သွက်ဂွံပလေဝ်ပလေတ် စေဝ်ပၞောန်ပၞာန်ဒုၚ် ဂကောံဒပ်တမ်ဒပ်တံ ချိုတ်တ်ပၠိုတ်တ်ဂှ် ကံၚ်ဇြဳပၞာန် စၞောန်ပ္ညုၚ်လဝ်သ္ၚိတ်တ်

နေဗျဳဒဝ်၊ အဝ်ဂါတ် (၄)

ကံၚ်ဇြဳပၞာန် မဒးဆေၚ်ဒၟံၚ်မုက် ကုဂကောံဒပ်ပၠန်ဂတးရပ်လွဟ်တံ ပ္ဍဲဗလးတိဏံဂှ် နကဵုဂကောံဒပ်၊ တမ်ဒပ်အလုံဍုၚ်မွဲတံ သွက်ဂွံကၠောန်ရေၚ်တၠုၚ်လဝ် ပရေၚ်ပလေဝ်ပလေတ်ပရေၚ်ပၞာန် သွက်ပၞာန်ဒုၚ် ကေုာံ ကိုန်စဳဇန်သၠုၚ်ပ္တိုန်စိုတ်ဓာတ်တံ ချိုတ်တ်ပၠိုတ်တ်ဂှ် စၞောန်ပ္ညုၚ်ကၠုၚ်သ္ၚိတ်တ်ရ။

အပ္ဍဲဂိတုဂျူလာၚ် သတ္တာဟလက္ကရဴအိုတ် တုဲကၠုၚ်ဏံ ပ္ဍဲကဵုကောံဓရီုဒပ်ပၞာန်ကဆံၚ်လ္တူ မကၠောန်ဗဒှ် လဝ်ဂှ် သွက်တမ်ဒပ်ဂမၠိုၚ် ဂွံဒ္ဂေတ်ဗက် တၚ်စၞောန်အစဳဇန် (၁၀) သာ်ဂှ် လလောၚ်ပ္တိတ်ကၠုၚ် နဒဒှ်တၚ်ဓလုက်ရောၚ်ဂှ် ဂွံတီကေတ် နူကဵုဗွိုၚ်ညးမစုက်လုက်ကဵု ဒပ်ပၞာန်တံရ။

ပ္ဍဲကဵုတၚ်စၞောန်ဏံဂှ် ဂကောံဒပ်တမ်ဒပ်တံသီုဖအိုတ် သွက်ဂွံစဵုဒၞါ အန္တရာယ်ဗ္တိုက်နကဵုဒရုၚ် ကေုာံ သွက်ဂွံဒက်ပ္တန်တာဝါဒလုက်တံဂှ်ကီု၊ ရန်ကဵုပရေၚ်ဂီုကၠီုဌာန်ဂအုပ်တမ်ဒပ်တံဂှ်တုဲ ပ္ဍဲကဵုဗ္ဒိုပ်ဒပ်ဂေတ်ကၠောံတံဂှ် သွက်ဂွံၜံက်ခါဲလဝ် မြံၚ်ဆက်စၠောံတံ ကေုာံ အပ္ဍဲကဵုကၟာၚ်ဒပ် ဗ္ဒိုပ်ဒပ်ပၞာန်တံ (၆) ပေဂေတ်ကၠောံဂှ် သွက်ဂွံဗ္ဂပ်စုတ်လဝ် မာၚ်လိုန်၊ မာၚ်ဗ္တိုက်တံဒှ်တမ် မဒှ်ရ။

ကောန်သ္ဂံၚ်၊ ဗၠာဲသၟိၚ်(ဗြဴဗြဴ) ဇြဟတ်အရန်ဂမၠိုၚ် သွက်ဂွံဒ္ဂေတ်ဗက် အတိုၚ်တၚ်စၞောန် စပ်ကဵုပရေၚ် ဂီုကၠီုတံ ချိုတ်တ်ပၠိုတ်တ်ဂှ်တုဲ သွက်ဂွံကၠောန်ဗဒှ်ကဵု ပရေၚ်ပ္ကတ်ပ္ကေၚ် မတေက်လဝ်တံဂှ်ကီု၊ ဗ္ဒိုပ်ဒပ်ဇကုဂှ် စွံစိုတ်ညံၚ်ဂြောဝ်ဂတာဇကုတုဲ သွက်ဂွံမၚ်မွဲရံၚ်စံၚ်အာဂှ်ကီု မပ္တံပရူပရာသာ်ဏံ အခိၚ်ဒးရေၚ်ပၞောန်တံကဵု ပ္ဍဲကဵုပေါဲသဳကၠဳဂြောဝ်ဂတာတံဂှ် နူကဵုသ္ကိုပ်တမ်ဒပ်တံ သ္ကိုပ်သ္ကတုဲ သွက်ဂွံသဳကၠဳအာဂှ်လေဝ် ပါလုပ်ဒၟံၚ်ရ။

လ္ပာ်ကံၚ်ဇြဳပၞာန်တံ လ္တူမစၞောန်ကၠုၚ် ကုကောန်ပၞာန်အပ္ဍဲဒပ်တံ သာ်ဏံဂှ် ညးဒုၚ်တာလျိုၚ် 96 Soliders PDF ဖျေံသ္ဇိုၚ်ဒေသအညာ ကိုဝ်ဇြေယျာလွေန်ဂှ် ညံၚ်ဗ္ဒိုပ်ဍေံတံ ဂွိုအ်ကျအာဂှ် ဒဒှ်ရကဵုက္ဍိုပ်ပလေဝ်ပလေတ်ဒၟံၚ် သွက်ပၞာန်ဒုၚ်ရောၚ်ဂှ် သ္ၚဳဂၠိပ်လဝ်ရ။

“ဍေံတံစိုတ်ဓာတ်စှ်ေဒၟံၚ်ယျဂှ် နကဵုအဲဟွံညာတ်ပုဟ်။ မုဒှ်ရောဟီုတှ်ေလ္ပာ်ဍေံတံဂှ် ပြဟ်ဟ်ဏံ ဒးဇီုကပိုက်ဆောံလေၚ်လဝ်ဂှ် ဂၠိုၚ်ဒၟံၚ်။ ဍေံတံစိုပ်ဒၟံၚ်ကဆံၚ်ပၞာန်ဒုၚ်ဏောၚ်။ ညံၚ်စေဝ်ပၞာန်ဒုၚ်ဍေံတံ ဂွံကၟောန်ဒၟံၚ်ဂှ် ပလေဝ်ဒၟံၚ်ဏောၚ် အဲညာတ်ရ။ မွဲပၠန်ဂှ် အကာဲအရာဍေံတံ ဍေံတံတီလဝ်ဏောၚ် အဲညာတ်ရ။ ဍေံတံစိုပ်ဒၟံၚ် လ္ပာ်စှ်ေယျ။ ဟိုတ်ဂှ်ရ ညံၚ်ဗ္ဒိုပ်ဍေံတံ ဂွိုအ်ကျဗြံအာဂှ် ဍေံတံကဵုက္ဍိုပ်တုဲ ပလေဝ်ပလေတ်ဒၟံၚ် သွက်ပၞာန်ဒုၚ်ဏောၚ်ဂှ် အဲညာတ်ရ” သာ်ဝွံ ညးသ္ဂးရ။

ကံၚ်ဇြဳပၞာန်ဂှ် ကာလလၟုဟ်ဝွံ ဟိုတ်နူဒှ်အခိၚ်ကာလကာတၟေၚ် ဂီုကၠီုကၟိန်ဍုၚ်ဂှ်တုဲ ပရိုၚ်ဗဳဒဳယော ဟွံဆက်စပ်ကဵုဇကုတံဂှ် လ္ပဗဵုအိုတ်ညိဂှ်ကဵု အလဵုဇၞော်သ္ကိုပ်ဂမၠိုၚ် သွက်ဂွံဗက်စၟဳတ်ကောပ်ကာဲ အာဂှ်လေဝ် စၞောန်ပ္ညုၚ်ကၠုၚ်ရ။

ကောန်သ္ဂံၚ်တံချိုတ်အာ၊ ဒးဒုၚ်ရပ်အာ အပ္ဍဲပေါဲဗ္တိုက်တံဂှ်သၟးဟွံက အကာဲအရာဗ္ဒိုပ်မုက်ပၞာန်ဂမၠိုၚ် ဒးကျဗြံအာတံဂှ် ဗဵုကေတ် နူကဵုအောန်လာၚ်သဵုယှေဝ်မဳဒဳယျာတံတုဲ ဖေက်စိုတ်ဓာတ်ပြံၚ်လှာဲအာဂှ်ရ ကၠောန်ကၠုၚ် သွက်ဂွံစၟဳတ်ကောပ်ကာဲသာ်ဏံရောၚ်ဂှ် သၞာဲဒဴပၞာန် CDM တံ ထံက်ထ္ၜးလဝ်အိုတ်ရ။

နကဵုသၞာဲဒဴ၊ သရာဲသဂံၚ်၊ ညးဗ္ဒဗ္ဒါဲဂမၠိုၚ် ဇကုတံဝွံ ဟိုတ်နူဒှ်ဒပ်ပၞာန်ညဳသာကောံကလောံဂှ်ရ သွက်ဂွံ ဗ္တိုက်သၠေက် ထပိုတ်အာရိုဟ်ကၞက် သၞတံဂှ်ကဵု အလုံမွဲကၟိန်ဍုၚ် ဟိုတ်နူဒှ်ဒၟံၚ်အခိၚ်ပြု ပြေၚ်ဒၟံၚ်ပရေၚ် ပၞာန်ဂှ်ရ သၞာဲဒဴပၞာန်၊ ကောန်ဒပ်အကြာပ်၊ ဗိုလ်အကြာပ်တံ အိုဿီု လ္ပရံၚ်ကဵုပရေၚ်ကြံၚ်မ္ၚိုဟ် ခက်ခုဲတံဂှ်တုဲ သွက်ဂွံဒတူလိုၚ်အာဗိုန်န်ဂှ် ကံၚ်ဇြဳပၞာန် ဖ္တိုက်ဖ္အောဝ်လဝ်ရ။

သ္အာၚ်နူဂှ်ပၠန် ညံၚ်ပရေၚ်စသုၚ်အပ္ဍဲဒပ် ဂွံပြေပြံၚ် ပ္ဍဲကဵုဆေၚ်ဖျာအပ္ဍဲဒပ်တံ ညံၚ်စၞစဂွိုအ်ပိုတ်အိုတ်အာ နကဵုသ္ကိုပ်တမ်ဒပ်ဂမၠိုၚ် အာစိုပ်စၟဳတ် ဒၞါဲဗ္ဒမ်တၠအိန်ထံၚ်တံ မွဲဏှမွဲဏှတုဲ ၜိုတ်သ္ပမာန် သွက်ဂွံဖ္ဍိုက်ဗပေၚ်ကဵု တၚ်နွံပၟိက်တံဂှ်ကဵု သွက်ဂွံကဵုအာဇြဟတ်စိုတ်တံဂှ်လေဝ် စၞောန်ပ္ညုၚ်လဝ်ရ။

ဗိုလ်ဇၞော် CDM ကံၚ်တူဝေန်ဂှ် ဟိုတ်နူရန်လဝ် စဵုကဵုတမ်ဒပ်တံ ဒးဒုၚ်လုပ်စိုပ်ဗ္တိုက်ဂှ်ရ ကံၚ်ဇြဳပၞာန် ပလေဝ်ပလေတ်ကၠုၚ်လဝ် သာ်ဏံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“အခိၚ်လၟုဟ်ဂှ် ဟိုတ်နူရန်လဝ် စဵုကဵုတမ်ဒပ်တံ ဒးဒုၚ်ဗ္တိုက်ဏောၚ်ဂှ်ရ ဍေံတံ ပလေဝ်ကၠုၚ်လဝ်သာ်ဏံရ။ ပရေၚ်စိုတ်ဓာတ်ကောန်ပၞာန်တံဂှ်လေဝ် ဍေံတံ ဒးကၠောန်ဒၟံၚ်ဏောၚ်။ ဗွဲတၟေၚ် ပရေၚ်စန်ဒက်အပ္ဍဲဒပ် ပြးထ္ကးအာတုဲ ဇြဟတ်ဒပ်အောန်အာဒၟံၚ်ဂှ်လေဝ် ဍေံတံ ဖေက်ဒၟံၚ်ကွေံကွေံရ။ နူကဵုအပ္ဍဲဒပ် ရဲကဵုပရိုၚ်တံ ကဵုပရိုၚ်ဂှ်လေဝ် ဍေံတံဖေက်ဒၟံၚ်ဏောၚ်။ ဟိုတ်ဂှ်ရ ဒှ်ဒၟံၚ်ဗီုပြၚ် ကဵုသၞာဲဒဴ၊ သ္ကိုပ်ဒပ် ညးတာလျိုၚ်မၞုံအပ္ဍဲတမ်ဒပ်တံ ကောပ်ကာဲလဝ်အတေၚ်ရောၚ် မဒှ်ရ” သာ်ဝွံ ညးသ္ဂးရ။

အခိၚ်လၟုဟ်ဂှ် ကံၚ်ဇြဳပၞာန်ဂှ် အာယုက်ကာလကာတၟေၚ် မလလောၚ်တြးလဝ် ကၟိန်ဍုၚ်ဂှ် ထပ်ကေတ်လဝ် ၆ ဂိတုပၠန်တုဲ ပ္ဍဲကဵုဗ္ဒိုပ်ဒပ်တမ်ဒပ်တံကဵု ရုၚ်ဂီုကၠီုလ္ၚဵုတံဂှ် ဒးဆေၚ်ဒၟံၚ်မုက် ကုပရေၚ်ဗ္တိုက် နူကဵုဂကောံဇြဟတ်ပၠန်ဂတးတံရ။

မွဲလ္ပာ်ပၠန်ဂှ်လေဝ် ဒေသပရေၚ်ပၞာန်ကြံၚ်မ္ၚိုဟ်ဒၟံၚ်လ္ၚဵုတံဂှ်လေဝ် လ္ပာ်ကံၚ်ဇြဳပၞာန်တံ နကဵုဇြဟတ်လၟိဟ်ဗွဲမဂၠိုၚ်ဂၠေၚ် ဟိုတ်နူဗပေၚ်ကၠုၚ်ဇွောံမလွဟ်လက်နက်တံဂှ်တုဲ ပရေၚ်ကြတ်ဗ္တိုက်အကြာ ဂကောံဒပ်စဵုဒၞါဒေသတံကဵု ဂကောံရပ်လွဟ်ကောန်ဍုၚ်အရၚ်လ္ၚဵုတံဂှ်လေဝ် ဒးဒုၚ်ဒၟံၚ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media