ပခုက္ကူ – အဝ်ဂေတ် (၅)
ရးဒေသမဂွေ၊ ပွိုၚ်ဍုၚ်ပခုက္ကူ ကြဴနူဒပ်စဵုဒၞာညးဍုၚ်ကွာန် ဗတိုက်လဝ် ဗဒိုပ်ဗၠာဲသၟိၚ်ကျာတ်ထိုဝ်တုဲဂှ် ကရောၚ်ပၞာန်ပံၚ်တောဲ ကံၚ်ဇြဳပၞာန် ပျူသဝ်ထဳတအ် စံၚ်ပလီုဒၟံၚ်ကွာန်ဗ္ဒာဲဗ္ဒာဲဂှ်ရဂှ် ညးတာလျိုၚ် ပ.က.ဖ မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဟိုတ်နူကရောၚ်ပၞာန်ကံၚ်ဇြဳပၞာန် စံၚ်ပလီုလဝ် ကွာန်ကျာတ်ပျိ၊ ကျာတ်ထိုဝ်၊ ချောၚ်ခွ၊ ဖလာန်အိုဝ် ကေုာံ ယျေကျဳတအ်ဂှ်ရ ညးဒေသကီု သီုညးဍုၚ်ကွာန် နူကွာန်ဗ္ဒာဲဗ္ဒာဲဂှ် (၁) လ္ၚီပြၚ် ဒးပါဲဒၟံၚ်ဘဲပၞာန်ရ။
အခိၚ်လၟုဟ်ဏံ ညးဍုၚ်ကွာန်ပါဲဘဲပၞာန်တအ်ဂှ် ဟိုတ်နူဒှ်ဒၟံၚ်အခိၚ်ကသီုတုဲ ဒးဆေၚ်ဒၟံၚ်မုက်ကဵု အခက်ခုဲရဂှ် ညးတာလျိုၚ်ဒပ်စဵုဒၞာညးဍုၚ်ကွာန်မွဲတၠ ဟီုသ္ဂးလဝ်ရ။
“ပ္ဍဲပွိုၚ်ဍုၚ်ပခက္ကူ ပျူကဵုစခတအ်ပံၚ်တုဲ ထ္ပက်ကရောၚ်ပၞာန်၊ စံၚ်ပလီုဒၟံၚ်ရ။ နညးပါဲပၞာန်တအ်လေဝ် ဒးဂြိပ်ဒဴပါဲဓလေတ်ဒၟံၚ် နွံဗွဲမဂၠိုၚ်ရ။ ဒေသတၞဟ်လေဝ် ပါဲနူစံၚ်ပလီုဒၟံၚ်ဗီုဏံတုဲ ဖံက်ပ္ကဝ်ဒၟံၚ်အခေါၚ်အရာမၞိဟ် နွံဒၟံၚ်တုဲ ၜိုတ်သ္ပမာန် ဘိုၚ်ရီုဗၚ်ကဵုညိဂှ် မိက်ဂွံဟီုကဵု ညးဍုၚ်ကွာန်တအ်ရ”ဂှ် ပ.က. ဖ ပခုက္ကူ ဟီုသ္ဂးလဝ်ရ။
ညးပါဲပၞာန်တအ်ဂှ် တၚ်နွံပၟိက် ဇွောံမစၞစ၊ ကၟဳဗ္ဒၚ် သီုသွက်ပရေၚ်ထတယိုက် နဒဒှ်ကာတၟေၚ် နွံဒၟံၚ်ရဂှ် ဂွံတီကေတ်ရ။
နူဂိတုအဝ်ဂေတ် စၟတ်တ္ၚဲ (၁)တုဲကၠုၚ်တေံ ဒပ်ပံၚ်ကောံ ဒပ်စဵုဒၞာညးဍုၚ်ကွာန်တအ် လုပ်စိုပ်ဗတိုက်လဝ် ပ္ဍဲဗဒိုပ်ဗၠာဲသၟိၚ်ကျာတ်ထိုဝ်ရ။
ပ္ဍဲပေါဲဗတိုက်ဂှ် ၜိုန်ရလုပ်ဗတိုက်လဝ် ဒဵုကဵုပ္ဍဲဗဒိုပ်ဗၠာဲသၟိၚ်မာန်ကီုလေဝ် ဟိုတ်နူအခိၚ်ဒှ်ပေါဲဗတိုက် လအ်ဒၟံၚ်တုဲ ဒးကလေၚ်ဆုတ်တိတ်လဝ်ဂှ်ရ အကာဲအရာ လ္ပာ်ကံၚ်ဇြဳပၞာန် ဇီုကပိုက်ဒးလဝ် သောဲသောဲဗြောဲဗြောဲ ဟွံဂွံတီဏီရဂှ် ဟီုသ္ဂးလဝ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – ဗီုဂွံညာတ်ကေတ် ကွာန်ဒးဒုၚ်စံၚ်လဝ်ကဵု ဒပ်ပၞာန် ပ္ဍဲပခုက္ကူ (CJ)
sanlontai