သဓီု၊ အဝ်ဂေတ် (၅)
ကောန်ဒပ်စဵုဒၞာညးဍုၚ်ကွာန် PDF နူဗော်သွးကောန်ဂကူကရေၚ် KNU ဒပ်မဟာ (၁) ခရိုၚ်သဓီု (၁၄) တၠ ကၠုၚ်ဖျေံလဝ်လွဟ် သီုလွဟ်လက်နက်ရဂှ် ဓမံက်ထ္ၜးလဝ် ပ္ဍဲအကံက်တေဝ်လဳဂရာမ် တြးဝါဒ ကံၚ်ဇြဳပၞာန်ရ။
PDF (၁၄) တၠတအ်ဂှ် လွဟ်ဇၞော် RPG (၁) ဒကိုအ်၊ မကမ်ခွေန် (၁) မ၊ ကမ်သရိုဟ်ကွဳစက်ခြပ် (၁) မ၊ လွဟ်ဇမၠေံ (၉) မမ ကၠောန်ပ္တိတ်နူအဳတလဳ မွဲဒကိုအ် လုပ်ကၠုၚ်ဖျေံလဝ်လွဟ်ရဂှ် ဟီုသ္ဂးလဝ်ရ။
PDF (၁၄) တၠ ကၠုၚ်ဖျေံလဝ်လွဟ်ဂှ် ပ္ဍဲဂိတုအဝ်ဂေတ် စၟတ်တ္ၚဲ (၄) အခိၚ်နူဂယးဂှ် ပြံၚ်စၠောံပ္အပ်ပြာပ်ကဵုလဝ် ဇရေၚ်ညးအုပ်ဓုပ်ထိၚ်ဒဝ် ပ္ဍဲဌာန်ဂအုပ်ပၞာန် ရးပၞာန်ဒိုဟ်အဂၞဲရဂှ် တြးဒၟံၚ်ဝါဒရ။
ညးတာလျိုၚ် PDF ခရိုၚ်သဓီု ကိုဝ်အေမေန်ထောန်ဂှ်မ္ဂး နူကဵုခရိုၚ်သဓီု KNU PDF လဵုလေဝ် လုပ်ဖျေံလဝ်လွဟ်ဟၟဲ ပရေၚ်ဒဒှ်ဏံ ဒှ်တြးဝါဒသက်က်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
အတိုၚ်ဗီုပြၚ်ထ္ၜးလဝ် ပ္ဍဲတေဝ်လဳဂရာမ် တြးဝါဒကံၚ်ဇြဳပၞာန် PDF လုပ်ဖျေံလဝ်လွဟ်ဟီုဂှ်တှ်ေ ထ္ၜးဟိုတ်နာနာ ရပ်ကေတ်လဝ်မၞိဟ်တုဲ တက်ဗီုတြးဒၟံၚ်ဝါဒ ဒှ်မာန်ရဂှ် ဟီုသ္ဂးလဝ်ရ။
ဂိတုဂျောန်တုဲကၠုၚ်တေံလေဝ် ပ္ဍဲဌာန်ဂအုပ်ရးပၞာန် ဒေသပၞာန်ဒိုဟ်အဂၞဲကံၚ်ဇြဳပၞာန်ဂှ် ဟိုတ်နူ PDF မၞုံပွိုၚ်ဍုၚ်ရေဝ် လုပ်ကၠုၚ်ဖျေံလဝ်လွဟ်တုဲ ဒဒှ်ရကလေၚ်ပ္အပ်ကဵုလဝ် ဇရေၚ်မိမဂှ် ကံၚ်ဇြဳပၞာန်လလောၚ်တြးလဝ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – ချာန်နေဝ်တြးဝါဒကံၚ်ဇြဳပၞာန်
sanlontai