ပ္ဍဲဗေကျေန် အပ္ဍဲပွိုၚ် ၁၄၀ သၞာံ ဗြဲဂူသ္ကာတ်အိုတ် က္တဵုဒှ်လဝ်

ဗေကျေန်၊ အဝ်ဂါတ် (၃)

ဗြဲဂူဆက်ဒၟံၚ် ပ္ဍဲဍုၚ်ဗေကျေန် အပ္ဍဲတ္ၚဲအကြာဏံတံဂှ်ဝွံ ကြဴနူဗြဲရိုပ်အိုတ် မဂူကၠုၚ်လဝ် လောန်ကၠုၚ် ၁၄၀ သၞာံတေံတုဲဂှ် ဒှ်သ္ကာတ်အိုတ်ရောၚ် ဌာနဗြဲကျာဍုၚ်ဂှ် ဟီုဂးလဝ် ပ္ဍဲဂိတုအဝ်ဂါတ် (၂) တေံရ။

“ဗ္ၜတ်ဍာ်ဗြဲသၠုၚ်အိုတ် မစၟတ်သမ္တီလဝ် အပ္ဍဲလဗိုတ်ကျာဏံဂှ် ဗ္ဒါဲကၟာကြိုၚ်ဍာ် ဝါန်ဂျာယောန် မၞုံချာန်ပေန်ဂှ် ဗ္ၜတ်ဍာ်ဗြဲ နွံလဝ် စဵုကဵု (၇၄၄ ဒဿမ ၈) မဳလဳမဳတာရ” သာ်ဝွံ ဌာနဗြဲကျာဗေကျေန် သ္ဂးလဝ်တုဲ ဗ္ၜတ်ဍာ်ဗြဲဏံဝွံ အပ္ဍဲပွိုၚ် ၁၄၀ သၞာံဂှ် ဒှ်လဝ်ဗြဲသ္ကာတ်မြဟ်အိုတ်ဂှ် ဟီုဂးလဝ်ရ။

လဗိုတ်ကျာဒတ်သူရဳ သူပါတိုၚ်ဝှောန်ဂှ်ဝွံ ကြဴနူလုပ်စိုပ်ပိုက် တွဵုရးဖူဂျဳအာန် သ္ကုတ်သၠုၚ်ကျာဖဳလေတ်ဖေန်တုဲဂှ် ပ္ဍဲသတ္တာဟတုဲကၠုၚ်တေံ လုပ်စိုပ်တတ်အာလဝ် ဍုၚ်ကြုက်ရ။

ပ္ဍဲကဵုဒၞါဲပွဳပွူ ကြပ်ကဵုဍုၚ်ဇၞော်ဂှ် ပ္ဍဲတ္ၚဲသ္ၚိသဝ်တေံ ဗြဲရိုပ်ဂူလဝ်တုဲ အပ္ဍဲပွိုၚ် ၄၀ နာဍဳ ဗြဲမဂူလဝ် ပ္ဍဲဍုၚ်ဗေကျေန်ဂှ် ကြပ်ဒှ်အာ စဵုကဵုဗ္ၜတ်ဍာ်ဗြဲ မဂူလဝ် သွက်ဂိတုဂျူလာၚ် ပွိုၚ်မွဲဂိတုရ။

ပ္ဍဲကဵုလာၚ်ရုပ်ရမျာၚ် CCTV ကၟိန်ဍုၚ်ပိုၚ် မထ္မံက်ထ္ၜးလဝ် ပ္ဍဲတ္ၚဲအၚာဂှ် ဟိုတ်နူဗြဲဂူဂှ်တုဲ ပ္ဍဲဗေကျေန် တဲဍိုန် မၞိဟ် (၁၁) တၠ ချိုတ်လဝ်တုဲ ပ္ဍဲကဵုညးတံဂမၠိုၚ် ၜါတၠဂှ်ဝွံ ဒှ်ကောန်ကလောန်ဟံၚ်ပြာ်တံရောၚ်ဂှ် ဂွံတီကေတ်ရ။

မၞိဟ် (၁၃) တၠ ကၠေံဒၟံၚ်ဖိုဟ်ကီုလေဝ် ဒဒှ်ရဂွံကလေၚ်ဆဵုလဝ် (၁၄) တၠ ဟွံမွဲကဵုအန္တရာယ်ဂှ် ဂွံတီကေတ်ရ။

ပ္ဍဲကဵုတွဵုရးဇိုၚ်ဝုတ်ဒိုဟ် တွဵုရးဟာဗဳ မဒးဆုဲပြံၚ်လဝ် မၞိဟ် (၈) ကိုဋ်ပြၚ် ဒၞါဲဗၠးဘဲဂှ် မၞိဟ် (၉) တၠ ချိုတ်တုဲ (၆) တၠ ဒဒှ်ရကၠေံဒၟံၚ်ဂှ် ဂွံတီကေတ်ရ။

ပ္ဍဲကဵုတွဵုရးသ္ကုတ်ဨသာန်မွဲဂှ်လေဝ် ပ္ဍဲသတ္တာဟတုဲကၠုၚ်တေံ ဒဒှ်ရမၞိဟ်ချိုတ်ဒၟံၚ်ၜါတၠဂှ် ဂွံလဝ်ပရိုၚ်တုဲ ဟိုတ်နူဗြဲဂူဂှ်တုဲ သွက်ဂွံဟံၚ်ပြာ် ကုမၞိဟ်ကၟာတ်ဒးဒၟံၚ် ဟွံသေၚ်မ္ဂး မၞိဟ်မကၠေံဒၟံၚ်တံဂှ် သွက်ဂွံပ္တိတ်ဇြဟတ်အိုတ်ဂှ် သမ္မတယှဳကျေန်ဖျေန် ဖ္တိုက်ဖ္အောဝ်လဝ်ရ။

ဍုၚ်ကြုက်ဝွံ က္ညၚ်ဏံ ရာသဳဥတုဖံက်ပလန် ကေုာံ ဗ္ၜတ်ဂမ္တဴလောန်ၜက်သၞောတ်ဗ္ၜတ်တံ သၠုၚ်တိုန်ကၠုၚ်ဒၟံၚ်တုဲ ဒဒှ်ရရာသဳဥတု သာတုဲပရေံကၠုၚ်ဒၟံၚ်ဂှ် တၠပညာသိပ္ပံတံ သ္ဂးလဝ်ရ။

ပ္ဍဲကဵုဗ္ဒါဲရေၚ်ၜဳသ္ကုတ်ဗၟံက် ဍုၚ်ကြုက်ဂှ် တိုၚ်ဝှောန်ခါနာမ် မဒှ်လဗိုတ်ကျာ မရနုက်ကဵုဆဌမ ပ္ဍဲကဵုသၞာံဏံဂှ်ဝွံ အခါလၟုဟ် ဒဒှ်ရလုပ်စိုပ်အာ အပ္ဍဲဍုၚ်ဏောၚ်ဂှ်လေဝ် လလောၚ်ပ္တိတ်လဝ် တၚ်ကဵုသတိရ။

Ref: CNA