ဥူအံၚ်ဝေန် အမာတ် NLD ထဝါဲ မဒးဂြိပ်ဒဴဒၟံၚ် ပြဟ်လလုဲအာ

ထဝါဲ၊ အဝ်ဂါတ် (၄)

ညးစၞးဗော် NLD ပွိုၚ်ဍုၚ်ထဝါဲ၊ ရးဒေသဇၞော်တၞၚ်သဳ ဥူအံၚ်ဝေန် ဒဒှ်ရပြဟ်လလုဲအာ ပ္ဍဲကဵုဂိတုအဝ်ဂါတ် စၟတ်တ္ၚဲ (၃) ဂှ် ညးမစုက်လုက်ကဵု ဂြောဝ်ဂတာညးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဥူအံၚ်ဝေန် အမာတ် NLD မဒးဂြိပ်ဒဴဒၟံၚ်ဂှ်ဝွံ ပြဟ်လလုဲအာလဝ် နကဵုယဲကေန်သာပါၚ်တုဲ အခိၚ်ပြဟ်လလုဲအာဂှ် အာယုက် ၆၉ သၞာံမၞုံဂှ် ဂွံတီကေတ်ရ။

ဥူအံၚ်ဝေန်ဝွံ ကြဴနူဒပ်ပၞာန်သီအဝဵုတုဲ ဟိုတ်နူဒးဒုၚ်ပံက်လဝ်ဂဗုတ် နကဵုၝောံပိုဒ်ရာဇာသာတ်ဇၞော် ၅၀၅ (က) ဂှ်ရ ထောံလသာဒေသထဝါဲတုဲ ဒးဂြိပ်ဒဴဒၟံၚ်ရ။

ဥူအံၚ်ဝေန် အမာတ်ဗော် NLD မဂွံလဝ်ဇၞး ပ္ဍဲကဵုပေါဲရုဲမာဲ သၞာံ ၂၀၁၅ ကဵု ၂၀၂၀ သီုၜါဝါဂှ်ဝွံ အပ္ဍဲဒေသထဝါဲဂှ် ဒှ်မၞိဟ်ညးဂမၠိုၚ်ဒးစိုတ်ဂၠိုၚ်မွဲတုဲ ကၠာဂွိုအ်ဒှ်ညးစၞးဂှ် ဒတူလိုၚ်ကၠုၚ်လဝ် နဒဒှ်အ္စာဘာကျူယှေန်မွဲရ။

ပ္ဍဲဒေသရးဒေသဇၞော်တၞၚ်သဳဂှ် ကြဴနူဒပ်ပၞာန်သီအဝဵုတုဲ ဟိုတ်နူပရေၚ်ရပ်ဒက် တပ်စုတ်ၝောံပိုဒ်နာနာသာ်တံဂှ်တုဲ အဃောဒးပါဲဒလေတ်ဒၟံၚ် ပြဟ်လလုဲအာဂှ် ညးစၞး နွံကၠုၚ် စဵုကဵု (၃) တၠယျဂှ် ဂွံတီကေတ် ဇရေၚ်ညးမစုက်လုက်ကဵု ဗော် NLD တံရ။

ပရိုၚ်−သြၚ်လောန်တိုၚ်(မ်)

ဗီု−Social Media