ကောန်ပၞာန် ဒးဒုၚ်ပကောံလဝ်ကောန်ဒပ်တၟိ ဗွဲအဓမ္မ မွဲတၠ ကလေၚ်လုပ်ဖျေံလွဟ် ဇရေၚ် PDF မိုဝ်ဗျာ သီုလွဟ်လက်နက်

မိုဝ်ဗျာ – အဝ်ဂေတ်(၅)

ကြဴနူဒးဒုၚ်စန္ဒက်ပကောံလဝ် ကောန်ဒပ်တၟိဒပ်ကံၚ်ဇြဳပၞာန်သီအဝဵု ဗွဲအဓမ္မတုဲ ကောန်ဒပ်ပၞာန် နွံယၟုတေန်တုၚ် ဒးဒုၚ်ပလံၚ်ဗစိုပ်လဝ် ပ္ဍဲဗဒိုပ်မုက်ပၞာန်ဂှ် လုပ်ကၠုၚ်သ္ပ CDM ဇရေၚ်ဒပ်စဵုဒၞာညးဍုၚ်ကွာန် မိုဝ်ဗျာရဂှ် ညးတာလျိုၚ်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဂိတုဂျူလာၚ် စၟတ်တ္ၚဲ (၃)တုဲကၠုၚ်တေံ ဆက်စၠောံကဵု ဒပ်လ္ပာ် တပမ (၃)၊ ဒပ်စဵုဒၞာညးဍုၚ်ကွာန် မိုဝ်ဗျာ (MBPDF)၊ စၟတ်(၁၀၀၁)တုဲ ဒှ်ညးလုပ်ကၠုၚ်ဇူဗ္ဒာဲလဝ် သီုလွဟ်လက်နက်ပေၚ်ၚ်တုဲ ညးဂှ် ဒှ်နူဒပ် ခ.မ.ရ ကံၚ်ဇြဳပၞာန် (၄၂၂) ရဂှ် ဟီုလဝ်ရ။

ကောန်ဒပ်ပၞာန်တေန်တုၚ် ကၠုၚ်ပံၚ်တောဲကဵုညးဍုၚ်ကွာန်ဂှ် ကြဴနူဒးဒုၚ်စန္ဒက်လဝ်ကဵု ညးမွဲတၠ ကဵုကမၠောန် သီုကဵုသြန်ဂိတုဏောၚ်ဟီုတုဲ ဒးဒုၚ်ပလံၚ်လဝ် ပ္ဍဲဒၞာဲပကောံကောန်ဒပ်တၟိ ဗွဲအဓမ္မတုဲ ပ္ဍဲတ္ၚဲစှ်ေဘာတုဲ ပေၚ် (၂)တ္ၚဲဂှ်မ္ဂး ဒးဒုၚ်ပလံၚ်လဝ် ပ္ဍဲဗဒိုပ်မုက်ပၞာန်ရ။

“ဘာတုဲဗက် ဒးဒုၚ်ပလံၚ်နၚ် လ္ပာ်မိုဝ်ဗျာရ။ အခိၚ်ယိုက်ဂၠေၚ်ဒၟံၚ်တာလျိုၚ် ပ္ဍဲဍုၚ်မိုဝ်ဗျာ ဒးစံၚ်ပလီု သ္ၚိဌာန်ညးဍုၚ်ကွာန်၊ ဒးကၠတ်ဂၠံက် ကပေါတ်ကညောတ်ညးဍုုၚ်ကွာန်။ မုဆဵုဆဵုဒးပန်ဒၟံၚ်ရ။ ဂြိုဟ်ပလီုညးဗြဴတအ်တုဲ ဒးပန်ဂစိုတ်ဏောၚ်ဂှ် နူလ္တူတေံ စၞောန်ပ္ညုၚ်လဝ် နွံရ။ ပ္ဍဲဗလးမုက်တိလေဝ် အဲဆဵုလဝ် နမတ်တုဲ သွက်ဂွံလုပ်ဗ္ဒာဲဇရေၚ်ညးဍုၚ်ကွာန်ဂှ် ဖျေံလဝ်သ္ဂုတ်သွာတ်ရ”ဂှ် ကောန်ဒပ်တေန်တုၚ် ဟီုသ္ဂးလဝ်ရ။

သ္အာၚ်နူဂှ်ပၠန် ပ္ဍဲပၠန်ဂတးက္ညၚ် ယဝ်နွံပၟိက်မ္ဂး သွက်ဂွံက္လေၚ်ဗတိုက်ကဵု ဒပ်တၠအဝဵုကံၚ်ဇြဳပၞာန်ဂှ် ညးဂံၚ်ဒုၚ်သၠးဒၟံၚ်လမျီုရဂှ်လေဝ် ညးဟီုလဝ်ဏီရ။

ဒပ်စဵုဒၞာညးဍုၚ်ကွာန် မိုဝ်ဗျာ (MBPDF) စၟတ်(၁၀၀၁)၊ ဒပ်လ္ပာ် (၃) ညးတာလျိုၚ်ဒပ်လ္ပာ်ကျွယ်ချိုဝ်တအ် ထပ်ဖျေံကဵုလဝ်လာဘ် ကောန်ဒပ်ကံၚ်ဇြဳပၞာန် ကၠုၚ်ဖျေံလဝ်လွဟ် လာဘ်သြန် (၂၀)ကိုတ်တုဲ ကောန်ဒပ်ကံၚ်ဇြဳပၞာန် ကၠုၚ်ပံၚ်တောဲကဵု ညးဍုၚ်ကွာန်တအ်ဂှ်လေဝ် ကော်ဘိက်လဝ်ရ။

အခိၚ်လၟုဟ်ဏံ လ္တူဍုၚ်မိုဝ်ဗျာ ဒၞာဲလ္ၚဵုဂှ် ဟိုတ်နူကောန်ဒပ်ကံၚ်ဇြဳပၞာန် ဖျေံလဝ်ဗဒိုပ်တုဲ ပရေၚ်ပၞာန် ကြံၚ်မ္ၚိုဟ်ဒၟံၚ်ကဵု ဒပ်စဵုဒၞညးဍုၚ်ကွာန်တအ်ရဂှ် ဂွံတီကေတ်ရ။

ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲ ကောန်ဒပ်ပၞာန် ဟွံမိက်ယိုက်ဂၠေၚ်တာလျိုၚ် သၟဝ်တၠအဝဵုပၞာန် လုပ်ကၠုၚ်ပံၚ်တောဲကဵု ညးဍုၚ်ကွာန် (၂) ဠက်ပြၚ် နွံဒၟံၚ်ရဂှ် ဓမံက်ထ္ၜးလဝ် ပ္ဍဲတၚ်ဂၞၚ် NUG ရ။

ပရိုၚ် – သြၚ်လောန်တိုၚ်(မ်)

ဗီုရုပ် – PDF – မိုဝ်ဗျာ