တာန်တောၚ်ဂျဳ၊ အဝ်ဂေတ်(၄)
ပ္ဍဲဒေသယာဒိုဝ် တိဍာ်ဒပ်မဟာ (၂) ခရိုၚ်တံၚ်ဥူ KNU ဂှ် ဟိုတ်နူဒပ်ပၞာန်ပ္တဝ်လဝ်လ္တူကောန်အရာပ်ညးဍုၚ်ကွာန်တုဲ ပန်ပှော်ဒၟံၚ်ကဵု က္ၜၚ်ကျာဂှ်ရ သွက်ညးဍုၚ်ကွာန်ပါဲဘဲပၞာန်တအ် နွံဒၟံၚ်ပၟိက်အရီုဗၚ်ဇွောံမနဒဒှ်ကာတၟေၚ်ရဂှ် ဂွံတီကေတ် အတိုၚ်တၚ်လလောၚ်တြး KNU ကေုာံ ဂကောံအခေါၚ်အရာမၞိဟ်ကရေၚ် KHRG ရ။
တိဍာ် KNU ဒပ်မဟာ (၂)၊ ပွိုၚ်ဍုၚ်တာန်တောၚ်ဂျဳ၊ ပ္ဍဲကွာန်ဝါတဝ်ခိုဝ် ဂကောံကွာန်ထဳတာသဝ်ဂှ် ပ္ဍဲဂိတုဂျူလာၚ် စၟတ်တ္ၚဲ (၁၈)တုဲကၠုၚ်တေံ ဒပ်ကံၚ်ဇြဳပၞာန် ဗတိုက်လဝ်ကဵုက္ၜၚ်ကျာ ဗၞတ် (၂)ဝါနွံတုဲ ဟိုတ်နူပရေၚ်ဗတိုက်ပန်ဏံ မ္ၚးနူဘာကျာ်တုဲ သ္ၚိဒၟံၚ်ညးဍုၚ်ကွာန်တအ် ဒးဇီုကပိုက်လီုလာ်လဝ်နွံရဂှ် KHRG လလောၚ်တြးလဝ်ရ။
ကၠာနူပရေၚ်ဗတိုက်ပန်ကဵုက္ၜၚ်ကျာကံၚ်ဇြဳပၞာန် ဟွံဂွံက္တဵုဒှ်ဏီဂှ် ဟိုတ်နူဂြိပ်ဒဴပါဲဓလေတ်ဒၟံၚ်ဂှ်ရ ၜိုန်ရပရေၚ်ဇီုကပိုက် ဒးချိုတ်လဝ် ဟၟဲကီုလေဝ် ဟိုတ်နူဒှ်ဓဝိၚ် ဂွိၚ်ဖေက်ထပ်ဗတိုက်ကၠုၚ်ကဵုက္ၜၚ်ကျာပၠန်တုဲ ကောန်ကွာန်ဝါတဝ်ခိုဝ် သီုကွာန်ဗ္ဒာဲဗ္ဒာဲဂှ် ၂,၀၀၀ ပြၚ်တအ် ထောံသ္ၚိဌာန်တုဲ ဒးဂြိပ်ဒဴပါဲဓလေတ်ဒၟံၚ်ရ။
အခိၚ်လၟုဟ်ဏံ သွက်ကောန်ကွာန်ဒးဂြိပ်ဒဴပါဲဓလေတ်ဒၟံၚ်တအ်ဂှ် နွံဒၟံၚ်ပၟိက်အရီုဗၚ်ဗ္စာရဏာပရေၚ်မၞိဟ် မပ္တံကဵုစၞစ၊ ဒၞာဲဇူမံၚ် ကေုာံ ဂဥုဲဇဗတအ်ဖိုဟ်ဏီရဂှ် KHRG လလောၚ်တြးလဝ်ရ။
အတိုၚ်တၚ်လလောၚ်တြး KNU လလောၚ်တြးလဝ်မ္ဂး ပ္ဍဲဒေသယာဒိုဝ်၊ ပွိုၚ်ဍုၚ်တာန်တောၚ်ဂျဳ၊ ဒပ်မဟာ (၂) ခရိုၚ်တံၚ်ဥူဂှ် ပ္ဍဲဂိတုဂျူလာၚ် စၟတ်တ္ၚဲ (၁၁)တုဲကၠုၚ်တေံ ပေါဲဗတိုက်သ္ကာတ်မြဟ် က္တဵုဒှ်လဝ်တုဲ ပ္ဍဲပေါဲဗတိုက်ဂှ် ဒပ်ကံၚ်ဇြဳပၞာန် ဗတိုက်လဝ်ကဵုက္ၜၚ်ကျာ ပ္ဍဲကွာန်ဝါခိုဝ်တဝ် ကေုာံကွာန်တာပ်ကုမ် ၜိုတ် (၃၃)ဝါရ။
ဟိုတ်နူဗတိုက်ဂြာတ်ထောံဖျေံဗုမ်တုဲ စမြိုၚ်ပရေၚ်ဘာသာခရေတ်ယာန် (၂)မ၊ သ္ၚိဒၟံၚ်ညးဍုၚ်ကွာန် (၂၀)မ၊ ဟၚ်သြောံ မွဲဟၚ်၊ တၞံဆုတဵုလွဳဗွဲမဂၠိုၚ် ဒးလီုလာ်ဆောံလေၚ်လဝ်တုဲ အခိၚ်လၟုဟ်ဏံ ညးဍုၚ်ကွာန်ယာဒိုဝ် ၂,၀၀၀ ပြၚ် ဒးဂြိပ်ပါဲဓလေတ်ဒၟံၚ်ဘဲပၞာန်တုဲ နွံဒၟံၚ်ပၟိက်ကဵု ဇွောံမစၞစ၊ ဂဥုဲဇဗ ကေုာံ ကၟဳဗ္ဒၚ် နဒဒှ်ကာတၟေၚ်ရဂှ် ဗဟဵု KNU ဟီုသ္ဂးလဝ်ရ။
ပ္ဍဲတိဍာ်ဒပ်မဟာ (၂) KNU ခရိုၚ်တံၚ်ဥူဂှ် နူဂိတုဂျာန္နဝါရဳ စဵုကဵုဂိတုဂျောန် ပ္ဍဲပွိုၚ် (၆) ဂိတုဏံ အကြာဒပ်ကံၚ်ဇြဳပၞာန်ကဵု KNLA KNDO တအ် လၟိဟ်ပေါဲဗတိုက် (၃၀၄) ဝါက္တဵုဒှ်လဝ်တုဲ ပ္ဍဲပေါဲဗတိုက်ဂှ် ပရေၚ်ဇီုကပိုက်ဒး လ္ပာ်ကံၚ်ဇြဳပၞာန် နွံဂၠိုၚ်လဝ်ရဂှ် ဂွံတီကေတ် အတိုၚ်တၚ်လလောၚ်တြး ဗဟဵု KNU ရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ
sanlontai