အပြံၚ်အလှာဲဝန်ဇၞော်ဂှ် ဒှ်ဒၟံၚ်ကရောၚ်ကရောန် အပ္ဍဲဂကောံပၞာန်တံယျဟာ

နေဗျဳဒဝ်၊ အဝ်ဂါတ် (၅)

ကံၚ်ဇြဳပၞာန် မပပဵုပ္တိုန်လဝ်အာယုက်ကာလကာတၟေၚ် ပြဟ်ဟ်ဏံဂှ် ပြံၚ်လှာဲခါန်ကၞက်လဝ် ဝန်ဇၞော်လ္ၚဵု ပါလုပ်သီုကဵုဝန်ဇၞော်ကာစဵုဒၞါတံဂှ်တုဲ ကလေၚ်ဒက်ပ္တန်လဝ် ဂကောံအလဵုအသဳကၟိန်ဍုၚ်ရောၚ် ပ္ဍဲဂိတုအဝ်ဂါတ် (၃) တေံ လလောၚ်တြးလဝ်ရ။

ပ္ဍဲကဵုဂကောံအလဵုအသဳကၟိန်ဍုၚ် ကံၚ်ဇြဳပၞာန် သီအဝဵု မဒက်ပ္တန်လဝ်ဂှ် ပြံၚ်လှာဲခါန်ကၞက်လဝ် ဝန်ဇေဇၞာ်ကာစဵုဒၞါ သ္ကိုပ်ဗိုလ်ဇၞော် မျထောန်ဥူ နဒဒှ်ဝန်ဇၞော်ပရေၚ်ပလံၚ်ဗစိုပ် ကေုာံ ပရေၚ်ဆက်စၠောံတံဂှ်တုဲ ဝန်ဇၞော်တြေံကၠာတေံ သ္ကိုပ်ဗိုလ်ဇၞော် တေန်အံၚ်သာန်ဂှ် ပြံၚ်လှာဲခါန်ကၞက်လဝ် နဒဒှ်ဝန်ဇၞော်ကာစဵုဒၞါရ။

ဥက္ကဌ ကမ္မတဳသဳကၠဳပရေၚ်ၜိုဟ်လလမ် ကံၚ်ဇြဳပၞာန် ဒုသ္ကိုပ်ဗိုလ်ဇၞော် ယျာပျေအ်ဂှ်လေဝ် ပြံၚ်လှာဲခါန်ကၞက်လဝ် နဒဒှ်ဝန်ဇၞော်ကာအပ္ဍဲဍုၚ်တုဲ ဝန်ဇၞော်တြေံကၠာတေံ ဒုတိယသ္ကိုပ်ဗိုလ်ဇၞော် သဵုထောဋ်ဂှ် ပြံၚ်လှာဲပအပ်ကဵုလဝ်တာလျိုၚ် နဒဒှ်ဝန်ဇၞော် ဌာနဝန်ဇၞော်လၟိဟ် (၁) ရုၚ်အလဵုအသဳကၟိန်ဍုၚ်ရ။

ပ္ဍဲကဵုပေါဲရုဲမာဲတုဲကၠုၚ်တေံ ဟွံဂွံလဝ်ဇၞးတုဲ ဒံက်တာတိတ်တ်ခိုၚ် ဥက္ကဌဗော်ပၠတရဴညးဍုၚ်ကွာန် မကေၚ်ဒှ်လဝ် ဝန်ဇၞော်ပရေၚ်မၞိဟ် ကေုာံ ပရေၚ်ကလေၚ်ပ္တန်ပ္တူ ကံၚ်ဇြဳပၞာန် မခါန်ကၞက်လဝ်ဂှ် ပြံၚ်လှာဲခါန်ကၞက်ကဵုလဝ် နဒဒှ်ဝန်ဇၞော်ပရေၚ်အာတရဴ ကေုာံ ဟဝ်တေဝ်ရ။

သ္အာၚ်နူဂှ်ပၠန် နဒဒှ်ဝန်ဇၞော်သာသနာ ကေုာံ ယေန်သၞာၚ်ဂှ် ပြံၚ်လှာဲခါန်ကၞက်လဝ် ဥူတေန်ဥူလွေန်တုဲ ဝန်ဇၞော်ပရေၚ်သာသနာတြေံကၠာတေံ ဥူကိုဝ်ဝ်ဂှ် ပြံၚ်လှာဲခါန်ကၞက်ကဵုလဝ် ဒၞါဲဝန်ဇၞော်တၟိဂှ်ဟွံမွဲတုဲ ကဵုဒေါအ်ဇူလဝ် နူကဵုကဆံၚ်ဌာနန္တရရ။

ညးမၞုံအခေါၚ်ဟီုဂး ရုၚ်သ္ကိုပ်ဝန်ဇၞော် အလဵုအသဳညဳသၟဟ်ဂကူ NUG ဥူနေဖုၚ်လာတ်ဂှ် ပွမဒ္ဂေတ်ဗက် ဂၠံၚ်တရဴကလှ်ပ္တိတ်ခါန်ကၞက်ဏံဂှ်ဝွံ အပ္ဍဲဂကောံပၞာန် ကရောၚ်ကရောန်တံ ဇၞော်ဒၟံၚ်ယျဂှ် ထ္ၜးဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ပ္ဍဲကဵုဍေံတံ ကၠောန်ဒၟံၚ် ဆုဲပြံၚ်ခါန်ကၞက်ပ္တိတ်ထောံသာ်ဏံဂှ် အပ္ဍဲဂကောံပၞာန်ဍေံတံ ၜိုတ်လဵုကရောၚ်ကရောန်ဇၞော်မံၚ်ယျဟီုဂှ် ထ္မံက်ထ္ၜးဒၟံၚ်ရ။ ညအ်ဂှ် ကရောန်ဒၟံၚ် ပ္ဍဲကဵုလ္ပာ်အုပ်ဓုပ်ရ။ ရဴၚ်အာလ္ပာ်ပၞာန်ပၠန်မ္ဂး အကြာက္ဍိုပ်သ္ကိုပ်တၠအဝဵု ညံၚ်မေန်အံၚ်လှာၚ်တံကဵု သ္ကိုပ်ရးတံ၊ တုဲတှ်ေ နူကဵုသ္ဇိုၚ်တေံ ဗိုလ်ဇၞော်၊ သ္ကိုပ်ဗိုလ်တံ ဒှ်တမ် အကြာတံဏံဂှ်လေဝ် အရာဟွံကလၚ်အမိၚ်တံ၊ ဒစဵုဒစးအဝဵုတံှဂ် ဒှ်ကၠုၚ်ဒၟံၚ်အဆက်က်ရ။ ပရေၚ်လုပ်စိုပ်လ္ပာ်ညးဍုၚ်ကွာန်တံဂှ်လေဝ် ဒှ်ကၠုၚ်ဒၟံၚ်အဆက်က်ရ။ ဟိုတ်ဂှ်ရ အပ္ဍဲဒပ်ပၞာန်သၟးဟွံက ပ္ဍဲကဵုလ္ပာ်အုပ်ဓုပ်တံဂှ်လေဝ် ကရောၚ်ကရောန်တံဒှ်ဒၟံၚ်တုဲ ဒှ်လက္ချန်အခိၚ်ခြာဟွံလအ် ဒပ်ပၞာန် ထ္ကးအာဂၠိုၚ်ကဵုလွးဏောၚ်ဂှ် မ္ဒးသ္ၚဳဂၠိပ်ကေတ်သာ်ဏံရ” သာ်ဝွံ ညးသ္ဂးရ။

ကံၚ်ဇြဳပၞာန်ဂှ် ပ္ဍဲကဵုအာယုက်ကာလကာတၟေၚ် မကေတ်ပပဵုလဝ်လၟုဟ်ဂှ် သွက်ဂွံထ္မံက်ရုပ်ရဴ တၚ်ပ္တဝ်က္ဍိုပ် ၁၂ တၚ်ကဵု လၟေၚ်ကမၠောန်ဂတ ၅ သာ် မဖျေံစၟတ်လဝ်တံဂှ်တုဲ ကလေၚ်ဒက်ပ္တန်လဝ် ဂကောံအလဵုအသဳကၟိန်ဍုၚ် လ္ဂောံကဵုၝောံပိုဒ် ၄၁၉ သၞောဝ်သ္ဇိုၚ်ဂှ်ရောၚ် သ္ဂးလဝ်ရ။

သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ဂှ်လေဝ် နကဵုကံၚ်ဇြဳပၞာန် သွက်ဂွံထ္မံက်ရုပ်ရဴ လၟေၚ်ကမၠောန်ဂတတံဂှ် ဟိုတ်နူဆက်စပ်ကဵုဒၟံၚ်ပရေၚ်ပၞာန်တၟာဂလိုၚ်ဂှ်ရ ဆၜိုတ်အယာံမာတ် ပြံၚ်လှာဲထောံ ညးတာလျိုၚ်တံဓဝ်ဂှ် တုဲဒှ်အာဟွံသေၚ်ပုဟ်ဂှ် ထံက်ထ္ၜးလဝ်ရ။

“သွက်ဂွံထ္မံက်ရုပ်ရဴ လၟေၚ်ကမၠောန်ဂတဟီုဂှ်လေဝ် ဟိုတ်နူဒှ်ဒၟံၚ်လၟေၚ်ကမၠောန် ဆက်စပ်ဒၟံၚ်ကဵု ပရေၚ်ပၞာန်တၟာဂလိုၚ်ဂှ်ရ ဆၜိုတ်လှာဲထောံ ညးတာလျိုၚ်တံ နူကဵုသ္ဇိုၚ်ဏံဓဝ်ဂှ် ဟွံဒှ်တုဲအာပုဟ်။ ကၠောန်သ္ပပြံၚ်လှာဲဟီုဂှ် ပ္ဍဲကဵုဍေံတံ မၞိဟ်သုၚ်စောဲဂွံတံဂှ် ကလေၚ်ခါန်ကၞက်တုဲ မၞိဟ်သုၚ်စောဲရပ်စပ်ဟွံဂွံတံဂှ် ပ္တိတ်ထောံရ။ ဍာံဍာံဂှ် ခါန်ကၞက်ညးလဵု၊ ပ္တိတ်ထောံညးဂှ်ဟီုဂှ် တန်တဴကဵုလ္တူသ္ကိုပ်ဗိုလ်ဇၞော် မေန်အံၚ်လှာၚ်တုဲ ဒးကဵုဒၟံၚ်သ္ဂုတ်သွာတ်တံရ” သာ်ဝွံ ညးသ္ဂးရ။

ညးခါတ်အကာဲပရေၚ်ဍုၚ်ကွာန်တံကဵု ဂကောံဇြဟတ်ပၠန်ဂတးတံဂှ် နကဵုကံၚ်ဇြဳပၞာန် စနူဂိတုအဝ်ဂါတ် (၁) ဏံတုဲ စဵုကဵုဂိတုဂျာန္နဝါရဳအိုတ် သၞာံဂတတေံဂှ် အပ္ဍဲကာလကာတၟေၚ် မဆက်ကေတ်လဝ်အဝဵုဂှ် ညံၚ်ကၟိန်ဍုၚ်ဂွံညိၚ်ဝတ် ထိၚ်ဒက်မာန်အာဟွံသေၚ်ပုဟ်ဂှ် ကဵုလဝ်တၚ်စၟတ်ရ။

တုဲကၠုၚ် ပ္ဍဲဂိတုအဝ်ဂါတ် (၂) တေံဂှ်လေဝ် ကြဴနူကလေၚ်ဒက်ပ္တန် ဂကောံကံၚ်ဇြဳပၞာန်လ္ၚဵုတံဂှ်တုဲ ဒၟါနူပရေၚ်ထတ်ယုက်ဂးတုဲ ဝန်ဇၞော်ကၟိန်ဍုၚ်ဂမၠိုၚ်ကီု သီုကဵုသၞာဲဒဴကဆံၚ်လ္တူလ္ၚဵုတံဂှ် ပါဲပ္တိတ်ထောံလဝ် နူကဵုကဆံၚ်ဌာနန္တရရ။

ပ္ဍဲကဵုဂကောံအလဵုအသဳကၟိန်ဍုၚ် ကေုာံ ဂကောံကံၚ်ဇြဳပၞာန် မကလေၚ်ဒက်ပ္တန်လဝ်တၟိတံဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ်ကဵု ဒုသ္ကိုပ်ပၞာန်ဇၞော် သဵုဝေန်တံဂှ် အတိုၚ်ကဆံၚ်ကေတ်လဝ်ကၠာတေံရ အပြံၚ်အလှာဲဟွံမွဲ ဆက်ကေတ်ဒၟံၚ်တာလျိုၚ်ရ။

ပရိုၚ်−သြၚ်လောန်တိုၚ်(မ်)

ဗီု−AP/MOI