ပ္ဍဲတွဵုရးကရေၚ်ဍာဲ ကံၚ်ဇြဳပၞာန် ဗပေၚ်ဒၟံၚ်ဇွောံမလွဟ်လက်နက် ကဵုကွဳစက်ပၞာန် (၁၀၀)ဖ္ဍိုက်ပြၚ်

လွိုၚ်ဂဝ် – အဝ်ဂေတ်(၄)

ပ္ဍဲတွဵုရးကရေၚ်ဍာဲ ပရေၚ်ပၞာန်ကြံၚ်မ္ၚိုဟ် က္တဵုဒှ်ဒၟံၚ်ဂှ် ဒပ်ကံၚ်ဇြဳပၞာန် သုၚ်စောဲကွဳစက်ပၞာန် (၁၀၀)ဖ္ဍိုက်ပြၚ်တုဲ ထပ်ဗပေၚ်ဒၟံၚ် လွဟ်လက်နက် ဇွောံမတအ်တုဲ ဒပ်စဵုဒၞာညးဍုၚ်ကွာန်တအ် ကြတ်ဗတိက်ဒၟံၚ်ရဂှ် ဂအုပ်ပၞာန် KNDF ဟီုသ္ဂးလဝ်ရ။

နူဂိတုဂျူလာၚ် စၟတ်တ္ၚဲ (၂၅)တုဲကၠုၚ်တေံ စဵုကဵုစၟတ်တ္ၚဲ (၂၇)ဂှ် နူသ္ကုတ်သၠုၚ်ကျာတွဵုရးသေံ ပလံၚ်ဗစိုပ်ဒၟံၚ်နကဵုကွဳစက်ပၞာန် အကြာ (၄၀)ဖ္ဍိုက်ကဵု (၅၀)ဖ္ဍိုက် အရိုဟ်ဒဒှ်တ္ၚဲရဂှ် ဂွံတီကေတ်ရ။

အခိၚ်လၟုဟ်ဏံ ရေၚ်ကွဳစက်ကံၚ်ဇြဳပၞာန်ဂှ် စိုပ်ဒၟံၚ် ဒပ် ခ.လ.ရ (၅၄) ဖျေံသ္ဇိုၚ်လွိုၚ်ဂဝ်တုဲ ရေၚ်ကွဳစက်ဂှ် မွဲဖ္ဍိုက်မ္ဂး ၜိုတ် (၁၀)တၠဟေၚ် ဖ္ဍိုက်နၚ်လဝ်တုဲ ပလံၚ်ဗစိုပ်ဒၟံၚ် လွဟ်လက်နက်မကမ်တအ်အဓိကရဂှ် ဂအုပ်ပၞာန် KNDF ခူယျဳဒူ ဟီုသ္ဂးလဝ်ရ။

“အခိၚ်ဗ္တံ ၜိုတ် (၇) နာဍဳ ဒှ်ဏောၚ်။ ပိုဲပလီုပလာ်ကွဳစက်ကံၚ်ဇြဳပၞာန် (၂) တုဲစံၚ်လဝ်ရ။ ၜိုတ်ဏံရ ပိုဲသ္ပမာန်။ ထေၚ်လဝ်မွဲဂှ်တှ်ေ သွက်အရၚ်ရာသဳယးတၟး ကၠုၚ်စိုပ်ဏံလေဝ် ပါ။ အကွက်ကသီုဏံလေဝ် ပါရ။ အခိၚ်ကသီုလေဝ် သွက်ဂွံကလေၚ်ဗပေၚ်ဇွောံမမာန်ဂှ် ပါဒၟံၚ်ဏောၚ် ပိုဲခယျကေတ်ရ”ဂှ် ညးဟီုသ္ဂးလဝ်ရ။

သ္အာၚ်နူဂှ်ပၠန် ပ္ဍဲဂိတုဂျူလာၚ် စၟတ်တ္ၚဲ (၂၄) အခိၚ်ဗ္တံဂှ်လေဝ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် နကဵုရေၚ်ယာဉ်ကွဳစက်ဂှ် ဒပ်ပံၚ်ကောံ KNDF တအ် ကြတ်ဗတိုက်လဝ် အကြာကုမ်တာကဵု ကွာန်ဝါယျဳကဝ်ခူ ဂၠံၚ်ဇၞော်ကၟိန်ဍုၚ်ရဂှ် ညးဟီုသ္ဂးလဝ်ဏီရ။

ဟိုတ်နူကြတ်ဗတိုက်လဝ်ဏံ ကောန်ဒပ်ကံၚ်ဇြဳပၞာန်လ္ၚဵု ဒးချိုတ်လဝ်တုဲ လွဟ်လက်နက်မကမ်တအ်လေဝ် သီဂွံလဝ်တုဲ ကွဳစက်ပၞာန် (၂)ဖ္ဍိုက်လေဝ် ပလီုပလာ်မာန်လဝ်ရဂှ် ဂွံတီကေတ်ရ။

ကြဴနူပေါဲဗတိုက် အကြာရေၚ်ကွဳစက်ကံၚ်ဇြဳပၞာန်ကဵု ဒပ်ပံၚ်ကောံ ဒပ်ပၠန်ဂတးတအ် ဒှ်လဝ်ပွိုၚ်(၈)တ္ၚဲဆက်ဆက်တုဲဂှ် လ္ပာ်ကံၚ်ဇြဳပၞာန် ဒးချိုတ်လဝ် ဟွံအောန်နူ (၂၀)တၠနွံတုဲ သီဂွံလဝ် MA-1 (၅) ဒကိုအ်၊ MA-(2) စက်ဍောတ် (၁) ဒကိုအ်၊ MA-3 (၂) ဒကိုအ် သီုမကမ် ကေုာံ ကပေါတ်အရပ်စပ်ပၞာန်တအ်ရဂှ် ဂွံတီကေတ် အတိုၚ်တၚ်လလောၚ်တြး KNDF ရ။

အတိုၚ်တၚ်လလောၚ်တြး ဂကောံဇြဟတ်ညးဍုၚ်ကွာန်ကရေၚ်ဍာဲမ္ဂး ပ္ဍဲပေါဲဗတိုက်တွဵုရးကရေၚ်ဍာဲဂှ် ကွဳစက်ကံၚ်ဇြဳပၞာန် စဵုကဵု (၆၄) ဖ္ဍိုက်ဒးဒုၚ်ဗတိုက်လဝ်တုဲ က္ၜၚ်ကျာပၞာန်မွဲဖ္ဍိုက်လေဝ် ဒးဒုၚ်ဗတိုက်လဝ်ရဂှ် ဂွံတီကေတ်ရ။

ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲ သ္ကုတ်လကြဴဏံ ပေါဲဗတိုက်ဆေၚ်မုက် ပ္ဍဲတွဵုရးကရေၚ်ဍာ်ဂှ် လ္ပာ်ကံၚ်ဇြဳပၞာန် ဒးချိုတ်လဝ် စဵုကဵု (၂၂၃၀)တၠဂှ်ရ ထပ်ဗပေၚ်ဒၟံၚ်ဇြဟတ် သီုကဵုတံဒပ်တၟိတအ် အဆက်က်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – KNDF