ၜဳကလေၚ်၊ အဝ်ဂါတ် (၄)
တွဵုရးဍုၚ်မန်၊ ပ္ဍဲပွိုၚ်ဍုၚ်ၜဳကလေၚ်ဂှ် ဟိုတ်နူဗြဲဂူဆက်ဒၟံၚ်ဂှ်တုဲ ဍာ်ဇၞော်ဍာ်ကလိုပ်က္တဵုဒှ်ဒၟံၚ်ဂှ်ရ သွက်ညးဍုၚ်ကွာန်ဒးဘဲဍာ်တံဂှ် ဒးပံက်လဝ် ဗ္ဒိုပ်ဟံၚ်ပြာ်ညးဒးဘဲဍာ် (၁၀) မရောၚ်ဂှ် ဂွံတီကေတ် နူကဵုဂကောံရီုဗၚ်ဟံၚ်ပြာ်မှာဇန်တံရ။
ဟိုတ်နူဗြဲဂူလဝ် သ္ကာတ်တ်ဂှ်ရ ဍာ်ၜဳ ၜဳကလေၚ်ဝွံ ပပ္တံနူဂိတုအဝ်ဂါတ် (၂) တုဲ ဟိုတ်နူၜက်ကၠုၚ် ဗ္ၜတ်ဍာ်ကၟိုဟ်မာန် ၃၀ သေန်တဳမဳတာပြၚ်ဂှ်ရ ပ္ဍဲကဵုကွာန်တိသဝ်ဝ်တံကဵု အရာပ်လ္တူဍုၚ်လ္ၚဵုတံဂှ် ဒးဆေၚ်ဒၟံၚ်မုက်ကဵု ဍာ်ဇၞော်ဍာ်ကလိုပ် ကေုာံ ဍာ်ဗၠိုက်ကြပ်အလုံကွာန်မွဲတံဂှ်ရ။
ဟိုတ်နူဍာ်ဇၞော်ဍာ်ဗၠိုက်ဏံတုဲ ညးဒေသနူကဵုကွာန် နှေန်ပဠေဝ်၊ ယှိုဲလှေ၊ ဒံၚ်သောန်၊ ကျုၚ်ဖာန်၊ ကျဳပေန်၊ အလူလေဝ်၊ သပျေနဳတံသၟးဟွံက သီုကဵုအရာပ်သယာဇြာန်၊ ဘိုဝ်လှကျဳ၊ ဘိုဝ်ရာဇာ၊ ကာန်သာယာ မဒှ်အရာပ်တိသဝ်ဝ် မၞုံလ္တူဍုၚ်ၜဳကလေၚ်တံ ဂၠိုၚ်ကဵုလ္ၚီဂှ်လေဝ် ဒးဂဗဒၟံၚ်ဘဲဍာ်တံအိုတ်ရ။
ဟိုတ်နူပရေၚ်ဍာ်ဇၞော်တံဏံဂှ်တုဲ ပ္ဍဲကဵုဘာဗ္တောန်လိက် ကေုာံ ဘာလကျာ် နူကဵု (၅) အရာပ် လ္တူဍုၚ်ၜဳကလေၚ်တံဂှ် ပံက်လဝ် ဗ္ဒိုပ်ဟံၚ်ပြာ် (၁၀) ဒၞါဲတုဲ မၞိဟ်ကၠုၚ်စိုပ်မံၚ်တန်တဴဂှ် နွံဒၟံၚ် ဗ္ဒါဲ ၅၀၀ ဂှ် ညးတာလျိုၚ် ဂကောံရီုဗၚ်ဟံၚ်ပြာ်မှာဇန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကုညးဍုၚ်ကွာန်ဒးဘဲဍာ်တံဂှ် ဂကောံဟံၚ်ပြာ်မှာဇန်တံကဵု ညးဍုၚ်ကွာန်ဒေသတံ ၜိုန်ရဗီုညးကုညး ကဵုဒၟံၚ်ဒါန် စၞစစၞသုၚ် မပ္တံကဵုသ္ၚုတံ နွံဒၟံၚ်ကီုလေဝ် သွက်ဂွံဂွံအရီုဗၚ်ကံၚ်ဇြဳပၞာန်ဂှ် စဵုကဵုဟွံမွဲ အောန်ကြဳဒၟံၚ်ရ။
ဆ္ဂး ဂကောံအုပ်ဓုပ်ကံၚ်ဇြဳပၞာန်ဂှ် ပ္ဍဲဂိတုအဝ်ဂါတ် (၄) ဏံ သွက်ဂွံကလေၚ်ရုပ်သီ ဗ္ဒိုပ်ဟံၚ်ပြာ်ဘဲဍာ်တံဂှ် စၞောန်ပ္ညုၚ်ကၠုၚ်လဝ်ရောၚ် ဂွံတီကေတ် အတိုၚ်ဂလာန် ညးဍုၚ်ကွာန်ဒးဘဲဍာ်တံရ။
ဍာ်ၜဳ ၜဳကလေၚ်ဂှ်ဝွံ အတိုၚ်ၜတ်ကၞာတ်လဝ် ပ္ဍဲဂိတုအဝ်ဂါတ် ဇိုၚ်သဝ်တ္ၚဲ (၃) နာဍဳဂှ်မ္ဂး လ္တူနူကဵုဗ္ၜတ်ဍာ်ကၟိုဟ်မာန် ၁၀၂၂ သေန်တဳမဳတာဂှ် လောန်ၜက်ဒၟံၚ် ၂၆ သေန်တဳမဳတာဏီရ။
တွဵုရးဍုၚ်မန်ဝွံ လၟေၚ်သၞာံ ဒးဒုၚ်စသိုၚ်ဒၟံၚ် ဘဲအန္တရာယ်ဍာ်ဇၞော် ကေုာံ တိလာ်ဒဵုလာ်တံဂှ်တုဲ ပ္ဍဲကဵုဘဲသဘာဝ မက္တဵုဒှ်လဝ် သၞာံ ၂၀၁၉ တေံဂှ် အပံၚ်လၟိဟ်မၞိဟ် ဗ္ဒါဲ (၇၀) ချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai