နေပျဳဒဝ်၊ အဝ်ဂေတ်(၄)
ကံၚ်ဇြဳပၞာန်သီအဝဵု ထပ်ဂလိုၚ်ပ္တိုန်လဝ် အာယုက်ကာလကာတၟေၚ် ပွိုၚ်(၆)ဂိတုပၠန်ဂှ် ကြဴနူပလေဝ်ပလေတ် ဒက်ပ္တန်လဝ် ညးလုပ်ဂကောံကံၚ်ဇြဳလ္ၚဵုတုဲဂှ် ပလှ်ဖျေံလဝ် ဝန်ဇၞော်ကၟိန်ဍုၚ်ကီု သီုပူဂဵုကဆံၚ်လ္တူလ္ၚဵုတအ် နူကဆံၚ်ဌာနန္တရ ရဂှ် လလောၚ်တြးလဝ် ပ္ဍဲဂိတုအဝ်ဂေတ် စၟတ်တ္ၚဲ(၂)ရ။
အတိုၚ်သၞောဝ်သ္ဇိုၚ်ဒက်ပ္တန်သၞောဝ်ဥပဒေ ၂၀၀၈ ၝောံပိုဒ် ၄၁၉ ညးလုပ်ဂကောံကံၚ်ဇြဳ ဥူမောၚ်ကိုဝ် ကေုာံ ဒံက်တာအောၚ်ကျဝ်မေန်တအ်ဂှ် ပလှ်ဖျေံလဝ် နူတာလျိုၚ်တုဲ ဒံက်တာကျဝ်ထောန်ဂှ်မ္ဂး ပြံၚ်စၠောံစွံလဝ် နဒဒှ်ညးလုပ်ဂကောံကဵုက္သပ်ဗဟဵုရ။
ဂအုပ်ဥပဒေပၞာန်တြေံ ဥူထောန်ထောန်ဥူ ကေတ်လဝ်တာလျိုၚ် နဒဒှ်ဂအုပ်နာဲဗ္စာကၟိန်ဍုၚ် နူလက်ထက်သမ္မတဥူတုၚ်ဇြုၚ် စဵုကဵုကာလဒပ်ပၞာန်သီအဝဵုဏံဂှ် နကဵုတၚ်ထ္ၜးဟိုတ်ပရေၚ်ထတ်ယိုတ် ကံၚ်ဇြဳပၞာန် သ္ပကဵုလဝ်အခေါၚ်ဒေါံဇူရ။
သ္အာၚ်နူဂှ်ပၠန် ဂအုပ်စၟတ်စရၚ်ကၟိန်ဍုၚ် ဥူတေန်ဥူ၊ ဥက္ကဋ္ဌကဝ်မယှေန်ဗတိုက်သရိုဟ်ဂဗုတ်အဂတိ ဒံက်တာဌေအောၚ် ကေုာံ ဥက္ကဋ္ဌကဝ်မယှေန်အခေါၚ်အရာမၞိဟ်ကောန်ဂကူ ဥူလှမျေတ်တအ်လေဝ် ပလှ်ဖျေံလဝ် နူကဆံၚ်ဌာနန္တရ လဂွံကဵုပရေၚ်ထတ်ယိုတ်ရ။
ဥူကိုဝ်ကိုဝ် နူဌာနဝန်ဇၞော်ပရေၚ်သာသနာ ကေုာံပရေၚ်ယေန်သၞာၚ် မဒှ်ဝန်ဇၞော်ကၟိန်ဍုၚ် ဂကောံအလဵုအသဳကံၚ်ဇြဳပၞာန်ကီု၊ ဥူတောၚ်ဟာန် နူဌာနဝန်ဇၞော်ဇြဟတ်ဓာတ်လလဳကီု၊ ဥူမျိုဝ်မျေအ်ဥူ နူဌာနဝန်ဇၞော်ဇြဟတ်သဘာဝ ကေုာံ ဒံက်တာပွိသာန် နူဌာနဝန်ဇၞော်သၟာကမၠောန်တအ်ဂှ်လေဝ် ကဵုဒေါံဇူလဝ်ရ။
အခိၚ်ပြဟ်ဟ်လၟုဟ်ဏံမ္ဂး ပ္ဍဲဒၞာဲညးဒးဒုၚ်ကဵုဒေါံဇူလဝ်တအ်ဂှ် စရၚ်ယၟုဝန်ဇၞော်ကၟိန်ဍုၚ် ကေုာံသၞာဲဒဴကဆံၚ်လ္တူ ဂွံဒုၚ်ခါန်ကၞက်ပၠုပ်အဇာဂှ် လ္ပာ်ကံၚ်ဇြဳပၞာန် လလောၚ်တြးလဝ် ဟၟဲဏီရ။
ပ္ဍဲဂကောံကံၚ်ဇြဳပၞာန်ဂှ် က္ဍိုပ်သ္ကိုပ်ပၞာန်သီအဝဵု ဂအုပ်သ္ကိုပ်ဗိုလ်ဇၞော်မေန်အံၚ်လှာၚ်ဂှ် အတိုၚ်ဌာနန္တရ ဥက္ကဋ္ဌကေတ်လဝ်နူအခိၚ်ကၠာတေံဂှ် ဆက်နွံဒၟံၚ်တုဲ ဂအုပ်ဗိုလ်သၞာဲဒဴဒပ်ပၞာန် ကေတ်လဝ်ဌာနန္တရကဆံၚ်လ္တူတအ်ဂှ် ပရေၚ်ပြံၚ်သၠာဲဟၟဲ ဆက်နွံဒၟံၚ်ရ။
ဇၟာပ်ပ်ထပ်ကေတ်ဂလိုၚ်ပ္တိုန်အာယုက်ကာလကာတၟေၚ် ညးလုပ်ဂကောံကံၚ်ဇြဳတအ် ဝန်ဇၞော်ဂကောံအလဵုအသဳတအ် ကေုာံ ပူဂဵုမၞုံကဆံၚ်ဌာနန္တရတအ်ဂှ် အတိုၚ်သၞောဝ်သ္ဇိုၚ်ဒက်ပ္တန် ၝောံပိုဒ် ၄၁၉ ကံၚ်ဇြဳပၞာန် ပြံၚ်သၠာဲဌာနန္တရ ကဵုဒေါံဇူ ကၠောန်သ္ပဒၟံၚ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – MOI
sanlontai