ညးဂြိပ်ဒဴပါဲဒဴဘဲပၞာန် အပ္ဍဲပွိုၚ်ၜါသတ္တာဟဏံ ထပ်ဂၠိုၚ်တိုန်ကၠုၚ် စဵုကဵု (၂၀၀၀၀) ပြၚ်

လ္ဂုၚ်၊ အဝ်ဂါတ် (၄)

ဟိုတ်နူပဋိပက္ခရပ်လွဟ် မက္တဵုဒှ်ဒၟံၚ် ပ္ဍဲရးကရေၚ်၊ ကရေၚ်ဍာဲ ကေုာံ ရးဗဂေါ မဒှ်ဒေသသ္ကုတ် သၠုၚ်ကျာဍုၚ်ဗၟာဂှ်တုဲ ညးမဒးဂြိပ်ဒဴပါဲဒလေတ်ဒၟံၚ်ဘဲပၞာန်တံ ထပ်ဂၠိုၚ်တိုန်ကၠုၚ် စဵုကဵု (၂၀၀၀၀) ပြၚ်ရဂှ် ပ္ဍဲဂိတုအဝ်ဂါတ် (၂) တေံ နူကဵုရုၚ် UNOCHA လလောၚ်ပ္တိတ်လဝ်ရ။

အပ္ဍဲၜါသတ္တာဟတုဲကၠုၚ်ဏံ ဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဝွံ ပ္ဍဲကဵုသ္ကုတ်ဗၟံက်၊ သ္ကုတ်ဨသာန် ကေုာံ လ္ပာ်သ္ကုတ်နေရတိ ကၟိန်ဍုၚ်တံဂှ် ဟိုတ်နူပေါဲဗ္တိုက်ရပ်လွဟ်တံ ဆက်က္တဵုဒှ်ဒၟံၚ်ဂှ်ရ ညးဒးဂြိပ်ထောံလသာသ္ၚိဌာန်တံ ထပ်နွံကၠုၚ်ဒၟံၚ်ရ။

အပ္ဍဲပွိုၚ်ၜါသတ္တာဟဏံ နူကဵုဒိုဟ်အဂၞဲဍုၚ်ဗၟာဂှ် အပံၚ်လၟိဟ်မၞိဟ် (၂၂၀၀၀) ပြၚ် ထောံလသာသ္ၚိဌာန် ဒးဂြိပ်ဒဴလဝ်တုဲ နွံပၟိက်ဒၟံၚ်ကဵု ပရေၚ်ဗ္စာရဏာမၞိဟ်တံဖိုဟ်ဂှ် UNOCHA ဟီုရ။

သ္အာၚ်နူဂှ်ပၠန် ပ္ဍဲဂိတုဂျူလာၚ် ၂၆ တေံဂှ်လေဝ် ပ္ဍဲတွဵုရးကချေၚ် ပွိုၚ်ဍုၚ်ဝိုၚ်မဝ် ဗ္ဒါဲကွာန်နသာန်ယာန်ဂှ် အကြာဒပ်ကံၚ်ဇြဳပၞာန်ကဵု ဒပ်ပၞာန်ဗၠးၜးကချေၚ် (KIA) တံ ပေါဲဗ္တိုက်သ္ကာတ်မြဟ်လဝ်ဂှ်ရ အပံၚ်လၟိဟ်မၞိဟ် (၇၀၀) ပြၚ်ဝွံ ဒးဆုဲပြံၚ်လဝ် ဒၞါဲဗၠးဘဲတံရ။

အတိုၚ်စရၚ် ကုလသမဂ္ဂ မလလောၚ်ပ္တိတ်လဝ် စဵုကဵုဂိတုဂျူလာၚ် (၂၄) ဂှ်မ္ဂး မၞိဟ်ဒးထောံလသာ သ္ၚိဌာန်အပ္ဍဲဍုၚ် အလုံမွဲကၟိန်ဍုၚ်ဂှ် နွံကၠုၚ်ဒၟံၚ် (၁ ဒဿမ ၉) ပြကောဋိကိုဋ်ပြၚ်ကၠုၚ်ယျတုဲ ပ္ဍဲကဵုဏံ လၟိဟ်မၞိဟ်ဗ္ဒါဲ (၁ ဒဿမ ၆) ပြကောဋိကိုဋ်ဂှ်ဝွံ ကြဴနူဒပ်ပၞာန်သီအဝဵုတုဲ ဟိုတ်နူပဋိပက္ခ မက္တဵုဒှ်ကၠုၚ်တံကဵု ဂီုကၠီုဟွံမွဲတံဂှ်တုဲ ဒှ်ညးဒးထောံလသာသ္ၚိဌာန်တုဲ ဒးဂြိပ်ဒဴပါဲဒလေတ်ဌာန် ဒၟံၚ်တံရောၚ်ဂှ် ဂွံတီကေတ် အတိုၚ်တၚ်လလောၚ်တြး UNOCHA ရ။

ပရိုၚ်−သြၚ်လောန်တိုၚ်(မ်)

ဗီု−Social Media