မျေတ်ခိုၚ် အာယုက် ၆၀ သၞာံဂှ် ဒးအာလဝ်ဝပ် ပ္ဍဲကဵုသြိုဟ် ကေုာံ ဇုတ်ကၞၚ်ကအ်လ္ပာ်ပုၚ်တံဂှ်တုဲ ချိုတ်အာလဝ် ဒၞါဲဂှ်ရ။
ကိုဝ်ကျဝ်ဝ်လွေန် ညးမဒှ်ကောန်ဗၠာဲ အာယုက် ၂၄ သၞာံဂှ်ဝွံ ဟိုတ်နူကလိဂွံလဝ်ဝပ် ဗွဲမသ္ကာတ်မြဟ်ဂှ်ရ ဒးပလံၚ်ကဵုလဝ် ရုၚ်ဂဥုဲညးဍုၚ်ကွာန် ပွိုၚ်ဍုၚ်(ဘုတ်ပြၚ်း) ရောၚ်ဂှ် ဂွံတီကေတ်ရ။
ပရေၚ်ဂြောဝ်ဂတာပိတၠ ဒးဒုၚ်ပန်ဂစိုတ်ဂှ်ဝွံ ၜိုန်ရဂွံမိၚ်ကေတ် ဒှ်ကိစ္စပူဂဵုကီုလေဝ် လၟေၚ်ဒဒှ်ဗွဲလစှ်ေ ဂှ် ဆက်ဂၠိုက်ဂၠါဲဒၟံၚ်ရောၚ် ညးဒုၚ်တာလျိုၚ် ဂကောံစဵုဒၞါညးဍုၚ်ကွာန်တံ သ္ဂးအိုတ်ရ။
တုဲကၠုၚ် ပ္ဍဲဂိတုဂျာန္နဝါရဳ ၁၃ တေံဂှ်လေဝ် ပ္ဍဲကဵုပွိုၚ်ဍုၚ်(ဘုတ်ပြၚ်း) သ္ကဲဂၠံၚ်အာကွာန်ယှာန်ကိုဝ် ဗ္ဒါဲကွာန်( ရွာဟေ့လူ) ဂှ် မၞိဟ်တြုံ ၈ တၠ ၜိုန်ရဒးဒုၚ်ဂစိုတ်လဝ်ကီုလေဝ် ဒဵုကဵုအခိၚ်လၟုဟ် တၠတဲဟွံမံက်ဏီ ဒှ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
sanlontai