ပ္ဍဲထဝါဲ ကြဴနူဒပ်ကံၚ်ဇြဳပၞာန် ဒးဒုၚ်ဗတိုက်လဝ်တုဲ ညးဒေသ ဗ္ဒာဲ (၃၀) တၠ ဒးဒုၚ်ရပ်လဝ်

ထဝါဲ၊ အဝ်ဂေတ်(၅)

ရးဒေသဇၞော်တၞၚ်သြဳ၊ ပွိုၚ်ဍုၚ်ထဝါဲ ၊ ဗ္ဒာဲကွာန်မောၚ်မေဝ်ယှောၚ် ကြဴနူဒပ်ကံၚ်ဇြဳပၞာန် ဒးဒုၚ်ကြတ်ဗတိုက်လဝ်တုဲ ညးဒေသဗ္ဒာဲ (၃၀) တၠ ပါလုပ်သီုကွးဘာတက္ကသိုလ်နဲကဲကွတ်ပညာ ဒးဒုၚ်ရပ်လဝ်ရဂှ် ဂွံတီကေတ် နူဂကောံဇြဟတ်ပၠန်ဂတးတအ်ရ။

ဂိတုအဝ်ဂေတ် စၟတ်တ္ၚဲ (၃) တုဲကၠုၚ်တေံ အခိၚ်သဝ်တ္ၚဲ ၜိုတ် (၄ )နာဍဳဂှ် ဒပ်ကံၚ်ဇြဳပၞာန် ဇြဟတ်မၞုံ ဗ္ဒာဲ (၂၀) ပ္ဍိုက်နၚ်ကဵုကွဳစက်ပ္ဍိုက်တိ နူပွိုၚ်ဍုၚ်ဍာ်ဗု စှ်ေကၠုၚ်လ္ပာ်ထဝါဲဂှ် ဒပ်ပံၚ်ကောံ ဒပ်စဵုဒၞာဒေသတအ် ကြတ်ဗတိုက်လဝ်ရ။

ပ္ဍဲပရေၚ်ပန်ဗတိုက်ဂှ် ကောန်ဒပ်ကံၚ်ဇြဳပၞာန် (၅) တၠ ဒးချိုတ်လဝ်တုဲ လ္ပာ်ဒပ်ပံၚ်ကောံ ဒပ်စဵုဒၞာဒေသဂှ် သ္ဂံၚ် PDF မွဲတၠ ဒးလဝ်ဘဲဝပ်ရဂှ် ညးတာလျိုၚ်လလောၚ်ပရိုၚ် ဒပ်ဒမၠုက်ပၠန်ဂတးထဝါဲ (DGRF) ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ကြဴနူဒးဒုၚ်ဗတိုက်လဝ်တုဲ ဒပ်ကံၚ်ဇြဳပၞာန် ဒးဂိလဝ်ဂှ် ဇြဟတ်ဒပ် (၄၀) ပြၚ် ကၠုၚ်ကဵုပၞာန်ရီု လုပ်စိုပ်ကၠုၚ် ပ္ဍဲကွာန်မောၚ်မေဝ်ယှောၚ်တုဲ ရပ်ကေတ်ဏာ ညးဒေသ ပ္ဍဲကွာန်ဂှ် ဗ္ဒာဲ (၃၀) တၠ နဒဒှ်ဒေၚ်ဒုၚ်ဒၞာမၞိဟ်ရ။

ကြဴနူဂှ် ဒပ်ကံၚ်ဇြဳပၞာန် ရပ်ကော်ဏာ ညးဒေသတအ် ပ္ဍဲဒပ်လဟာတုဲ အခိၚ်ဇိုၚ်သဝ်တ္ၚဲဂှ်ရ ၜိုန်ရကလေၚ်ဗလးကဵုလဝ် ညးဒေသဒးဒုၚ်ရပ်လဝ်ဗွဲမဂၠိုၚ်ကီုလေဝ် ကွးဘာတက္ကသိုလ် နဲကဲကွတ်ပညာထဝါဲ (၄)တၠဂှ်မ္ဂး ဆက်ရပ်လဝ်ရဂှ် ဂွံတီကေတ်ရ။

ဟိုနူဒပ်ကံၚ်ဇြဳပၞာန် လုပ်စိုပ်ပန်ပှော်လဝ် ပ္ဍဲကွာန်မောၚ်မေဝ်ယှောၚ် သ္ၚိဒၟံၚ်ညးဒေသ ဗ္ဒာဲ (၁၀) မ ဒးလဝ်လွဟ်မကမ် လီုလာ်လဝ်ရဂှ် ညးဒေသတအ် ဟီုသ္ဂးလဝ်ရ။

ပ္ဍဲမွဲဗွိုၚ်ကွာန်မောၚ်မေဝ်ယှောၚ် ကြပ်ဒၟံၚ်ကဵု တက္ကသိုလ်နဲကဲကွတ်ပညာထဝါဲဂှ် ဟိုတ်နူဒးဒုၚ်ဗတိုက်ဒၟံၚ် ခြာဟွံလအ်ဟွံလအ်ဂှ်ရ ဒပ်ကံၚ်ဇြဳပၞာန် ရပ်ကေတ်ဒၟံၚ် ညးဒေသတအ် နဒဒှ်ဒေၚ်ဒုၚ်ဒၞာမၞိဟ်ဂှ် ဒှ်ဒၟံၚ်လၟိုန်ရ။

ရးဒေသတၞၚ်သြဳ ပ္ဍဲဂိတုဂျူလာၚ် တုဲကၠုၚ်ဏံ ညးဒေသ (၁၀၀) တၠပြၚ် ဒးဒုၚ်ရပ်လဝ်တုဲ ဗွဲမဂၠိုၚ်ဂှ် ကံၚ်ဇြဳပၞာန် ဗ္ဂပ်စုတ်ၝောံပိုဒ်ဂကူနာနာတုဲ ပံက်လဝ်ဂဗုတ်ရဂှ် ဂကောံသုတေသနဒေသဂှ် လလောၚ်တြးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – D.G.R.F