ကောန်ထံၚ်ပရေၚ်ဍုၚ်ကွာန်(ဗြဴ) ပ္ဍဲထံၚ်စာတ်သာယာဝတဳတအ် ဒးဒုၚ်ၜုၚ်တက်ကၟာတ်လဝ်ဂၠံတိုက်

သာယာဝတဳ – အဝ်ဂေတ်(၄)

ရးဒေသဗဂေါ၊ ကောန်ထံၚ်ပရေၚ်ဍုၚ်ကွာန်(ဗြဴ) ဒးဒုၚ်ထိၚ်ဒက်လဝ် ပ္ဍဲထံၚ်စာတ်သာယာဝတဳ (၁၅)တၠဂှ် နကဵုတၚ်စောတ်စောဲ ကၠောန်ဗဒှ်လဝ် တ္ၚဲအာဇာနဲတုဲ ဒးဒုၚ်ၜုၚ်တက်ပျဲပျာဲကၟာတ်လဝ်ဂၠံတိုက်ရဂှ် ဇာနှိက်ကောန်ထံၚ်ပရေၚ်ဍုၚ်ကွာန် ဆေၚ်ရာကဵုကၟိန်ဍုၚ်ဗၟာ ဟီုသ္ဂးလဝ်ရ။

ကောန်ထံၚ်ပရေၚ်ဍုၚ်ကွာန် (ဗြဴ) (၁၅)တၠတအ်ဂှ် စုတ်လဝ်ဇုက်သုတ် အရံၚ်သာ်လမ္စံက် ပ္ဍဲသြိုဟ် နဒဒှ်စၟတ်သမ္တီ တ္ၚဲအာဇာနဲ ဟီုတုဲစောတ်စောဲ ၜုၚ်တက်ပျဲပျာံလဝ်တုဲ ဒးဒုၚ်ကၟာတ်လဝ် ဂၠံတိုက်ရ။

ကောန်ထံၚ်ဒးဒုၚ်ကၟာတ်လဝ် ဂၠံတိုက်တအ်ဂှ် ဒှ်ညးဒုၚ်ဖျေံလဝ်ဒဏ်ထံၚ် နၝောံပိုဒ်ပရေၚ်ဍုၚ်ကွာန် နူကဵုဒဏ်ထံၚ်ပိသၞာံ စဵုကဵုထံၚ်မွဲတ္ကအ် မွဲအာယုက်တအ်တုဲ သ္ပတံနူအာယုက် (၁၈)သၞာံ စဵုကဵုအာယုက် (၆၀)သၞာံ ပါလုပ်ဒၟံၚ်ရဂှ် ဂွံတီကေတ်ရ။

“ပိုဲဂွံတီလဝ် နူညးက္လေၚ်ဗၠးတိတ်ကၠုၚ်တအ်ရ။ လ္ၚဵုဂှ်လေဝ် ကဵုဘဲဝပ်ဒးဒုၚ်ၜုၚ်တက်ပျဲပျာံလဝ် ပ္ဍဲကဵုဂှ်တှ်ေ ဒဝ်ယျဳယျဳသွေဟီုဂှ် အာယုက် (၆၀) ပြၚ်ဒၟံၚ်ယျ။ နူကဵုတ္ၚဲအာဇာနဲတေံရ ဒးဒုၚ်ကၟာတ်လဝ်ဂၠံတိုက်ရ”ဂှ် ညးတာလျိုၚ်ဇာနှိက် ကောန်ထံၚ်ပရေၚ်ဍုၚ်ကွာန် ဆေၚ်ရာကဵု ကၟိန်ဍုၚ်ဗၟာမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

သ္အာၚ်နူဂှ်ပၠန် ကောန်ထံၚ်ဒးဒုၚ်ကၟာတ်လဝ်ဂၠံတိုက်တအ်ဂှ် မ္ၚးနူၝောံပိုဒ်ပလီုလျုၚ်ကၟိန်ဍုၚ်တုဲ ဒှ်ညးဒးဒုၚ်စောတ်စောဲလဝ် နကဵုၝောံပိုဒ်ပ္ကီုပရာပ်ဖံက်ခတိုဟ်ရဂှ် ညးဟီုသ္ဂးလဝ်ရ။

ပ္ဍဲကၟိန်ဍုၚ်ဗၟာ နူကာလဂိုဝ်ဝေတ်တေံ ဟိုတ်နူဒးဒုၚ်တာဒၞာလဝ် အခေါၚ်လုပ်ဆဵုဂဗကောန်ထံၚ်တုဲ အခိၚ်လၟုဟ်ဏံ ပိုၚ်ခြာလဝ် အခေါၚ်ဆဵုဂဗကောန်ထံၚ်တအ်ရ။

ကောန်ထံၚ်ဒးဒုၚ်ကၟာတ်လဝ်ဂၠံတိုက် ပ္ဍဲထံၚ်သာယာဝတဳတအ်ဂှ် ဒှ်မနှေန်လေအ်နန္ဒာလွေန်၊ မယွှောန်အိဖျူ၊ မနဳလာသုၚ်၊ မသုယျဳပိုၚ်၊ မဝတ်ယျဳလွေန်၊ မအေသဳတာကျဝ်၊ မယျဳယျဳသွေ၊ မလွေန်လွေန်ညောံ(က) အာဂျာ၊ မစန္ဒဳညောအ်၊ မအေတေတ်ဇြာန်၊ မယှိုဲယျဳညောအ်(က) တေဝ်တေဝ်၊ မယမေန်ထေတ်ဝေ၊ မမျိုဝ်တာန္တာထောန် ကေုာံ မမိုဝ်မျေတ်တဇြေန်တအ် ရဂှ် ဇာနှိက်ကောန်ထံၚ်ပရေၚ်ဍုၚ်ကွာန်ဆေၚ်ရာကဵုကၟိန်ဍုၚ်ဗၟာ လလောၚ်တြးလဝ်ရ။

အတိုၚ်စရၚ် ဂကောံမၚ်မွဲရံၚ်စံၚ်ကောန်ထံၚ်ပရေၚ်ဍုၚ်ကွာန် (AAPP) မ္ဂး အလုံမွဲကၟိန်ဍုၚ် ကောန်ထံၚ်ပရေၚ်ဍုၚ်ကွာန် ဒးဆက်ဒုၚ် ထိၚ်ဒဝ်လဝ် မၞုံဗ္ဒာဲ ၂၀,၀၀၀ ရဂှ် လလောၚ်တြးလဝ် ပ္ဍဲဂိတုအဝ်ဂေတ် စၟတ်တ္ၚဲ(၁)ရ။

ပရိုၚ်-သြၚ်လောန်တိုၚ်(မ်)

ဗီုရုပ် – CJ